dëgjoni

Gjatë kërkesës për organizimin e Lojërave Olimpike të Pekinit, një i moshuar kinez ka luajtur rol shumë të madh, ai është kryetari i nderit i Komitetit Olimpik të Kinës dhe anëtari i Komitetit Olimpik Ndërkombëtar He Zhenliang. Gjatë një interviste për mediat kineze e të huaja ditët e fundit në Pekin, ai shtjelloi ndikimet e Lojërave Olimpike të Pekinit mbi Kinën e mbi botën. Tani do të ndiqni hollësirat lidhur me të.

He Zhenliang-u afro 80-vjeçar është një diplomat sportiv i njohur në mbarë Kinën, i cili mori pjesë dy herë në kërkesën për organizimin e Lojërave Olimpike nga Pekini, duke qenë personi që e ka përjetuar disfatën dhe suksesin e kërkesës për organizimin e lojërave olimpike. Pas fitimit të së drejtës për organizimin e Lojërave Olimpike Verore të 29-ta nga Pekini në vitin 2001, He Zhenliang-u ka punuar si këshilltar dhe anëtar ekzekutiv i Komitetit Organizativ pranë Komitetit Olimpik të Pekinit. Më 8 gusht 2008 ky i moshuar, që ka bërë përpjekje shumë të mëdha për ardhjen e olimpiadës në Kinë, pa nga afër realizimin e ëndrrës olimpike njëqindvjeçare të Kinës.

"Kur sheh në ceremoninë e hapjes mirëpritjen e ngrohtë të masave popullore kineze për delegacionet e vendeve të ndryshme, kupton qartë se Kina është me të vërtetë një vend me traditën e etiketës, që është gati të jetojë në miqësi me popujt e ndryshëm dhe i mirëpret të gjithë që të vijnë si mysafirë."

Gjatë shumë vjetëve, Hë Zhenliang-u si kryetar i Komitetit të kulturës dhe edukatës olimpike të Komitetit Olimpik Ndërkombëtar ka bërë përpjekje të mëdha për popullarizimin e gjerë të kulturës olimpike. Sipas tij, në zgjedhjen e vendit organizator të Lojërave Olimpike, përveç infrastrukturës së përshtatshme, duhet të mendohet më shumë se si të favorizohet përhapja e ideve dhe konceptit olimpik. Komiteti Olimpik Ndërkombëtar e zgjodhi Kinën si vend organizator të lojërave olimpike, pikërisht se në Kinë ka bazë të mirë masive.

"Karakteristika kryesore e organizimit të lojërave olimpike në Kinë është karakteri i saj i gjerë dhe popullor. Kur 400 milionë të rinj kinezë kanë marrë edukimin okimpik, Kina ka fituar një medalje të artë para se të fillonin lojërat olimpike. Kjo nuk është fjala ime, por është vlerësimi i drejtuesve të Komitetit Olimpik Ndërkombëtar për edukimin olimpik në Kinë."

Lojërat Olimpike kanë ushtruar ndikim të madh mbi Kinën dhe kanë luajtur një rol nxitës për ndërtimin e infrastrukturës, për përmirësimin e mjedisit etj. Por He Zhenliang-u i kushton vëmendje më të madhe trashëgimisë shpirtërore që do t'i lënë Kinës lojërat olimpike.

"Vlerësimet e vendeve të ndryshme për Lojërat Olimpike të Pekinit do t'ia shtojnë shumë popullit kinez ndjenjën e krenarisë, duke forcuar më tej vetëbesimin e kombit kinez. Po më kryesorja është se populli kinez ka kuptuar se si të jetojë në miqësi me popujt e botës. Unë jam i bindur se, krahas shtimit të vetëbesimit kombëtar dhe të patriotizmit, populli kinez do të respektojë më tej kulturat e ndryshme të botës. Kjo është një gjë shumë e mirë."

Sipas mendimit të Hë Zhenlaing-ut, organizimi i lojërave olimpike në Kinë ka ushtruar ndikime të mëdha si mbi Kinën, ashtu edhe mbi botën, duke thelluar shkëmbimet midis tyre.

"Kur njerëzit vijnë në Kinë dhe e shohin nga afër, thellohet njohja reciproke midis Kinës e botës dhe shtohet respekti e besimi midis tyre. Ashtu siç tha z. Zhak Rog, Lojërat Olimpike të Pekinit janë një gur themeltar jo vetëm për zhvillimin e Kinës, por edhe për lëvizjen olimpike. Unë jam i bindur se ato do të jenë një gur themeltar edhe në historinë e shkëmbimeve midis Kinës e botës."

Lojërat olimpike janë një takim madhështor sportiv, ku sportistët e vendeve të ndryshme konkurrojnë bashkërisht, por janë edhe një skenë për të paraqitur kulturat e shumëllojshme të botës. Hë Zhenliang-u shpreh mendimin se çdo vend organizator përpiqet që në lojërat olimpike të paraqitë në mënyrë të dukshme kulturën e vet, vetëm kështu do të mishërojë me të vërtetë karakteristikat e kulturës së shumëllojshme të olimpiadës dhe kjo e fundit ka bërë që olimpiada të ketë forcë më të madhe tërheqëse.

"Unë jam i bindur se Lojërat Olimpike të vitit 2012 të Londrës do të kenë ngjyrën e kulturës angleze, ashtu si Lojërat Olimpike të Pekinit kanë natyrisht elementet dhe ngjyrën e theksuar të kulturës kineze. Athina ekspozoi kulturën e Greqisë dhe Sidnei paraqiti kulturën australiane. Pikërisht shumëllojshmëria e kulturës ka bërë që olimpiada të jetë më tërheqëse dhe më mahnitëse."

Olimpiada ka ushtruar ndikim shumë të madh mbi botën dhe është rrënjosur thellë në zemrat e njerëzve. Pikërisht për këtë arsye, disa njerëz shkaktojnë shpesh trazira duke shfrytëzuar lojërat olimpike. Hë Zhenliang-u është i mendimit se kjo tregon se tani në botë nuk ka qetësi dhe mbrojtja e lëvizjes olimpike e çuarja përpara e frymës olimpike janë shumë të rëndësishme.

"Lojërat olimpike janë e vetmja platformë që i bashkon të gjithë, pavarësisht nga besimet e ndryshme fetare, sistemet e ndryshme politike, racat dhe ngjyra e lëkurës së tyre, për të zhvilluar konkurrimin miqësor dhe të barabartë. Kur sheh pasionin e sportistëve që kanë fituar, brohoritjet e ngrohta të shikuesve për paraqitjen e mrekullueshme të sportistëve, ndien se gjërat e bukura në botën tonë janë më të shumta se ato kriminale dhe të errëta." (Pina)