Në garat e gjimnastikës të Olimpiadës së Pekinit, një vajzë e bukur u la shikuesve përshtypje të thellë. Ajo fitoi medaljen e artë të ushtrimeve të gjithanshme për femra, 3 medalje të argjendta të gjimnastikës si ekip, të ushtrimeve në paralele të shkallëzuara dhe të ushtrimeve në trarin e ekuilibrit dhe medaljen e bronztë në gjimnastikën e lirë duke u bërë gjimnastja që ka fituar medaljet më të shumta në gjimnastikë në Olimpiadën e Pekinit. Kjo vajzë është gjimnastja e famshme amerikane Nastia Liukin.

19-vjeçarja Liukin lindi në një familje ruse gjimnastësh. Babai i saj Valeri Liukin ka qenë gjimnast i famshëm i ish-Bashkimit Sovjetik dhe fitoi dy medalje të arta dhe dy medalje të argjendta në Lojërat Olimpike të vitit 1988. Nëna e saj fitoi medaljen e artë në kampionatin botëror të gjimnastikës artistike në vitin 1987. Nën drejtimin e prindërve, Liukini filloi të bëjë ushtrime gjimnastikore që kur ishte e vogël. Në fillim të viteve '90 të shekullit të kaluar, familja e Liukinit mërgoi në SHBA.

Një gazetar rus u shpreh se rusët e konsiderojnë Liukinin si gjimnaste të vendit të tyre: "Për ne rusët, Liukini është bashkëatdhetarja jonë."

Liukini është shumë krenare për origjinën e vet ruse. Ajo shprehu shpresën se të dy popujt, populli amerikan dhe populli rus, do të krenohen për rezultatin e saj. (Fani)