dëgjoni

Përveç garave dhe ndeshjeve të mrekullueshme, Lojërat Olimpike të Pekinit kanë ndezur edhe entuziazmin e kinezëve për shërbime vullnetare. Siç mësohet, gjatë kohës së zhvillimit të Lojërave Olimpike të Pekinit, punojnë në aktivitete të ndryshme vullnetare më se 1 milion veta. Në emisionin e sotëm, do t'ju njohim me vullnetarin e Lojërave Olimpike, sekretarin e Komitetit të partisë të qytezës Songzhuang të distriktit Tongzhou Hu Jiebao.

Songzhuang ka qenë në të kaluarën një qytezë e vogël në periferi të Pekinit. Pas vitit 1994, atje filluan të jetojnë një numër i madh artistësh dhe kjo qytezë u shndërrua gradualisht në një kamp të madh artistik bashkëkohor me përpjesëtimet më të mëdha në Kinë - kampi i artistëve të qytezës Songzhuang - dhe është bërë një qytezë e njohur kulturore në Kinë, madje dhe në botë. Gjatë kohës së zhvillimit të Lojërave Olimpike, ky vend ka tërhequr një numër të madh turistësh nga vende të ndryshme të botës. Lidhur me këtë, sektorët përkatës kanë organizuar një numër vullnetarësh të Lojërave Olimpike të Pekinit për shërbime turistike, duke i njohur turistët me historinë dhe gjendjen e tanishme të qytezës Songzhuang.

"Në qytezën Songzhuang banojnë artistë të provincave dhe rajoneve të ndryshme të Kinës, prandaj këtu mbizotëron një atmosferë e theksuar artistike dhe ka një forcë të natyrshme tërheqëse. Artistët janë të mendimit se këtu ka atmosferë të mirë për krijimtari, një atmosferë të konkurrimit të njëqind shkollave."

Tani një vullnetar po u tregon vizitorëve shkaqet pse një numër i madh artistësh vijnë të jetojnë këtu. Ky vullnetar është pikërisht sekretari i komitetit të Partisë të qytezës Songzhuang Hu Jiebao. Duke folur për arsyen e punës së tij si vullnetar, ai tha:

"Shërbimet për artistët janë një veprim që e kemi vazhduar për shumë vjet. Ta shndërrojmë bashkinë tonë në një bashki shërbimore, prandaj, brenda sferës artistike, ne jemi shërbyes. Gjatë Lojërave Olimpike, mbarë populli kinez është kthyer në një grup të madh vullnetarësh, prandaj ne dëshirojmë të japim kontributin tonë të duhur për Lojërat Olimpike. "

Si përgjegjës i qytezës Songzhuang, Hu Jiebao është shumë i aftë për të punuar si vullnetar. Ai jo vetëm u shpjegon vizitorëve veprat dhe artin, por edhe gjendjen e zhvillimit dhe kërkesat shpirtërore të fshatit të sotëm kinez. Hu Jiebao shpreson gjithashtu që, me anën e shpjegimeve të tij, të bëjë që vizitorë të vendeve të ndryshme të botës të njihen më tej me qytezën Songzhuang dhe Kinën.

"Ne po u japim miqve të botës shërbime të ndryshme, kryesisht përhapim artin dhe kulturën kineze, si dhe bëjmë të njohur gjendjen e tanishme të Kinës, në mënyrë që bota të mësojë që Kina po fuqizohet dhe zhvillohet dita-ditës."

Duke folur për përfitimet e tij gjatë punës vullnetare, Hu Jiebao tha.

"Kemi organizuar shumë aktivitete interesante. Gjatë kësaj kohe, ne kemi zhvilluar shumë aktivitete artistike që quhen aktivitete artistike olimpike. Shumë miq të huaj kanë ardhur për takim në qytezën Songzhuang. Presidenti i 'Citibank' erdhi te ne dhe ndoqi së bashku me ne ceremoninë e hapjes së Lojërave Olimpike, duke pirë me gëzim së bashku me artistët tanë. Ata pinë mjaft dhe i derdhën njëri-tjetrit raki në trup, duke u përqafuar me njëri-tjetrin e duke thirrur 'China! I Love You! China, Bravo!'"

Entuziazmi dhe përqendrimi i vëmendjes së Hu Jiebaos në këtë punë vullnetare jo vetëm janë vlerësuar lart nga vizitorët, por edhe nga artistët e qytezës Songzhuang. Artistja profesioniste Wang Fang është gjithashtu një vullnetare e Lojërave Olimpike. Duke iu përgjigjur pyetjes për ndryshimet midis vullnetarit Hu Jiebao dhe vullnetarëve të zakonshëm si ajo, ajo tha:

"Mendimet e tyre janë njësoj me tonat. Por ata janë vendas dhe e dinë më mirë si të prezantojnë qytezën Songzhuang, sepse ata e kanë parë me sytë e tyre zhvillimin e kësaj qyteze. Ne njohim vetëm jetën e disa artistëve. Bashkia e qytezës Songzhuang i di më mirë edhe planet dhe të gjitha drejtimet e qytezës, prandaj, ata e bëjnë më mirë se ne punën vullnetare."

Hu Jiebao tha se, si vullnetar i Lojërave Olimpike, ai ndien një kënaqësi të madhe, sepse kjo punë vullnetare jo vetëm u shërben vizitorëve, por edhe prezantimit të artistëve dhe u shërben gjithashtu këtyre artistëve:

"Jam shumë i kënaqur, shërbimet për artistët janë një punë shumë e gëzueshme." ( Zhai)