dëgjoni

Ish-sulmuesja kryesore e skuadrës kineze të volejbollit për femra Lang Ping, që të gjithë e quanin "çekani i hekurt", ka mbi 20 vjet që është larguar nga skuadra kombëtare kineze. Në vitet '80 të shekullit të kaluar ajo dhe anëtaret e tjera të skuadrës kineze të volejbollit për femra, fituan tri herë me radhë titullin kampion në kampionatet botërore të volejbollit. Pas largimit të saj nga skuadra kineze e volejbollit për femra, ajo punoi si trajnere e kësaj skuadre, e skuadrës së volejbollisteve të Klubit Italian. Kurse tani ajo si trajnere e përgjithshme, në krye të skuadrës amerikane të volejbollit për femra, erdhi në Pekin për të marrë pjesë në Lojërat Olimpike. Si e trajton ajo jetën e saj si trajnere e përgjithshme jashtë vendit dhe këtë turne olimpik në Pekin?

Lang Ping, si mbi 20 vjet më parë, duket ende e hapur dhe e drejtë. Megjithëse ka punuar për një kohë të gjatë jashtë vendit si trajnere, ajo ngul këmbë të kthehet çdo vit në atdhe për të parë pamjen e atdheut dhe të afërmit e saj. Kësaj here erdhi për të marrë pjesë në Lojërat Olimpike të Pekinit, ajo tha se ndihet njëlloj sikur është kthyer në shtëpi.

"Kësaj here Lojërat Olimpike janë të veçanta për mua, por nuk ndihem aq e tensionuar, njëlloj sikur jam kthyer në shtëpi."

Ka tre vjet që Lang Ping punon si trajnere e përgjithshme e skuadrës amerikane të volejbollit për femra. Duke kujtuar ditët e para të punës si trajnere e kësaj skuadre, Lang Ping tha:

"Për mua, kjo punë është një sfidë, sepse sistemi i skuadrës kombëtare amerikane është krejt ndryshe nga ai i Kinës. Gjatë gjithë sezonit të ndeshjeve, ndodhnin shumë shumë hallka të punës, që ndryshonin nga ato të Kinës. Atëherë unë duhet t'i pranoja, t'i mirëkuptoja dhe t'i rregulloja në mënyrë racionale. Unë nuk duhet ta drejtoja skuadrën amerikane me mënyrat e drejtimit të skuadrës kineze. Shumë aspekte, si cilësitë trupore të volejbollisteve amerikane, duke përfshirë edhe kuptimin e tyre ndaj volejbollit, janë ndryshe. Unë duhet të kërkoja një mënyrë të përshtatshme stërvitjeje për skuadrën amerikane."

Me përvojën e saj të pasur të ndeshjeve dhe të drejtimit të skuadrave të volejbollit për femra, Lang Ping shumë shpejt u përshtat me sistemin e stërvitjes sportive të SHBA-së dhe gjatë kontakteve të herëpashershme me anëtaret e skuadrës, ka mësuar edhe shumë gjëra prej tyre. Ajo tha:

"Unë ndiej se gjatë drejtimit të skuadrës amerikane kam mësuar shumë gjëra. Para kësaj, gjatë 6 vjetëve si trajnere në Itali, prapë mësova shumë gjëra të dobishme. Si trajnere duhet të di se të gjitha anëtaret e skuadrës vijnë nga sfonde të ndryshme, me kulturë të ndryshme dhe e kuptojnë ndryshe volejbollin. Duhet të njoh mendimet e tyre dhe t'i respektoj këto mendime."

Dhe kështu Lang Ping është pranuar shumë shpejt nga volejbollistet, të cilat e quajnë me dashamirësi "Xheni". Me shtimin të moshës, Lang Ping tha hapur se edhe stili i saj i punës si trajnere sikur po ndryshon, i toleron më shumë volejbollistet. Volejbollistja veterane amerikane Dannielle Skott, që ka marrë pjesë në tre edicione të Lojërave Olimpike, është e mendimit se Lang Ping është një trajnere me nivel të lartë.

Ajo tha: "Xheni është një trajnere shumë e mirë, që ka njohuri të gjera. Ajo ka qenë sportiste, prandaj e kupton shumë mirë esencën e volejbollit, di ta zhvillojë stërvitjen sipas veçorive të çdo njeriu, di t'i drejtojë anëtaret e skuadrës që në çfarë kohe të jenë në gjendje intensive dhe në çfarë kohe të jenë në gjendje të lirshme. Unë mendoj se ajo ka punuar shumë mirë në rregullimin e gjendjes së gjithë ekipit tonë."

Lang Ping ka marrë pjesë shumë herë në Lojërat Olimpike, por kësaj here merr pjesë në Lojërat Olimpike që organizohen në atdheun e saj, ka parë shumë fytyra të njohura, ndien një përzemërsi. Me fjalët e saj që thotë "gëzimi i Lojërave Olimpike".

Ajo tha kështu: "Në disa olimpiada të kaluara, unë kam ndier presion të madh, kisha dëshirë të kryeja patjetër detyrën në një nivel të lartë. Ndoshta kanë kaluar 12 vjet, jam pjekur, kam kuptuar se si ta përballoj presionin, di të gëzoj Lojërat Olimpike, ta gëzoj më shumë zhvillimin e tyre."( Drita-Daming )