Në Lojërat Olimpike të Pekinit, ku marrin pjesë mbi 10 mijë sportistë e sportiste nga 204 vende e rajone të mbarë botës, do të fitohen vetëm 303 medalje të arta. Kjo do të thotë se pjesa më e madhe e sportistëve nuk mund të fitojnë "medalje prej nefriti të mbështjellë me flori". Por ata janë gjithnjë me fytyra të qeshura, sepse fryma e lëvizjes olimpike qëndron në "pjesëmarrjen e tyre". Në fakt, në skenën e Olimpiadës nuk do të ketë kurrë të dështuar, sepse medalja i përket çdo sportisti. Më poshtë do të dëgjoni reportazhin nga Wang Lei.

Kjo këngë që po dëgjoni titullohet: "Unë dhe ti", ajo oshtiu në ceremoninë e hapjes së Olimpiadës së Pekinit. Me thirrjen e frymës olimpike janë mbledhur në Pekin njerëz të ardhur nga vendet e ndryshme, nga kombet e ndryshme e me kulturë të ndryshme.

Thelbi olimpik "Më e rëndësishmja është pjesëmarrja", u paraqit nga "ati i Olimpiadës Moderne" Pierre De Koubertin. Fitues të titullit kampion në olimpiadë janë vetëm një pakicë sportistësh, por më shumë sportistë do të gëzojnë plotësisht harenë e sjellë nga lojërat sportive dhe nga olimpiada. Hale Wendy është një nga tre sportistët pjesëmarrës të delegacionit të Ishujve Solomon, ajo mori pjesë në garën e peshëngritjes 58 kilogramë për femra. Kësaj here ajo zuri vendin e fundit, por korrespondentët tanë nuk panë asnjë fije keqardhjeje në fytyrën e saj. Hale Wendy tha:

"Unë krenohem që erdha në Pekin, krenohem gjithashtu që kam një turne të tillë të Olimpiadës. Kjo është Olimpiada e parë për mua. Isha mjaft e presionuar, por gëzohem që pata mundësi të konkurroj me peshëngritëset më të mira të botës. Njëkohësisht krenohem që jam e vetmja peshëngritëse pjesëmarrëse nga Ishujt Solomon."

William Kress, sportisti nga Ishujt Marshall, mori pjesë në garën e vrapimit 100 metra për meshkuj të Olimpiadës së Pekinit. Me rezultatin e tij prej 11.18 sekondash ai nuk mundi të merrte pjesë në garat e raundit të dytë. Por atij nuk i shkonte ndër mend se në raundin e parë të garës do të përfshihej në të njëjtin grup me vrapuesin e njohur xhamajkan Asafa Powell. Për Kressin nuk ishin të rëndësishëm rezultati apo klasifikimi, por e rëndësishme është se ai siguroi rastin e konkurrimit në terren me sportistët e famshëm të botës, prandaj ai ndihet mjaft i lumtur.

Ai tha: "Unë jam vrapuesi më i shpejtë në Ishujt Marshall, prandaj fitova mundësinë të marr pjesë në Lojërat Olimpike. Shpresoj se herën tjetër do të vrapoj më shpejt. Unë jam shumë i gëzuar, mund t'u tregoj gruas, fëmijëve dhe miqve të mi se kam vrapuar së bashku me atletin më të shpejtë të botës. Pastaj do të shikoj garën 800 metra për meshkuj, që t'u jap forcë sportistëve të vendit tim."

Lihtenshtejni është një vend i vogël me një sipërfaqe prej vetëm 160 kilometrash katrorë, por ka traditë të lashtë sportive, tha Alex Hermann, kryetar i delegacionit të këtij vendi në Olimpiandën e Pekinit. Kësaj here Lihtenshtejni ka vetëm dy sportistë në këtë edicion, por ata janë të guximshëm për të arritur nivelin e tyre më të mirë. Hermann-i u shpreh:

"Ne kemi tradita shumë të mira sportive, sidomos në lojërat dimërore. Në vitin 1936 ne morëm pjesë në Lojërat e 11-ta verore Olimpike dhe qysh atëherë Lihtenshtejni ka marrë pjesë në të gjitha Lojërat Olimpike, përveç atyre të Moskës."

Palestina ka dërguar 4 sportistë në Olimpiadën e Pekinit. Atleti Nadir al-Masri ka hasur shumë vështirësi për pjesëmarrjen në këtë olimpiadë. Më 9 prill Izraeli e lejoi atë të largohej nga Rripi i Gazës për stërvitje në qytetin Xheriko të bregut perëndimor të lumit Jordan, ku ndodhet e vetmja pistë origjinale e vrapimit 400 metra në Palestinë. Më vonë ai shkoi për t'u stërvitur për një muaj në Jordani dhe më në fund, me ndihmën financiare të Komitetit të Unitetit të varur nga Komiteti Olimpik Ndërkombëtar, Masri shkoi në qytetin Guangzhou të Kinës për një stërvitje 40-ditore. Duke u folur korrespondentëve tanë, Masri tha se, me gjithë vështirësitë e mëdha që ka hasur, ai më në fund e realizoi ëndrrën e vet për të marrë pjesë në këto Lojëra Olimpike:

"Për Lojërat Olimpike stërvitja katërmujore është e pamjaftueshme, por niveli im i konkurrimit është i mirë. Unë kam dëshirë të arrij rezultat të mirë gjatë Olimpiadës së Pekinit dhe të shënoj rekord të ri për Palestinën!"

Sipas të dhënave statistikore të sektorëve të ndeshjeve e garave të Komitetit Organizativ të Lojërave Olimpike të Pekinit, sportistët e mbi 80 vendeve nuk ishin ngjitur në tribunën e dhënies së medaljeve të Lojërave Olimpike. Mirëpo këtë herë, në Olimpiadën e Pekinit, disa vende kanë arritur sukses rekord. Në ndeshjen finale të xhudos për peshën 100 kilogramë për meshkuj sportisti mongol Maidan Tuvshinbayar fitoi medaljen e artë, e cila është medalja e parë e Mongolisë në historinë e Lojërave Olimpike. Për këtë Maidan Tuvshinbayar-i ka plot ndjenja falënderimi:

"Për këtë medalje të artë unë duhet të falënderoj prindërit e mi dhe trajnerin tim, si dhe të gjithë popullin mongol, që më ka përkrahur. Kjo është fjala ime e parë pas fitimit të medaljes së artë."

Qysh nga edicioni i parë i Olimpiadës Moderne, Olimpiadat i ka përshkuar gjithnjë shprehja e njohur e Koubertinit: "Për jetën e njeriut, e rëndësishme nuk është vetëm fitorja, por është lufta. Për lëvizjen olimpike, e rëndësishme është pjesëmarrja."

Ka kaluar kohë e gjatë dhe fryma ekziston gjithnjë. Në Olimpiadën e Pekinit sportistët e vendeve të ndryshme me veprimet e tyre po mishërojnë pamjen e bukur të përfytyruar nga Koubertini. Pavarësisht nga rezultatet, medalja e artë i përket çdo sportisti. (Drita-Daming)