dëgjoni

Në fillim të Olimpiadës moderne, të gjithë sportistët pjesëmarrës ishin nga Evropa ose Amerika Veriore. Në vitin 1912, me ftesën e kryetarit të atëhershëm të Komitetit Olimpik Ndërkombëtar Pierre De Coubertin, Japonia u pranua në familjen e madhe olimpike. Që nga ajo kohë, në terrenet olimpike u duk figura aziatike. Në vitin 1928, një aziatik fitoi medaljen e parë të artë. Në programin e sotëm, do t'ju njohim pikërisht me këtë aziatik.

Mikio Oda lindi më 30 mars 1905 në Hiroshimë të Japonisë. Atij i pëlqente atletika që në fëmijëri dhe ishte shumë i aftë në kërcimin së gjati dhe kërcimin trehapësh. Kur ishte 15 vjeç, në shkollën e mesme, Mikio Oda fatmirësisht u drejtua nga trajneri i nivelit të lartë Genzaburo Noguchi, që kishte marrë pjesë në dhjetëgarësh në Lojërat Olimpike. Në vitin 1924, në Lojërat Olimpike të Parisit, Mikio Oda u radhit në vendin e 6-të në kërcimin trehapësh, ndërsa 4 vjet më vonë, në Lojërat Olimpike të Amsterdamit, ai fitoi medaljen e artë, duke u bërë i pari aziatik që ka fituar medaljen e artë olimpike.

Pas Olimpiadës, ku u pyet për sekretin e suksesit, Mikio Oda u shpreh se, përveç aftësisë së vet, fitorja e tij u mbështet edhe te intelekti dhe fati. Ai u shpreh gjithashtu se në kohën e lirë atij i pëlqente të lexonte libra artistikë mbi sportin dhe të shikonte operën tradicionale japoneze "Kabuki". Nga këto pasione ai u frymëzua dhe mori forca.

Krahas kërcimit së gjati, në Lojërat Olimpike të vitit 1928 Mikio Oda u radhit edhe në vendin e 7-të në kërcimin së larti. Në vitin 1931, si student i Universitetit Uaseda, ai arriti rezultatin prej 15.58 metrash, duke shënuar rekord botëror. Në vitin 1964, Lojërat Olimpike u zhvilluan në Tokio. Komiteti organizativ e vendosi posaçërisht shkopin e flamurit në gjatësi 15.21 metra, gjatësi kjo sa ç'ishte rekordi botëror i thyer nga Mikio Oda.

Pas përfundimit të karrierës si sportist, Mikio Oda punoi si trajner dhe përgatiti shumë sportistë japonezë që fituan medaljen e artë olimpike. Ai ishte edhe gazetar sportiv e ka botuar libra teorikë mbi stërvitjet në atletikë. Ai ka punuar gjithashtu si funksionar i Federatës Ndërkombëtare të Atletikës, duke dhënë kontribut të madh për zhvillimin e këtij sporti. Në vitin 2000, Mikio Oda u vlerësua si atleti më i mirë i Azisë në shekullin e 20-të. (Wang Lei) (Artan)