dëgjoni

Ka një gjimnast që është i njohur si i plotfuqishëm në të gjitha ushtrimet gjimnastikore, por në momente kritike të veprimtarive të mëdha ndërkombëtare, ai ka humbur më se një herë medaljen e artë në çastin e fundit. Derisa më në fund në moshën 26-vjeçare, ai mori për herë të parë titullin kampion botëror në gjimnastikën e përgjithshme, në moshën 28-vjeçare, ai fitoi medaljen e parë të artë të Lojërave Olimpike në këtë disiplinë. Ky është pikërisht gjimnasti kinez që fitoi medaljen e artë në gjimnastikën e përgjithshme të Lojërave Olimpike të Pekinit Yang Wei.

Më 14 gusht Yang Wei, me rezultatin e përgjithshëm 94.575 pikë, fitoi medaljen e artë në gjimnastikën e përgjithshme në Lojërat Olimpike të Pekinit. Kjo është hera e parë që ai fiton medaljen e artë në këtë disiplinë. Krahas kësaj, ai është bërë gjimnasti i dytë kinez që fiton medaljen e artë në garat e gjimnastikës së përgjithshme të Lojërave Olimpike. Pas garave, Yang Wei tha: ..."Sot, ndjenja ime më e madhe është se kjo medalje përmban shumë gjëra. Hera e parë që një gjimnast kinez mori këtë medalje ishte në vitin 1996, nga Li Xiaoshuang. Pas 12 vjetëve, ne fituam përsëri, prandaj kjo ka rëndësi të madhe".

Në fakt, kësaj here, Yang Wei luftoi për herë të tretë për marrjen e kësaj medaljeje të artë në gjimnastikën e përgjithshme në Lojërat Olimpike. Qysh në Lojërat Olimpike të Sidneit, Yang Wei, atëherë 20?vjeçar, tregoi potencialin e tij të madh, por ai u takua me gjimnastin magjik rus Aleksel Nemov që ishte në kulmin e formës së vet sportive dhe Yang fitoi vetëm medaljen e argjendtë. Në Lojërat Olimpike të Athinës të vitit 2004, Yang Wei, që kaloi me rezultate të mira ushtrimet e para, bëri një gabim serioz në ushtrimet e fundit në hekur dhe ia lëshoi medaljen e artë që ishte gati ta merrte gjimnastit amerikan Ham. Duke kujtuar dështimin e tij në Lojërat Olimpike të Athinës, Yang Wei tha : .. "Pasi u ktheva në fshatin olimopik, te dera e dhomës, unë u gjunjëzova përpara trajnerit Huang Yubing, duke i thënë: 'Më falni, përpjekjet tona 4-vjeçare shkuan kot.' Unë nuk mund ta mbaja veten. Megjithëse e kam dëshpëruar herë pas here, zemrat tona janë të lidhura ngushtë, ne ndienim përsëri shpresë".

Në fakt, para shumë vjetësh, Yang Wei është bërë i njohur si gjimnasti i plotfuqishëm në ushtrimet e përgjithshme gjimnastikore në botë. Por disfata në Lojërat Olimpike të Athinës e bëri Yang Wein 24-vjeçar t'i lindte mendimi i largimit nga gjimnastika... " Në vitin 2004, isha në një gjendje shumë të mirë, por mendoja se edhe në atë gjendje kaq të mirë nuk mund të fitoja medaljen e artë, ç'kuptim do të kishin stërvitjet e mëvonshme? Atëherë, desha ta përfundoja jetën time gjimnastikore."

Kurse trajneri Huang Yubing nuk hoqi dorë nga ky gjimnast që e kishte dëshpëruar më se një herë. Në kohën kur Yang Wei ndodhej në një gjendje të keqe sportive, Huang Yubing e inkurajoi atë të vazhdojë gjimnastikën e tij të dashur. "Trajneri Huang më shoqëroi në pushime dhe më hoqi pengun nw zemwr. Trajneri Huang më ka nxitur vazhdimisht, është ai që më bëri mua të ngjitem në këtë tribunë të marrjes së medaljes."

Si trajner, Huang Yubing nuk ka hequr dorë asnjëherë nga besimi te Yang Wei, ai është i bindur se Yang Wei është gjimnasti më i fortë në botë në gjimnastikën e përgjithshme. Dështimet e tij nuk kanë ardhur nga rivalët e fortë. Huang Yubing tha se kundërshtari më i madh i Yang Weit është vetë ai.

"Yang Wei nuk ka kundërshtarë të tjerë, përveç vetes. Po të tregojë si duhet nivelin e vet, ai do të arrijë objektivin ideal."

Më në fund, Yang Wei, që tregoi më vonë potencialin e madh, mori për herë të parë titullin kampion në ushtrimet e gjimnastikës së përgjithshme për meshkuj në kampionatin botëror të gjimnastikës në vitin 2006. Atë vit Yang Wei ishte 26 vjeç. Pastaj, në kampionatin botëror të gjimnastikës të vitit 2007, Yang Wei fitoi edhe një herë medaljen e artë në gjimnastikën e përgjithshme dhe u bë "mbreti i denjë i ushtrimeve të gjimnastikës së përgjithshme".

Më 14 gusht, në garën finale të gjimnastikës së përgjithshme të Lojërave Olimpike të Pekinit të organizuar në pallatin kombëtar, Yang Wei tregoi edhe një herë potencialin e vet të madh në këtë disiplinë. Në finale, para raundit të fundit Yang Wei ishte 2.5 pikë përpara të tjerëve. Ushtrimet e fundit u bënë shfaqje individuale të Yang Weit.

Pas përfundimit të garës, Yang Wei i tha korrespondentit :"Jam i qetë, por jam lodhur shumë. Gjatë këtyre vjetëve jam përgatitur përvit për takime të mëdha botërore. Megjithëse jam mirë fizikisht, por jam shumë i lodhur shpirtërisht".

Yang Wei mori më në fund me potencialin e tij këtë medalje të artë të Lojërave Olimpike që e ka pritur prej shumë vjetësh. Ky djalosh 28-vjeçar nuk është martuar akoma, e fejuara e tij Yang Yun ka qenë gjithashtu gjimnaste. Kur gazetari e pyeti a do të martohet vitin e ardhshëm pasi u bë kampion i gjimnastikës së përgjithshme të Lojërave Olimpike, Yang Wei iu përgjigj: "Tani nuk mendoj për vitin e ardhshëm, por do të takohem sot me të." ( Zhai) ( Artan)