dëgjoni

Me ftesën e Radios së Jashtme të Kinës, drejtori i BBC-së Mark Thompson ndoqi në Pekin ceremoninë e hapjes të Lojërave të 29-ta Olimpike. Ditët e fundit, në një intervistë për korrespondentët e radios sonë, z. Thompson tha se Lojërat Olimpike të Pekinit do të jenë edicioni më i suksesshëm në histori.

Në intervistën e dhënë gjatë vizitës në Radion e Jashtme të Kinës, drejtori i përgjithshëm i BBC-së Mark Thompson tha se ai ndjeu një nder të madh që u ftua dhe ndoqi nga afër ceremoninë e hapjes së Lojërave Olimpike të Pekinit. Megjithëse çdo ceremoni hapjeje e Lojërave Olimpike ka të veçantat e saj, ajo e Pekinit është më e suksesshmja dhe ka tërhequr vëmendjen e shikuesve të gjithë Anglisë, madje edhe të mbarë botës.

"Unë jam i bindur se kjo ceremoni do t'u lërë njerëzve përshtypje shumë të thella. Burimet njerëzore që janë mobilizuar në këtë ceremoni, thellësia e kulturës dhe artit, si dhe shfaqjet e nivelit të lartë, janë shumë mahnitëse. Jam i sigurt se interesimi e njerëzve të vendeve të tjera të botës për Kinën do të shtohet vazhdimisht".

Gjatë intervistës, Thompson-i bëri të ditur se, si institucion që ka të drejtën e transmetimit të këtyre Lojërave Olimpike, BBC-ja ka filluar qysh para 6 a 7 vjetësh përgatitjet për njoftimin e Lojërave Olimpike të Pekinit. Kësaj here, BBC-ja ka dërguar më se 400 punonjës në Pekin për transmetimin dhe njoftimin e Lojërave Olimpike dhe, gjatë kohës së zhvillimit të tyre, do të transmetojë nga Pekini rreth 3 000 orë emisione. Edhe në Londër e disa vende të tjera të botës, BBC-ja ka dërguar disa qindra punonjës që merren me njoftimet përkatëse rreth Lojërave Olimpike.

Thompson-i tha se mediat e vendeve të ndryshme u kushtojnë një rëndësi të madhe njoftimeve të Lojërave Olimpike të Pekinit. Ai tha se mediat duhet të luajnë një rol pozitiv në nxitjen e komunikimit dhe mirëkuptimit midis vendeve dhe popujve të ndryshëm. Në qoftë se mediat do të pasqyrojnë objektivisht dhe realisht jetën e popujve të vendeve të ndryshme, popujt do të thellojnë njohjet e mirëkuptimin dhe do t'i sjellin më në fund paqe dhe harmoni botës.

"Unë jam i mendimit se një përgjegjësi e rëndësishme e mediave është nxitja e shkëmbimeve dhe mirëkuptimit midis popujve të vendeve të ndryshme. Ky mision është në përputhje me konceptin e propozuar nga Lojërat Olimpike të Pekinit."

"Unë do të përmend botës se, në bazë të interesave të përbashkëta, mediat ndërkombëtare duhet të luajnë një rol të rëndësishëm".

Thompson-i u tha gazetarëve se, me zhvillimin ekonomik dhe forcimin e ndikimit të Kinës, tani në Angli ka gjithnjë e më shumë të rinj që mësojnë kinezçe. Ndër ta është edhe i biri. Sa herë që vjen në Kinë, ai mahnitet nga ndryshimet e mëdha dhe shpejtësia e zhvillimit.

"Ju mund të ndieni ndryshimet e pandërprera të Kinës. Në qoftë se do të vini përsëri pas dy vjetëve në Kinë, do të shikoni se këtu kanë ndodhur ndryshime kolosale. Jam me fat që pata mundësi ta vizitoj Kinën, veçanërisht në kuadrin e hapjes emocionale të Lojërave Olimpike të Pekinit."

Thompson-i tha se Lojërat Olimpike janë takime madhështore të shkëmbimeve të gjera të kulturave të Lindjes dhe të Perëndimit, janë takime të pasurimit dhe të zhvillimit reciprok të frymës dhe kulturës olimpike e të civilizimeve të vendeve të ndryshme, ato kanë funksionet e edukimit, shkëmbimeve dhe pjesëmarrjes. Ai u uroi sukses të plotë Lojërave Olimpike të Pekinit. ( Zhai) (Artan)