dëgjoni

Do të zhvillohen së shpejti Lojërat Olimpike të Pekinit. Policët e Pekinit kanë marrë përsipër detyrën e sigurimit dhe njëkohësisht edhe detyrën e ndihmës për turistët kinezë e të huaj. Në programin e sotëm do t'ju flas për policin pekinas Liu Wenli, i cili pas mësimit këmbëngulës mbi dhjetëvjeçar, mund të bisedojë në mbi 10 gjuhë me turistët e huaj. Tani ai po pret t'u shërbejë Lojërave Olimpike të Pekinit.

42 vjeçari Liu Wenli është një polic i zonës "Xicheng" të Pekinit dhe punon si rojë në parkun "Jingshan". Parku "Jingshan" ndodhet në veri të Pallatit të lashtë perandorak të Kinës, Qytetit të Ndaluar, shumë të njohur në botë. Nga mali Jingshan mund të shohësh pamjen e përgjithshme të qytetit perandorak me qytezën e ndaluar si qendër. Çdo ditë Liu Wenli përshëndet këtu duke buzëqeshur turistët e huaj në gjuhë të ndryshme dhe u jep ndihmë të shumëllojshme.

Përshëndetjen "Tungjatjeta! Mirë se vini në Kinë, faleminderit!" që ndoqët e ka thënë Liu Wenli në 11 gjuhë të huaja.

Liu Wenli filloi të mësojë anglishten në vitin 1995, kur u mbajt në Pekin Konferenca Botërore e Grave. Atëherë Liu Wenli 28 vjeçar mori pjesë në punën e sigurimit të konferencës. Shumë të huaj kërkonin prej tij ndihmë, por ai nuk kuptonte se ç'po flisnin. Që nga ajo kohë ai është i vendosur të mësojë anglishten.

Ai mësonte me zell e përmendsh nga radio dhe nga tabelat në rrugë. Ai tha:

"Nuk kam ndonjë metodë të veçantë, mësoj përmendsh, madje u sëmura dhe u shtrova disa ditë në spital nga lodhja."

Pas mësimit të zellshëm Liu Wenli mund të përshëndeste në anglishte turistët e huaj. Një herë ai përshëndeti dy të huaj në anglishte, por ata nuk reaguan fare. Duke kujtuar rastin e atëhershëm Liu Wenli tha:

"Para 10 vjetëve, në parkun Jingshan u thashë dy miqve të huaj: 'Unë jam polic këtu, a keni nevojë për ndihmën time ?' Njëri prej tyre tha: 'Unë di pak kinezisht. Jemi francezë, nuk dimë anglisht.' Unë u skuqa menjëherë dhe isha i vendosur që të mësoja disa përshëndetje në gjuhën fraceze."

Puna e tij ishte shumë e ngarkuar, ai nuk mund të mësonte në shkollë ose kurs, prandaj hasi shumë vështirësi gjatë mësimit vetë. Ai tha:

"Mësova 6 muaj, blera 4-5 libra dhe kaseta, por nuk e kuptoja fare."

Më vonë ai mendoi se mënyra më e mirë e mësimit është komunikimi i drejtpërdrejtë me frencezët. Ai tha:

"Pranë shtëpisë sime është një restorant ku vijnë shumë të huaj. Një herë erdhi një mik francez, unë iu luta që të më mësonte disa shprehje në frëngjishte. Ai më shkroi 30 fjali, të cilat i lexoi në ritme të ndryshme dhe i incizoi. Në atë moment ndjeva se mësimi i gjuhëve të huaja është shkëmbimi i zemrës me zemër."

Kështu që Liu Wenli ka mësuar frëngjishten, gjermanishten dhe mund të bëjë bisedë të thjeshtë në 13 gjuhë të huaja. Gjatë punës ai mund të komunikojë me turistët e vendeve të ndryshme.

Gjatë Lojërave Olimpike të Pekinit, do të vijnë qindra mijë turistë të huaj, Liu Wenli që di të flasë 13 gjuhë të huaja është kthyer nga një polic në një person publik, të cilit i kushtojnë vëmendje të madhe mediat kineze e të huaja. Ai u tha gazetarëve se do të përpiqet t'u shërbejë Lojërave Olimpike dhe të marrë pjesë në to. Ai u shpreh se olimpiada nuk është punë vetëm e sportistëve, por edhe e të gjithë kinezëve.

Gjatë kryerjes së detyrave të sigurimit, Liu Wenli dhe kolegët e tij, madje të gjithë policët pekinas, janë në gjendje të përshëndesin të huajt në anglishte. Liu Wenli tha se pas përpjekjeve të gjata, ai dhe kolegët e tij shpresojnë të demonstrojnë para botës figurën dhe dashamirësinë e policëve kinezë.  (Pina)