dëgjoni

Prova në mbrëmjen e 5 gushtit zgjati afro tri orë. Përveç ndezjes së fishekzjarrëve dhe të flakës të pishtarit, u bë provë edhe për të gjitha përmbajtjet e tjera të ceremonisë së hapjes.

Këtë provë e panë dhjetëra mijë shikues dhe gjatë saj bënë edhe provën e transmetimit drejtpërsëdrejti shumë media ndërkombëtare, për t'u përgatitur për transmetimin zyrtar të drejtpërdrejtë të 8 gushtit.

Shumë korrespondentë të huaj thanë se ceremonia e hapjes së Lojërave Olimpike të Pekinit është një demonstrim i kulturës kineze. Gazetari televiziv nga Meksika Jorge Bernal tha se kjo provë e drejtuar nga regjisori Zhang Yimou ka demonstruar thelbin e kulturës kineze.

"Shfaqja e ceremonisë së hapjes ka shfaqur plotësisht kulturën kineze. Megjithëse është vetëm një pjesë prej saj, ajo ka pasqyruar thelbin e saj më të rëndësishëm të bashkëjetesës në harmoni dhe të respektimit të njëri-tjetrit."

Gazetari i Televizionit të Serbisë Jovan Momedoviç u befasua nga elementet e kulturës kineze të pasqyruar në ceremoninë e hapjes. Ai tha se shikuesit e televizionit të tij do të befasohen njëlloj si ai.

"Në ceremoninë e hapjes instrumentet muzikore kineze, gojëdhënat kineze dhe kultura kineze, të gjitha këto do t'i bëjnë spektatorët e mi të mbeten gojëhapur gjatë shikimit."

Gazetari nga Televizioni i Belgjikës Mishel Lekomt tha se, përveç kulturës tradicionale kineze, në ceremoninë e hapjes ka edhe elemente moderne.

"Kjo është ndërthurje e klasikes me modernen dhe njëkohësisht është edhe pasqyrimi i Kinës."

Kjo provë e ceremonisë së hapjes ka ndryshuar edhe mendimin e korrespondentit të Radios së Norvegjisë Thomas Aune ndaj ceremonisë së hapjes së Olimpiadës së Pekinit.

"Zakonisht unë nuk u kam kërkuar dëgjuesve të mi ta shikonin ceremoninë e hapjes, sepse ajo ka qenë zakonisht monotone. Por kësaj here unë do të propozoj që dëgjuesit e mi ta shikojnë këtë ceremoni, sepse ajo do të jetë me të vërtetë shumë madhështore."

Kjo ishte një provë e shfaqjes së përmbajtjeve të ceremonisë, por në fakt ajo ishte edhe një provë e veprimeve të spektatorëve, e punës së sigurimit dhe të organizimit në terren.

Sektorët e sigurimit dhe të mbrojtjes kanë forcuar masat e sigurimit për "Folenë e Zogut" dhe për zonat përreth. Një helikopter patrullonte në hapësirën ajrore mbi "Folenë e Zogut" gjatë gjithë procesit. Puna organizative e gjithë provës shkoi shumë në rregull.

"Pas ceremonisë së hapjes, spektatorët po largohen gradualisht nga 'Foleja e Zogut', në të dy anët e rrugëve përreth qëndrojnë vullnetarët, të cilët u shërbejnë me entuziazëm spektatorëve, duke i ndihmuar ata të largohen me rregull nga stadiumi."

Nëna mbi 60-vjeçare Wang shkoi së bashku me të shoqin në stadium për ta parë provën. Ajo tha se ata të dy ishin të moshuar, por gjatë gjithë provës dhe hyrje-daljes nuk hasën asnjë problem.

"Kjo provë ishte organizuar shumë bukur. Vullnetarët ishin shumë të lodhur. Puna organizative ishte korrekte dhe me renditje shumë të mirë. Dhjetëra mijë shikues dolën menjëherë nga stadiumi, nuk ndodhi asnjë rrëmujë, shumë në rregull."

Nga kërkesa e ruajtjes së sekretit, të gjithë shikuesit që morën pjesë në këtë provë nuk u lejuan të fotografonin ose të xhironin në video. Në ceremoninë e hapjes së Olimpiadës që do të bëhet pas dy ditësh, besojmë se popujt e të gjithë botës do ta dëshmojnë me sytë e vet ceremoninë e hapjes së Lojërave Olimpike të Pekinit me shije kineze dhe të sigurt e të mbarë.

(Drita-Daming )