dëgjoni

Kina është një vend i njohur i ushqimeve të shijshme. Në kuadrin e Lojërave Olimpike të Pekinit, çfarë ushqimesh do të shijojnë sportistët e vendeve të ndryshme? Si punojnë kuzhinierët kinezë për sportistët dhe trajnerët? Le të vizitojmë disa kuzhinierë kinezë të Olimpiadës së Pekinit.

Në orën tre të mëngjesit, Cheng Bao, një djalosh shumë i ri 20- vjeçar, u ngrit shpejt për të shkuar në punë. Kështu ai vazhduar prej tri javësh me radhë, sepse disa muaj më parë u zgjodh si anëtar i "Ekipit të kuzhinierëve për Olimpiadën e Pekinit". Ai ka ardhur nga qyteti Yangzhou i Kinës juglindore në Pekin dhe ndihet shumë i lumtur e fatmirë që është bërë kuzhinier i Olimpiadës dhe Paralimpiadës që do të hapen së shpejti.

Cheng Bao tha: "Unë kam dëshirë të madhe të marr pjesë në këtë Olimpiadë, sepse është një rast shumë i rrallë për ne. Çdonjëri nga ne ka dëshirë të vijë në Pekin, prandaj unë ndihem shumë i lumtur."

Në fillim të këtij viti, Komiteti Organizativ i Olimpiadës së Pekinit filloi të zgjidhte kuzhinierë për Olimpiadën. Universiteti i Yangzhout, ku Cheng Bao studion në degën e kuzhinës, ishte stacioni i parë. Profesori i këtij Universiteti Ji Bufeng tha se kërkesat për kuzhinierët ishin shumë të rrepta, duke përfshirë stazhin e punës të paktën trevjeçar dhe komunikimin në anglishte me të tjerët etj.

Ai tha: "Në radhë të parë personi duhej të paraqiste kërkesë dhe pastaj zgjidhej e kontrollohej nga shkolla. Më pas do të kalonte edhe provimet nga funksionarët e Komitetit Organizativ të Olimpiadës së Pekinit dhe më në fund do të vendosej pas provave praktike në kuzhinë."

Cheng Baos nuk i shkonte ndër mend se provimi në gatim ishte një gjellë shumë e zakonshme e kinezëve ? skuqja e fijeve të patates. Duke kujtuar provimin, Cheng Bao tha me buzëqeshje:

"Këtë gjellë dinë ta gatuajnë të gjithë, por cilësia e saj del jo njëlloj. Disa e bëjnë shumë mirë, kurse disa e gatuajnë me cilësi jo të mirë. Gatimi i kësaj gjelle varet nga kontrolli i zjarrit dhe shkalla e mjeshtërisë së gatimit."

Me një pjatë me fije patateje të shijshme dhe me erë të mirë, sigurisht edhe me tiparet e tij të mira shpirtërore dhe cilësitë e tij komplekse, Cheng Bao fitoi lejen e hyrjes në kuzhinë për Lojërat Olimpike të Pekinit.

Si Cheng Bao, në Universitetin e Yangzhout u zgjodhën edhe mbi 200 studentë të tjerë si kuzhinierë për Olimpiadën e Pekinit, të cilët, pasi u kualifikuan mbi një muaj në shkollë, u ngjitën në tren për në Pekin. Ky grup të rinjsh ishin shumë të gëzuar kur mendonin se do të kontribuojnë si kuzhinierë për fshatin olimpik. Mirëpo, pasi arritën në kuzhinën e fshatit olimpik, këta të rinj nuk fituan menjëherë mundësinë e gatimit të gjellëve, por atyre iu dhanë punë të ndryshme themelore. Cheng Baos iu caktua detyra e përgatitjes së përbërësve të gjellëve kineze. Në turnin e mëngjesit ai duhet të fillojë punë qysh nga ora 5, kurse në turnin e mbrëmjes, ai duhet të punojë që nga ora 10 e mbrëmjes deri të nesërmen. Bashkëstudentja e Cheng Baos, Li Bei, mori detyrën e gatimit të orizit. Kjo punë është e thjeshtë, por monotone, dhe ndryshonte nga ajo që Li kishte përfytyruar. Në fillim të rinjtë e të rejat nuk ishin të përshtatur me këto punë përgatitore, por pas disa muajsh pune në kuzhinën e fshatit olimpik, ata e rregulluan shumë mirë qëndrimin ndaj punës. Li Bei tha:

"Pas një kohe përshtatjeje psikologjike, ne i kapërcyem pengesat që hasëm në fillim. Edhe kuzhinierët e huaj na dhanë shumë nxitje: 'Good job'. Këtë thënie ata e përsërisin shpeshherë. Secili nga ne përgjigjet për një punë të caktuar, kështu e kryejmë më mirë punën tonë."

Cheng Bao, Li Bei dhe bashkëstudentët e tyre të Universitetit të Yangzhout janë vetëm një pjesë shumë e vogël e personave të artit të gatimit që u shërbejnë Lojërave Olimpike. Mësohet se gjatë këtyre Lojërave, në fshatin olimpik, në fshatin e mediave, në Qendrën kryesore të Shtypit, në Qendrën Ndërkombëtare të Radiotelevizionit etj., numri i personave të shërbimeve të kuzhinës është afro 1800, pjesa e madhe e të cilëve janë pedagogë e studentë të shkollave të larta të mëdha të gatimit të Kinës.

Pedagogu i Universitetit të Yangzhout Ji Bufeng, që merret prej më shumë se 30 vjetësh me punën e gatimit, tani është caktuar të punojë në kuzhinën e një pallati sporti për përgatitjen e erëzave të gjellëve. Ai tha se gatimi i një gjelle nuk mund të kryhet vetëm nga një kuzhinier dhe se në punën e gatimit për këtë Olimpiadë kërkohet shumë rreptësi, çdo hallkë e punës duhet të kryhet sipas procedurës.

Ai tha: "Puna e gatimit në kuzhinë ka kritere të rrepta, me hapa dhe receta të standardizuara. Në radhë të parë theksohet siguria e ushqimeve. Kur vijmë në punë, duhet të ndërrohemi e të veshim rrobat e punës, kapelë pune, këpucë pune të unifikuara e duhet të lajmë duart me dezinfektues."

Ai u tha korrespondentëve se ushqimet e Olimpiadës kontrollohen me rreptësi që nga blerja deri te i gjithë procesi i prodhimit.

Mësohet se 70 % e gjellëve për këtë Olimpiadë janë të kuzhinës perëndimore, kurse 30 % janë të kuzhinës kineze. Në ushqimet perëndimore përfshihen ato të kuzhinave hebreje, italiane, franceze, amerikane, myslimane etj. etj. Nënkryetarja e Shoqatës Kineze të Artit të Kuzhinës, zonja Yang Liu, shprehu mendimin se kërkesat themelore për ushqimin nga sportistët e trajnerët e vendeve të ndryshme do të plotësohen, njëkohësisht ata do të kenë edhe rast të shijojnë ushqime të reja kineze.

Ajo tha: "Gjatë këtyre Lojërave Olimpike, në ushqimet që u ofrohen sportistëve e miqve të vendeve të ndryshme, ka mundësi që, mbi bazën tradicionale, të shtohen edhe disa gjellë të reja, të krijuara kohët e fundit, si për shembull meny me gjellë të kombinuara nga kuzhina kineze dhe ajo evropiane, me domethënie olimpike etj. Unë mendoj se ka disa mijëra lloje ushqimesh, çdo javë nuk do të përsëritet menyja."  (Drita-Daming )