dëgjoni

Me afrimin e Lojërave Olimpike të Pekinit, gjithnjë e më shumë gazetarë të huaj i kanë drejtuar sytë nga Lojërat Olimpike të Pekinit. Shumë agjenci të njohura botërore të lajmeve, duke përfshirë "Asëshejted Pres", "Rojter", "Frans Pres" etj. kanë hyrë në qendrën kryesore të shtypit të Lojërave Olimpike të Pekinit për t'u përgatitur për një "rivalitet të ashpër informativ lidhur me Lojërat Olimpike".

Sipas statistikave të Drejtorisë informative dhe të propagandës të Komitetit Organizativ të Lojërave Olimpike të Pekinit, gjatë zhvillimit të Lojërave Olimpike të Pekinit, më se 20 mijë gazetarë do të njoftojnë për mbarë botën madhështinë e Lojërave Olimpike duke u mbështetur te qendra kryesore e shtypit dhe qendra ndërkombëtare të radios.

Sipërfaqja e përgjithshme e qendrës kryesore të shtypit të Lojërave Olimpike të Pekinit arrin në më se 6 300 metra katrorë, duke qenë qendra më e madhe e shtypit në historinë e Lojërave Olimpike.

Sipërfaqja e zyrave që ka marrë me qira "Asëshejted Pres" arrin në 700 metra katrorë, ku punojnë më se 300 persona, 100 më shumë në krahasim me Lojërat Olimpike të Athinës. Inxhinieri elektronik i kësaj agjencie Ben Bonnet tha :"Tani kemi 22 teknikë që po bëjnë këtu përgatitjen dhe rregullimin e pajisjeve, duke vendosur lidhje me linjat e stadiumeve dhe pallateve sportive".

Edhe "Rojteri" ka dërguar një grup të madh për njoftimin e Lojërave Olimpike, tani më se 10 gazetarë të saj po njoftojnë konferencat e ndryshme të shtypit para Lojërave Olimpike. Një punonjës i kësaj agjencie, që quhet Zhou Xuanlian, tha: "Punonjësit e 'Rojterit' nga e gjithë bota do të vijnë këtu. Do të kemi më se 10 teknikë dhe disa qindra gazetarë. Me këtë rast, kemi shtuar edhe disa teknologji të reja, si internetin jokabllor, është shumë lehtë për të punuar".

Kurse agjencia "Frans Pres" ka dërguar një grup informativ me 160 anëtarë, duke përfshirë 70 gazetarë, 70 redaktorë e fotoreporterë, si dhe 20 teknikë. Gazetari i kësaj agjencie Denis Achard tha:"Tani ne 4 a 5 persona po montojmë pajisjet për një numër të madh gazetarësh që do të vijnë në fillim të gushtit në Pekin, ata do të punojnë më se 2 muaj në qendrën kryesore të shtypit të Lojërave Olimpike".

Si agjencia zyrtare e lajmeve e Rusisë, "Itar-Tass" ka dërguar 8 gazetarë të regjistruar me zv.drejtorin e kësaj agjencie Pavel Mikhalev në krye. Në qendrën kryesore të shtypit, një nga gazetarët e kësaj agjencie, Aritey Kirrilov, tha: "Në qendrën e shtypit na kanë ndihmuar një grup të rinjsh vullnetarë që dinë rusisht. Megjithëse janë studentë të vitit të dytë dhe të tretë, ata flasin shumë bukur rusisht dhe na ndihmuan në zgjidhjen e problemeve të dala gjatë regjistrimit".

Drejtori i seksionit për Kinën të agjencisë japoneze të lajmeve " Kyodo News " ka punuar më se 30 vjet për njoftimet mbi Kinën. Ai tha se kësaj herë, "Kyodo News" ka 60 gazetarë të regjistruar të Lojërave Olimpike. Përveç njoftimeve mbi garat e ndeshjet, ata do të njoftojnë edhe për shoqërinë kineze.

Në krahasim me Lojërat e kaluara Olimpike, edhe grupi i agjencisë "Deutsche Press" ka më shumë anëtarë. Zv.drejtori i sektorit teknik të kësaj agjencie Uwe Keyser tha :"Në krahasim me Lojërat e kaluara Olimpike, kësaj herë, numri i grupit tonë është shtuar 10 %. Lojërat Olimpike verore kanë rëndësi më të madhe në botë".

Agjencia spanjolle "La EFE" është agjencia më e rëndësishme e gjuhës spanjolle në botë. Drejtoresha e degës së kësaj agjencie në Pekin Paloma Kaballero tha se agjencia e saj ka dërguar gjithsej 42 gazetarë të regjistruar në këto Lojëra Olimpike. Ajo ka shpresë të madhe për Lojërat Olimpike të Pekinit :"Unë pashë nga afër të gjitha punët përgatitore të Kinës për Lojërat Olimpike. Unë vura re se Kina vërtetoi përpara botës aftësinë e saj për organizimin e Lojërave Olimpike dhe se ajo është bërë një anëtar i rëndësishëm i komunitetit ndërkombëtar, jo vetëm nga ana politike e ekonomike, por edhe nga ana sportive". ( Zhai)