Rrëzë kodrës Cuivei në periferinë perëndimore të Pekinit, gjendet një shesh qitjeje me ajër të pastër dhe me ambient të bukur. Ky është sheshi i qitjes i Pekinit, që është ndërtuar në vitin 1955 dhe që ka qenë gjithmonë si bazë kryesore stërvitore për skuadrën kombëtare kineze të qitjes. Këtu janë përgatitur mjaft qitës të shquar që janë ngjitur në podiumin e dhënies së medaljeve olimpike. Poligoni i pjatave fluturuese brenda në këtë shesh qitjeje do të përdoret si terreni i qitjes me pjata fluturuese të Lojërave Olimpike të Peikinit të vitit 2008. Këtu do të rivalizojnë ashpër qitësit e shumtë, të ardhur nga vende të ndryshme të botës.

Ky poligon, që gjendet në pjesën perëndimore të sheshit të qitjes të Pekinit, ka një sipërfaqe prej 6170 metrash katrorë dhe 5000 vende spektatorësh, ndër të cilat 1000 vende janë fikse, ndërsa 4000 të tjera janë të përkohshme. Nga marsi i vitit 2006 deri në gusht të vitit 2007, u bënë punime për modifikimin dhe zgjerimin e këtij poligoni. Domethënë, për këto punime u deshën gjithsej 1 vit e 5 muaj. Në përgjithësi, punimet u zhvilluan mbarë, por megjithatë pati një interlud të vogël në fazën e parë të punimeve, e cila u bëri ndërtuesve një surprizë të madhe.

Më 7 maj të vitit 2006, gjatë punimeve, ndërtuesit zbuluan një varr të lashtë, me një sipërfaqe prej 50 metrash katrorë. Në qendër të varrit qëndronte një monument me një lartësi sa një njeri dhe me lule të gdhendura, kurse rreth monumentit u gjetën shumë enë të bukura prej guri nefriti dhe ari. Instituti Studimor Arkeologjik i Pekinit dërgoi menjëherë persona të posaçëm. Pas studimit dhe matjes, ata u mahnitën, sepse vunë re se këtu ka më shumë se 100 varre të lashta, që, të marra së bashku, kanë një sipërfaqe prej 20 mijë metrash katrore.

Zbulimet arkeologjike në një sipërfaqe kaq të madhe jo vetëm kanë qenë një punë e vështirë për arkeologët, por kjo punë do të pengonte punimet e modifikimit dhe zgjerimit të poligonit të pjatave fluturuese, sepse puna ndërtimtare në një sipërfaqe prej 20 mijë metrash katrorë duhej të ndërpritej dhe të rifillonte përsëri vetëm pas përfundimit të plotë të gërmimeve arkeologjike. Megjithatë ndërtuesit nuk u ankuan, përkundrazi, bashkëpunuan me arkeologët. Me ndihmën e tyre, arkeologët mbaruan me sukses të plotë gërmimet arkeologjike brenda disa muajve. Nga studimet e kujdesshme del se këtu ka qenë një varrezë e dinastisë Ming (1368-1644), numri i varreve të së cilës arrin në 179. Këtu u zbuluan më shumë se 1000 relikte kulturore, si monedha të bronzta, anë, temjanica, sende nefriti dhe sende të tjera artistike. Shumë prej tyre janë relikte kulturore kombëtare të kategorisë së dytë, prandaj kanë vlerë të madhe koleksioni. (Zheng)(Pina)