dëgjoni

Brenda në Parkun Pyjor të Olimpiadës në Pekin, që është një zonë plot me gjelbërim, gjendet një ndërtesë madhështore që ka një sipërfaqe ndërtimi prej 500 mijë metrash katrore dhe që zë 12 hektarë tokë. Kjo është Qendra Kombëtare Kineze e Mbledhjeve, ku do të jetë fusha e ndeshjeve me skermë të Lojërave Olimpike të vitit 2008.

Qendra Kombëtare Kineze e Mbledhjeve përbëhet nga korpusi qendror, dy pallate hotelesh dhe dy godina zyrash. Pjesa jugore e korpusit qendror do të përdoret kësaj here si pallati i skermës të Lojërave Olimpike të Pekinit. Sipërfaqja e përgjithshme e kësaj pjese arrin në 56 mijë metra katrore. Tri katet e para të kësaj pjese do të përdoren si terren i stërvitjeve dhe ndeshjeve ngrohëse të skermës, ndërsa kati i katërt, që është një terren me 5 pista ndeshjesh dhe 6000 vende spektatorësh, do të jetë fushë e ndeshjeve normale me skermë. Pas përfundimit të ndeshjeve me skermë, kati i katërt do të modifikohet në një terren me 10 pista ndeshjesh me skermë, me 38 poligone qitjeje dhe me 4000 vende spektatorësh, ku do të bëhen ndeshjet me skermë dhe garat e qitjes me pistoleta sportive në kuadrin e pesëgarëshit modern.

Në pjesën veriore të korpusit qendror do të jetë Qendra Ndërkombëtare Radiotelevizive që quhet shkurtimisht IBC. Gjatë Lojërave Olimpike të Pekinit, kjo qendër me një sipërfaqe ndërtimi prej 47 mijë metrash katrore do t'u ofrojë shërbim 16 mijë reporterëve të radio-televizionit, të regjistruar zyrtarisht. Me punën e tyre, figurat dhe zërat e garave të Lojërave Olimpike do të përhapen në çdo vend të botës.

Pas Lojërave Olimpike të Pekinit, pallati i skermës, që përdoret përkohësisht si një arenë sporti, do të hiqet dhe salla e ndeshjeve në katin e katërt do të modifikohet në një sallë mbledhjesh me 6000 vende, ku është ndërtuar një sistem i kategorisë së parë i mbledhjeve televizive. Ajo do të bëhet një qendër e madhe e mbeldhjeve ndërkombëtare dhe e aktiviteteve komplekse të ekspozitave në Pekin.

Vlen të përmendet se, pas Lojërave Olimpike të Pekinit, jashtë Qendrës Kombëtare Kineze të Mbledhjeve do të ndërtohet një lulishtë nëntokësore në një thellësi prej 7 metrash, ku temperatura do të jetë 3 gradë celsius më e ulët se në tokë për shkak të gjelbërimit të bimëve të ndryshme. Në saje të korrentit të ajrit të ftohtë në parkun nëntokësor dhe të ajrit nga Qendra e Mbledhjeve, formohett një "kondicioner natyror i ajrit". Në tavanin e Qendrës së Mbledhjeve, është hapur një "dritare qiellore", nëpërmjet së cilës formohet rrjedha natyrore e ajrit, duke u shfrytëzuar diferencimi i temperaturës së ajrit sipër dhe poshtë. Ky projekt do të pakësojë mbështetjen e tepëruar të ndërtesave te kondicioneri i ajrit dhe do të kursejë në çdo vit 380 mijë kilovat-orë energji elektrike. Qendra Kombëtare Kineze e Mbledhjeve do të bëhet një objekt i madh kompleks me bashkimin e terreneve të mbledhjeve, ekspozitave, hoteleve, tregtisë dhe argëtimit dhe një terren i mrekullueshëm pushimi dhe argëtimi për qytetarët e Pekinit. (Zheng)