Duke folur rreth përgatitjes së sportistëve shqiptarë për në Lojërat Olimpike të Pekinit, ai tha se puna është përqendruar që kohë më përpara te sportistët elitarë dhe se është treguar vëmendje jo vetëm nga Komiteti Olimpik, por edhe nga Ministria dhe federatat përkatëse. "Paraqitja deri tani ka qenë e mirë, - bëri të ditur ai, - dhe shpresojmë të shkojmë jo vetëm me dinjitet dhe paraqitje, por kemi dhe pretendime në sportet e mundjes dhe qitjes, ku ndoshta mund të hyjmë dhe në zonën e medaljeve."

Pasi bëri të ditur përbërjen e gjithë delegacionit shqiptar, ai shtoi se ky mund të jetë delegacioni më i madh në historinë e pjesëmarrjes së Shqipërisë në Lojërat Olimpike deri tani. "Kjo tregon që ka një zhvillim, një evolim e një përkushtim, dhe pa dyshim që është një arritje për ne," përfundoi ai.