dëgjoni

Personazh olimpik: Lindita Kodra, qitësja shqiptare që do të marrë pjesë në Pekin 2008

Lindita Kodra, kampionia e Europës në sportin e qitjes vitin e kaluar, fituese e mjaft medaljeve ndërkombëtare ne këtë sport, po përgatitet për të garuar në Olimpiadën e Pekinit. Ajo është teper e thjeshtë dhe mjaft modeste në intervistën që ne i morëm për Radion e Jashtme të Kinës.

Lidhur me pyetjen se si po shkojnë përgatitjet për pjesëmarrjen në Lojërat Olimpike të Pekinit, ajo tha: "Është një punë me shumë ngarkesë, por duke pasur parasysh motivin që kemi, që do përfaqësojmë ngjyrat e kombit në Pekin, i cili është një motiv shumë i madh, ne po përkushtohemi shumë."

Pasi falënderoi trajneren Diana Mata për punën që ka bërë me të, ajo shprehu shpresën se do të konkurrojë denjësisht dhe si e barabartë me konkurrentet e tjera, sado të forta qofshin ato.

Lidhur me pjesëmarrjen e saj në Kupën e Botës që u zhvillua në muajin prill në Pekin, ku ajo u rendit e katërta, qitësja Kodra tha:

"Ishte një eksperiencë shumë e bukur dhe ajo që është më e rëndësishmja ishte se gara zhvillohej në poligonin ku do të zhvillohen edhe garat e Lojërave Olimpike. Kjo ishte një gjë shumë e mirë për ne sepse u ambientuam, u mësuam me terrenin. Është për t'u falënderuar ajo punë gjigante që kanë bërë organizatorët e këtyre lojërave."

Por a shpreson Lindita Kodra për ndonjë medalje në Lojërat Olimpike të Pekinit? "Ne po punojmë fort dhe, duke e quajtur veten të barabartë me kundërshtaret e mia, shpresoj që të jem te më të mirat," ishte përgjigjja e saj.

Ndërsa trajnerja e qitëses Lindita Kodra, Mjeshtrja e merituar e sportit Diana Mata, tha se që nga shpallja e Linditës kampione e Europës në vitin 2007 dhe arritja e normës për të vajtur në Lojërat Olimpike të Pekinit 2008, ato të dyja bashkë kanë bërë një plan për të arritur kulmin e nivelit dhe rezultatit, në mënyrë që sporti shqiptar i qitjes të shkojë në majat më të larta në Olimpiadë.

Sipas saj, rezultati i Linditës në Pekin tregoi se ato janë tashmë shumë të gatshme për olimpiadën. "Ne po përgatitemi shumë, - e mbylli intervistën e saj Mata, - dhe duam që kulmi i Linditës të jetë në Lojërat Olimpike të Pekinit." (Gazmend/ Artan)