dëgjoni

Qendra kombëtare e notit, që ndodhet në pjesën veriore të Pekinit, është një nga ndërtesat simbolike të Lojërave Olimpike të Pekinit. Në këtë pallat me pamjen e jashtme si kristal i kaltër, do të zhvillohen garat olimpike të disa disiplinave, si të notit, të hedhjes në ujë, të notit të sinkronizuar, të vaterpolos etj., prandaj ai është edhe një nga pallatet më të rëndësishme të Lojërave Olimpike të Pekinit. Meriton të përmendet në veçanti projekti i këtij pallati, që konsiderohet gjerësisht si më i dalluari ndër pallatet sportive e stadiumet e Lojërave Olimpike të Pekinit.

Nga pamja e jashtme, pallati duket si një kub dhe në këtë mënyrë ai quhet edhe "Kubi i ujit". Mirëpo mrekullia e tij nuk qëndron te forma, por te "lëkura" e tij e jashtme. Në të gjithë anët e tij ky kub mbulohet nga një cipë e kaltër dhe gjysmë e tejdukshme, ku janë vizatuara skica gjeometrike si struktura e melekulës së ujit. Tërë ndërtesa duket si një kub i mbuluar me flluska të kaltra. Veçanërisht në mbrëmje, kur hapen të gjitha dritat brenda pallatit, rrezet e dritës shpërndahen jashtë nga cipa e kaltër dhe gjysmë e tejdukshme dhe tërë pallati duket si një kristal i kaltër dhe i ëndërrt.

Edhe në katër anët e brendshme të pallatit është e ngjitur e njëjta cipë me skica gjeometrike si struktura molekulës së ujit. Kjo cipë, duke u ndërthurur me ujin e kthjellët në pishinë, krijon një mjedis magjepsës dhe shikuesve në këtë pallat do t'u duket sikur ndodhen në botën mikroskopike të ujit.

"Kubi i ujit" ndodhet pranë stadiumit kryesor të Lojërave Olimpike të Pekinit, stadiumit kombëtar, që quhet edhe "Fole". Forma kubike e qendrës kombëtare të notit, së bashku me formën rrethore të "Folesë", përbëjnë sferën reale sipas konceptit të kulturës tradicionale kineze si "qielli i rrumbullakët dhe toka katrore". "Kubi i ujit" u projektua bashkërisht nga projektuesit kinezë dhe australianë. Në këtë pallat ka 17 mijë vende, 6 mijë prej të cilëve të fiksuara.

Shumë njerëz kanë interesim të madh për "cipën" jashtë "Kubit të ujit", pikërisht kjo cipë e bën pallatin mahnitës. Në fakt, në sipërfaqen e jashtme të "Kubit të ujit" është përdorur struktura e cipës ETFE. Ky material i veçantë është shumë i fortë. Edhe sikur disa njerëz të kërcejnë mbi të, cipa nuk thyhet. Ai ka edhe veçorinë e vetëpastrimit. Në saje të koeficienit të vogël fërkues të kësaj cipe, pluhuri dhe papastërtitë e tjera nuk mund të mbeten fare në një sipërfaqe aq të sheshtë. Krahas këtyre, kjo cipë magjepsës ka edhe funksionin e mbrojtjes së mjedisit. Kur bie shi, nëpërmjet kësaj cipe mund të mblidhet qind për qind uji i shiut, ndërsa në ditë të kthjellët, 99% e rrezeve të diellit mund të përshkojnë cipën dhe të hyjnë brenda pallatit.

Tjetër anë e rëndësishme e këtij pallati është që ai është i vetmi pallat i Lojërave Olimpike të Pekinit, i ndërtuar me kontributin e bashkatdhetarëve kinezë nga Hong-Kongu, Makao, Tajvani dhe jashtë vendit, prandaj ky pallat pasqyron edhe "ëndrrën qindra vjeçare të kombit kinez për Lojërat Olimpike". (Wang Lei)