dëgjoni

Pas mbi 4 vjet ndërtimi, më 28 qershor të këtij viti u përurua Stadiumi Kombëtar i Kinës, "Foleja e zogut". "Foleja e zogut" është stadiumi kryesor i Lojërave Olimpike të Pekinit, ku do të zhvillohen ceremonia e hapjes së Lojërave Olimpike dhe ajo e Paralimpiadës, garat e atletikës dhe finalja e futbollit të Lojërave Olimpike. Në programin e sotëm do të shkojmë së bashku me ju pikërisht në këtë skenë të rëndësishme të Lojërave Olimpike të Pekinit.

Stadiumi Kombëtar, si stadium kryesor i Lojërave Olimpike të Pekinit, i ngjan shumë folesë së zogut nga pamja e jashtme, prandaj e quajnë "Foleja e zogut". Ai ndodhet në parkun olimpik në pjesën veriore të Pekinit, sipërfaqja e tij e ndërtimit është 258 mijë metra katrorë dhe kapaciteti i tij është 91 mijë vende uljeje. "Foleja e zogut" është një nga 37 objektet sportive të Lojërave Olimpike të Pekinit dhe të qyteteve të tjera bashkërenduese që u përurua i fundit, kjo ka lidhje me vështirësitë e ndërtimit të tij.

Në mars të vitit 2002, projekti i "Folesë së zogut" i përgatitur bashkërisht nga Zyra zvicerane e projektimit Herzog, Instituti i Projektimit Arkitekturor i Kinës etj. u zgjodh pas vlerësimit të specialistëve dhe votimit popullor. Projekti i "Folesë së zogut" përfshihet në sistemin e strukturës së çeliktë në formë samari dhe është një projekt me strukturë origjinale.

Projekti i veçantë ka forcë të madhe tërheqëse, por struktura e formës së samarit në pjesën e jashtme, pjesa e brendshme me vende uljeje në formë tasi dhe kapaciteti i madh prej 90 mijë vetash kanë kërkesa të rrepta për shtyllat e çelikta. Për këtë Kina studioi dhe prodhoi vetë 4.2 tonë prokate çeliku të tipit Q460, në të cilat u mbështet me sukses "Foleja e zogut", duke e bërë atë një nga veprat më të mëdha të strukturës së çeliktë në botë. Ka pasur vështirësi edhe në saldimin e prokateve të çelikut. Kryepërgjegjësi i kësaj vepre z. Tan Xiaochun tha:

"Në 'Folenë e zogut' ka 320 kilometra saldime, të cilat i kryen me cilësi 1100 saldatorë brenda 1 viti e 3 muajve, duke krijuar një mrekulli në historinë arkitekturor të Kinës."

"Foleja e zogut" ka 8 kate, ndër to një është i nëndheshëm. Ajo është 280 metra nga lindja në perëndim dhe 333 metra nga jugu në veri, duke qenë stadiumi më i madh tani në Kinë. Sipas projektimit ajo është një ndërtesë sportive e kategorisë së posaçme, mund t'i rezistojë tërmetit 8 ballësh dhe afati i shfrytëzimit arrin në 100 vjet.

Vendet e spektatorëve në formë tasi janë me 3 shkallë, nuk ka asnjë shtyllë horizontale, kështu që distanca midis spektatorëve dhe qendrës së stadiumit është 140 metra, pavarësisht se ku ulen ata. "Foleja e zogut" është e gatshme edhe për raste urgjente. Kryetari i Këshillit Drejtues të Kompanisë me përgjegjësi të kufizuar të Stadiumit Kombëtar, z. Li Aiqing, u shpreh:

"Në rast urgjent spektatorët mund të dalin brenda 8 minutash në vend të sigurt nga kanale të ndryshme."

"Foleja e zogut" i kushton rëndësi të madhe edhe konceptit të olimpiadës së gjelbër. Këtu përdoret energjia diellore si energji pastrimi, ndërsa 5.8 mijë tonë ujë shiu që mund të mblidhet në vit përdoren për ujitje dhe për pastrimin e tualeteve.

Në prill e maj në Stadiumin Kombëtar u organizuan në kuadër të veprimtarive "Paç fat Pekin" gara e ecjes sportive 2008, gara e maratonës etj., sportistët e funksionarët pjesëmarrës, si dhe spektatorët e pranishëm vlerësuan lart cilësinë dhe funksionet e Stadiumit Kombëtar. Lidhur me këtë kryetari Li Aiqing tha:

"Nëpërmjet këtyre garave, mund të themi se funksionet e "Folesë së zogut" janë të plota dhe cilësia është e mirë."

Nga fillimi i punimeve deri në përurimin e saj, "Foleja e zogut" ka tërhequr vëmendjen e mbarë botës. Në vitin 2007, gazeta angleze "The Times" e përfshiu këtë ndërtesë në 10 veprat më të mëdha të botës në ndërtim e sipër. Në vitin 2008 revista e përjavshme amerikane "Time" ka zgjedhur 100 projektet me ndikime më të mëdha në botë, "Foleja e zogut" zuri vendin e parë. Më 8 gusht në orën 8 të mbrëmjes, do të organizohet ceremonia e hapjes së Lojërave Olimpike të Pekinit, le të presim që "Foleja e zogut" të na japë bukurinë dhe forcën më të madhe tërheqëse. (Pina)