dëgjoni

Në fillim të këtij muaji përfundoi në Shangai Çmimi i Madh i Formulës Një i Kinës. Kjo ishte një nga veprimtaritë ndërkombëtare sportive të nivelit të lartë, të organizuar këtë vit në Shangai. Në këtë qytet, do të organizohen gjithashtu një pjesë e ndeshjeve të futbollit të Lojërave Olimpike të vitit 2008. Nëpërmjet këtyre veprimtarive, Shangai po nxit në mënyrë të gjithanshme punët përgatitore për ndeshjet olimpike të futbollit.

Shangai është një nga rajonet ku do të zhvillohen ndeshjet e futbollit të Lojërave Olimpike të Pekinit. Sipas programit të ndeshjeve, nga 6 deri më 15 gusht 2008, në Shangai do të organizohen 9 ndeshje futbolli të fazës së parë të Lojërave Olimpike, ndër të cilat 6 ndeshje janë për meshkuj, ndërsa 3 të tjerat për femra. Sivjet, Shangai ka organizuar me radhë disa veprimtari të rëndësishme sportive, si Kampionatin Botëror të Notit (në pishinë 25m), Çmimin e Madh të Artë të Shangait të Federatës Ndërkombëtare të Atletikës dhe Çmimin e Madh të F1 të Kinës. Në nëntor atje do të zhvillohet edhe Finalja e Përgjithshme e Tenisit për Kupën e Mjeshtërve për vitin 2006. Zv/drejtori i Drejtorisë së Sporteve të Shangait, z. Qiu Wenchang shprehu mendimin se organizimi me radhë dhe aktivisht i veprimtarive të mëdha ndërkombëtare e ndihmon Shangain në përgatitjen për ndeshjet e futbollit të Lojërave Olimpike të Pekinit.

"Këto veprimtari përbëjnë një platformë për shkëmbimin dhe koordinimin midis qytetit të Shangait, organizatave ndërkombëtare sportive si dhe organizatave sportive kineze. Duke shfrytëzuar këtë platformë, ne po përpiqemi për punët përgatitore dhe organizative të ndeshjeve të futbollit të Lojërave Olimpike 2008."

Po marrim si shembull Çmimin e Madh të Formulës Një të Kinës. Megjithëse pista ndodhet larg zonës urbane, organizatorët u ofruan skuadrave pjesëmarrëse, gazetarëve dhe shikuesve shërbime të mira në komunikacion, telekomunikacion dhe garantimin e sigurisë. Nënkryetari i komitetit organizativ të kësaj gare, menaxheri i përgjithshëm i Kompanisë së Pistës të Shangait, z. Yu Zhifei tha se megjithëse F1 dhe futbolli janë sporte të ndryshme, veprimtaritë e mëdha sportive janë të përafërta në punët organizative dhe mund të marrin nga njëra-tjetra mësimet e përvojë.

"Kjo është një parapërgatitje e qarqeve sportive të Kinës. Vitin e kaluar ftuam kryetarin e Komitetit Olimpik Ndërkombëtar z. Rog të vinte në Shangai për të parë F1. Pas garës, ai më tha se Kina është në gjendje të organizojë F1, prandaj ka më shumë besim për Lojërat Olimpike që do të organizohen në Kinë."

Sivjet Shangai shpalli që, duke shfrytëzuar platfomën e veprimtarive ndërkombëtare, do të përhapë çështjen e Lojërave Olimpike 2008 dhe do t'u shërbejë atyre. Nëpërmjet këtyre veprimtarive të mëdha, Shangai ka fituar përvojë dhe ka përgatitur personel në organizimin e ndeshjeve, përhapjen e tregtisë, shitjen e biletave, pritjen e mediave dhe në vullnetarë.

Vitin e ardhshëm Shangai do të organizojë edhe Kupën Botërore të Futbollit të Femrave, gjë që do t'i japë qytetit tjetër rast parapërgatitor për ndeshjet futbollistike olimpike. Zv/drejtori i Drejtorisë së Sporteve të Shangait, z. Qiu Weichang shprehu besim se në bazë të përvojës së nxjerrë nga organizimi i veprimtarive të ndryshme ndërkombëtare, Shangai do të organizojë ndeshje futbollistike olimpike të nivelit të lartë.

"Jemi me fat që jemi ngarkuar me detyrat e ndeshjeve futbollistike të Lojërave Olimpike 2008. Tani janë zhvilluar normalisht punët përgatitore për terrenin dhe për personelin. Megjithëse ndeshjet në Shangai i përkasin fazës së parë, d.m.th. ndeshjeve fillestare, prapëseprapë do t'i organizojmë në nivel të lartë." (Wang Lei)