Megjithëse renditjet e saj janë ulur gjatë olimpiadave të fundit, Rumania është gjithmonë një fuqi jo e papërfillshme sportive nga Evropa Lindore. Në programin e sotëm, do t'ju tregojmë për pritjen e qarqeve sportive të Rumanisë për Lojërat Olimpike të Pekinit.

Në muajin prill, gjatë Konferencës së Shoqatës Ndërkombëtare të Komiteteve Olimpike Kombëtare që u zhvillua në Pekin, kryetari i Komitetit Olimpik të Rumanisë Morariu dha një intervistë të posaçme për radion tonë, në të cilën ai na njohu me gjendjen e delegacionit olimpik të Rumanisë për Olimpiadën e Pekinit.

"Tani, janë përcaktuar rreth 95% e anëtarëve të delegacionit. Delegacioni olimpik i Rumanisë për këtë olimpiadë do të ketë 140 deri në 150 veta, rreth 100 ndër ta do të jenë sportistë dhe ne do të jemi një ekip i rëndësishëm në Lojërat Olimpike të Pekinit."

Rumania është një vend i fortë në sport. Deri më sot, ajo ka fituar gjithsej 79 medalje të arta, 88 të argjendta dhe 125 të bronzta. Duke folur për atë që pret nga Olimpiada e 29-të, Morariu tregoi besim të plotë. Ai tha: "Rumania ka disa sporte të forta tradicionale. Këtu patjetër duhet të përmendim gjimnastikën, ne po presim që të konkurrojmë me ekipin e gjimnastikës të Kinës në Lojërat Olimpike të Pekinit."

Ana Branza është një skermiste e njohur dhe tani radhitet në vendin e 12-të në botë. Pak kohë më parë, ajo mori pjesë në kampionatin botëror të skermës që u zhvilluan në Pekin, çka ishte edhe faza kualifikuese për olimpiadën e kësaj vere. Gjatë një interviste në atë kohë, Branza bëri vlerësimin e kampionatit dhe na tha se ajo po pret Olimpiadën e Pekinit: "Ky stadium është një nga më të mirët që kam qenë, organizimi i veprimtarisë është shumë profesional. Njerëzit këtu janë shumë miqësorë, kur ke vështirësi, ata të vijnë për ndihmë. Tani, kami siguruar një biletë olimpike, jam shumë e kënaqur. Do të vij prapë në muajin gusht, shpresoj që ndeshjet do të shkojnë normalisht si sot."

Për sportistët dhe funksionarët, ëndrra e tyre patjetër është arritja e një rezultati të mirë në Lojërat Olimpike të Pekinit. Por për vajzën moldaviane Ana Ropot, ëndrronte që të bëhej një vullnetare e Olimpiadës së Pekinit. Tani, kjo ëndërr u realizua. Ropot erdhi në Kinë para 3 vjetësh dhe është një studente e vitit të dytë në Universitetin e Gjuhës e të Kulturës të Pekinit. Ajo tha: "5 vjet më parë mora vesh për herë të parë se olimpiada do të zhvillohet në Pekin. Atë kohë, nuk mendoja se do të vija këtu në Kinë për studim dhe bërja vullnetare olimpike ishte vërtetë një gjë e paimagjinueshme për mua. Por 3 vjet më parë, fitova bursën dhe dëshiroja të bëhesha një vullnetare olimpike pasi erdha në Kinë. Unë di disa gjuhë, prandaj u zgjodha si përkthyese për delegacionin moldavian dhe atë rumun."

Pas një vargu trajnimesh, Ana ka përgatitje të mjaftueshme shpirtërore për punët e vullnetarëve. Megjithëse e di mirë që punët do të jenë shumë të lodhshme, kur bisedoi me gazetarin, ajo dukej e qetë: "Ne do të lodhemi shumë gjatë lojërave, se do të ketë shumë pjesëmarrës në olimpiadë. Mirëpo, olimpiada do të na japë fuqi, sepse ajo është kaq e rëndësishme. Mendoj shpeshherë, kur të mbush 70 vjeçe, do t'u tregoj nipave dhe mbesave të mi përvojën time të shërbimit për olimpiadën. Dua ta bëj këtë punë në mënyrën më të mirë, sepse në njëfarë shkalle, unë përfaqësoj atdheun tim."

Qofshin funksionarë sportivë, qofshin sportistë dhe vullnetarë, rumunët po bëjnë përgatitje të kujdesshme për këtë festë sportive që zhvillohet një herë në katër vjet. (Jiang Lei)