Olimpiada e Pekinit në vitin 2008 është hera e 5-të që Kazakistani merr pjesë në lojërat verore olimpike pasi shpalli pavarësinë. Disa ditë më parë, në një intervistë për gazetarët kinezë, sekretari i përgjithshëm i Komitetit Olimpik të Kazakistanit Timur Dossymbetov bëri të ditur gjendjen e përgatitjeve të olimpistëve kazakë.

Si sekretari i përgjithshëm i Komitetit Olimpik të Kazakistanit, Dossymbetov shpeshherë drejton delegacione sportive të marrin pjesë në kampionate të ndryshme të botës. Pekini është një nga qytetet ku ai ka qenë më shumë. Ai tha se Almaty pati fatin të bëhej ndalesa e parë e stafetës së flakës olimpike të Lojërave Olimpike të Pekinit dhe flaka e shenjtë olimpike ka ndezur pasionin e banorëve kazakë për Olimpiadën e Pekinit. Ai tha: "Unë shkoj shpeshherë në Pekin dhe kam zbuluar ndryshime të habitshme që kanë ndodhur aty gjatë 20 vjetëve të fundit. Infrastrukturat janë përmirësuar, qyteti është bërë më i bukur. Pekini ka pasur përparime të mëdha në zhvillimin e teknikës moderne sportive dhe risinë e sporteve. Tani, marrëdhëniet mes Kazakistanit dhe Kinës janë të mira dhe ardhja e pishtarit olimpik do të thellojë miqësinë mes dy popujve."

Dossymbetov bëri një vlerësim të lartë për punët përgatitore të Lojërave Olimpike të Pekinit. Ai tha: "Jam i bindur se Lojërat Olimpike të Pekinit do të jenë një nga olimpiadat më të bukura dhe më të mira. Pallatet dhe pajisjet sportive në Pekin janë shumë tërheqëse, "Foleja e Zogut" dhe "Kubi i Ujit" janë ndërtesa të mrekullueshme. Fshati olimpik, ku do të jetojnë dhe pushojnë sportistët, ndodhet shumë afër me stadiumet, kjo do të jetë shumë e volitshme."

Pas pavarësisë në vitin 1991, Kazakistani u shafaq në arenën sportive të botës si një vend i fortë në Euroazi. Në Olimpiadën e Athinës në vitin 2004, Kazakistani fitoi 1 medalje të artë, 4 medalje të argjendta dhe 3 të bronzta dhe u radhit në vendin e 40-të të renditjes së medaljeve. Duke folur për Olimpiadën e Pekinit, Dossymbetovi tha se kjo olimpiadë është shumë e rëndësishme për Kazakistanin dhe përgatitjet përkatëse të Kazakistanit janë në një fazë shumë të rëndësishme. Ai bëri të ditur: "Tani, detyra e anëtarëve të kombëtares së Kazakistanit është që të sigurojnë më shumë bileta për në Lojërat Olimpike të Pekinit. Ne do të përpiqemi të formojmë një ekip me afro 100 veta për të marrë pjesë në Olimpiadën e Pekinit."

Kur gazetarët e pyetën për planet e sportistëve kazakë për medalje, Dossymbetov tha: "Është e vështirë që të parashikohet sa medalje mund të marrim ne. Ne do të pretendojmë mendalje olimpike në boks, mundje, qitje etj.. Në qoftë se sportistët arrijnë rezultate të mira, i gjithë Kazakistani do të jetë i gëzuar dhe do të brohorisë për ta."

Ish-skiatori i krosit në natyrë Vladimir Smirnov është sportisti kazak që ka marrë pjesë më shumë në lojërat olimpike. Ai u tha gazetarëve me besim të plotë se sportistë kazakë do të fitojnë 8 ose 10 medalje në Lojërat Olimpike të Pekinit. Smirnovi u shpreh: "Sportistët kazakë kanë një mundësi shumë të madhe për medalje olimpike, p.sh në peshëngritje mund të fitojnë një medalje të artë. Ka edhe mundësi për medalje të arta në boks dhe në mundje të stilit greko-roman. Në atletikë, mundet që Dmitri Karpov të fitojë një medalje të artë. Unë personalisht mendoj që sportistët kazakë mund të fitojnë 3 medalje të arta dhe numri i të gjithë medaljeve olimpike të jetë nga 8 në 10."

Smirnovi bëri të njohur gjithashtu se Dmitri Karpov është një sportist i njohur i 10 garëshit për meshkuj. Ai fitoi një medalje të argjendtë në Lojërat Olimpike të Athinës në vitin 2004 dhe një medalje të artë në Lojërat Aziatike të Dohës në vitin 2006.

Më 2 prill, qyteti më i madh i Kazakistanit Almaty u bë stacioni i parë i stafetës së pishtarit olimpik të Olimpiadës së Pekinit jashtë territorit të Kinës. Pas kësaj veprimtarie, Almaty do të zhvillojë bashkë me kryeqytetin e Kazakistanit Astana, një veprimtari tjetër të madhe sportive, Lojërat e 7-ta Dimërore Aziatike. Kjo do të jetë hera e parë pas shpërbërjes së ish-Bashkimit Sovietik që një vend i Azisë Qendrore organizon një veprimtari sportive të Azisë të një rangu kaq të lartë. Ndërkohë, Olimpiada e Pekinit do të bëhet fillimi i një sërë aktivitetesh të Kazakistanit për të konsoliduar statusin e tij si një vend i fortë në sport dhe për të kandiduar për të drejtën e organizimit të Lojërave Olimpike. (Jiang Lei)