Tërmeti i madh që ra më 12 maj në distriktin Wenchuan të provincës Sichuan ka prekur zemrat e të gjithë kinezëve. Si drejtuese e Kryqit të Kuq të Kinës, zj. Jiang Yiman është më e shqetësuar. Duke kujtuar pamjet pas rënies së tërmetit më 12 maj, Jiangu duket shumë e emocionuar.

"Atë ditë, në kohën e rënies së tërmetit, po drejtoja një mbledhje, ndjeva një tronditje të madhe. Telefonova menjëherë Drejtorinë Kombëtare Sizmologjike dhe mora vesh se kishte rënë një tërmet i madh në Sichuan. Prandaj dërguam menjëherë materiale ndihmëse për në zonat e tërmetit dhe u përgatitëm për bërjen e thirrjeve. Tërë natën e 12 majit nuk fjetëm, por njëkohësisht u gëzuam që po atë natë grupi mjekësor i Kryqit të Kuq u duk në terrenin e fatkeqësisë."

Përpara korrespondentit të radios sonë, zj. Jiang iu duk pak e lodhur. Ajo tha se që nga 12 maji, ajo, së bashku me kolegët e saj në Kryqin e Kuq të Kinës, pothuajse nuk kanë vënë gjumë në sy. Mirëpo përpjekjet e tyre u shndërruan në rezultate pozitive. Më 15 maj, kontingjenti i parë i materialeve ndihmëse arriti në zonat e prekura nga tërmeti. Jiang Yimian-i tha se Kryqi i Kuq i Kinës do të përpiqet, pa kursyer pegesë, që të çojë sa më shpejt në banorët e prekur nga tërmeti kontingjentin e dytë të materialeve, duke përfshirë çadra, jorganë pambuku, rroba, ujë të pijshëm, si dhe ilaçe.

Në stafetën e pishtarit olimpik në qytetin Jiang Gangshan, zj. Jiang Yiman mori pjesë si pishtarmbajtësja e 170-të. Në fakt, nën presionin e madh të punëve shpëtuese, ajo kishte vendosur të heqë dorë nga ky rast i kontaktit me pishtarin olimpik, por mendimi për transmetimin e shpirtit të vëllazërimit nëpërmjet stafetës ia zhduku ngurrimin.

"Ngurroja me të vërtetë shumë. Mirëpo më vonë mendova se po të vija për të marrë pjesë në stafetën e pishtarit, mund të transmetoja një mesazh, që është shpirti i vëllazërimit i Kryqit të Kuq. Nëpërmjet stafetës, do t'u bëja thirrje sa më shumë personave të merrnin pjesë në rreshtimin tonë të dashurisë. Kështu erdha, pavarësisht nga lodhja e madhe."

Në vitin 2004 zj. Jiang Yiman mori pjesë në veprimet e mëdha të dhurimit për cunamin e Oqeanit Indian dhe për punët e rindërtimit. Kësaj here, dëmet nga tërmeti në Wenchuan nuk janë më të vogla se nga fatkeqësia 4 vjet më parë. Zj. Jiang Yiman, që ka përvojë të pasur, tha se Kryqi i Kuq i Kinës do të fillojë të ideojë edhe punët e rindërtimit.

"Do të marrim pjesë aktivisht jo vetëm në shpëtimin urgjent, por do të ideojmë edhe punët e rindërtimit pas tërmetit. Në të kaluarën kemi fituar shumë përvojë në këtë drejtim dhe krijuam shumë fshatra vëllazërie, qendra sanitare vëllazërie, shkolla vëllazërie etj. Kësaj here, do të vazhdojmë të veprojmë kështu dhe të shërojmë sa më shpejt plagët e sjella nga tërmeti."

Me të mbaruar pjesën e saj të stafetës, zj. Jiang Yiman fluturoi drejtpërdrejt në zonën e prekur nga tërmeti. Shpresojmë nga zemra se me urimet dhe frymën e vëllazërisë të të gjithë kinezëve, Jiang Yiman dhe kolegët e saj do të dorëzojnë si duhet "stafetën" e shpëtimit në zonat e fatkeqësisë. (Wang Lei)(Artan)