dëgjoni

Më 8 maj, pishtari i Lojërave Olimpike të Pekinit u transmetua me sukses në majën Xhomolungma dhe zjarri i shenjtë olimpik mbërriti për herë të parë në majën më të lartë në botë. Më 9 maj në orën 19, heronjtë e ekipit të alpinizmit të Kinës, që ndezi me sukses pishtarin olimpik në majën Xhomolungma, si dhe bashkërenduesit e tyre për xhirimin alpin, u kthyen në kampin bazë në lartësinë 5200 m mbi nivelin e detit. Do të ndiqni tani një reportazh të shkruar nga grupi i posaçëm i radios sonë në kampin bazë në majën Xhomolungma.

Më 9 maj, kur akrepi i orës tregoi 19, të shoqëruar me brohoritje të mëdha dhe me zhurmat e pandërprera të mbyllësit të kamerave, heronjtë e ekipit të alpinizmit të Kinës dhe bashkërenduesit për xhirimin alpin u kthyen me zjarrin e shenjtë olimpik në kampin bazë. Udhëtimi i gjatë u lë atyre gjurmët e lodhjes së madhe në fytyrë. Duke folur për veprën e tyre të madhe që meriton të shënohet në historinë e Olimpiadës, fjalët e tyre janë të thjeshta si të njerëzve të zakonshëm.

Mbajtësi i dytë i pishtarit në stafetën në majën Xhomolungma, shefi i ekipit kinez të alpinizmit Wang Yongfeng, tha se gjatë këtij veprimi të jashtëzakonshëm të alpinizmit, ai u prek më shumë nga mirëkuptimi dhe përkrahja nga të gjithë pishtarmbajtësit që nuk u zgjodhën.

"36 kandidatë për pishtarmbajtës kishin potencial për t'u ngjitur në majë, por në fund s'kishte mundësi të ngjiteshin aq shumë persona, prandaj e kisha shumë të vështirë të merrja vendim për listën e alpinistëve që do të ngjiteshin në majë. Sigurisht, në fund ata alpinistë që nuk u zgjodhën, u ngarkuan edhe me detyra të tjera dhe i kryen ato si duhet pa asnjë pakënaqësi."

Për alpinisten 39-vjeçare Kiki, kjo ngjitje në majën Xhomolungma ka rëndësi të veçantë. Në vitin 2005, shoku i Kikit, alpinisti Renna, vdiq në një veprim të alpinizmit. Për të realizuar dëshirën e lënë nga shoku i saj, Kiki premtoi se do të ngjitet në majën Xhomolungma këtë vit. Tani, ajo jo vetëm mori pjesë në stafetën e pishtarit olimpik në majën Xhomolungma si pishtarmbajtëse e parë, por u bë edhe e para alpiniste kineze që ngjitet për here të tretë në këtë majë. Mirëpo, si pishtarmbajtësja e parë, kjo alpiniste me përvojë 20- vjeçare ndjeu nervozizëm.

"Isha e para në stafetë, prandaj isha shumë nervoze. Ngaqë arritëm tepër herët, pritëm në majë për mbi një orë. Më në fund m'u thanë duart dhe këmbët nga e ftohta. Kisha merak se do të humbja pishtarin."

Vajza Tsrenwangmo dhe vëllai i saj i vogël Tsrendanta janë shumë të njohur tani. Si pishtarmbajtësja e fundit e stafetës, Wangmo u mblodh në majën Xhomolungma me vëllanë e saj, xhirues alpin. Kur u tërhoqën në kampin në lartësinë 6500 metra mbi nivelin e detit, gjëja e parë që bënë ata ishte telefonata me nënën, që po shikonte transmetimin e drejtpërdrejtë televiziv. Wangmo tha se në çastin e marrjes së telefonatës, nëna qau.

"Dje, me ta marrë në telefon unë dhe vëllai i vogël, dëgjuam qarjen e mamasë. Ajo qau nga mallëngjimi. Ajo na porositi të kemi kujdes shëndetin. Asgjë tjetër."

Sipas planit fillestar të ekipit kinez të alpinizmit, koha e mbërritjes në majë duhej të ishte në orën 10. Atë ditë, alpinistët u nisën sipas planifikimit, por mbërritën me sukses në majë një orë përpara. Ata jo vetëm u ngjitën shumë shpejt, por edhe zbritën shpejt. Vetëm në ditën e dytë pas ngjitjes në majë, ata u tërhoqën në kampin bazë. Janë të habitshme aftësia luftarake ekipore dhe shpejtësia e paraqitur nga ekipi kinez i alpinizmit në këtë veprim. Përpara mikrofonit, kryetari i shkollës së alpinizmit të Tibetit Nyima Tsering, që ishte edhe pishtarmbajtësi i tretë në këtë stafetë, u shpreh se faktori i ndryshimit të motit është armiku i parë i alpinizmit, prandaj kyçi i "alpinizmit modern" ndodhet në shpejtësinë.

"Alpinizmi modern karakterizohet nga shpejtësia. Ngaqë moti në majën Xhomolungma ndryshon shumë shpejt, i frikësoheshim ndryshimit të motit."

Megjithëse në majën Xhomolungma aktiviteti i demonstrimit të pishtarit olimpik zgjati vetëm për 1 minutë e gjysmë, këto 90 sekonda të shkurtra, si monument, do të shënohen në historinë e Olimpiadës dhe në zemrën e banorëve të mbarë botës.

Ngjitja e pishtarit olimpik në majën Xhomolungma është gjithashtu mishërimi i potencialit kompleks të Kinës. Kështu thuhet në një koment të numrit të 11 majit të gazetës së Singaporit "Lianhe Zaobao" me titull: "Pasqyrat nga ngjitja e zjarrit të shenjtë olimpik në majën Xhomolungma".

Në koment thuhet se pamja e stafetës së zjarrit të shenjtë olimpik në majën Xhomolungma është me të vërtetë e habitshme. Kjo habitje mishërohet jo vetëm nga gëzimi dhe ngacmimi nga faktori olimpik, por edhe nga vlerësimi i botës për figurën dhe potencialin kompleks të Kinës. Krahas këtij veprimi madhështor, botës i lanë përshtypje shumë të thella edhe sektorët dhe produktet përkatëse për garantimin e realizimit të këtij veprimi, p. sh. sistemi i garantimit të jetës së alpinistëve, sistemi i parashikimit të motit, sistemi i telekomunikacionit, sistemi i transmetimit të drejtpërdrejtë televiziv dhe në internet, sistemi i garantimit të ndezjes dhe të transmetimit të pishtarit në lartësi të madhe mbi nivelin e detit, si dhe metoda të tjera me teknologji të lartë. Zjarri i shenjtë olimpik u ndez dhe flakëroi në një të ftohtë 30 gradë nën zero dhe në një erë të fortë me shpejtësi prej 18 m në sekondë, duke u mbështetur te teknologjia e fluturimeve kozmike të Kinës. Kësaj here, na lanë mbresa të thella edhe qartësia e transmetimit televiziv, shpejtësia e transmetimit të fotografive, si dhe qëndrueshmëria e shërbimeve të internetit. Kompanitë kineze të kompjuterit dhe të telekomunikacionit krijuan qendrën drejtuese në kampin bazë në lartësi prej 5200 m mbi nivelin e detit, duke dhënë kompjuter dhe shërbime interneti në përputhje me temperaturën e ulët në majën Xhomolungma. Ata studiuan dhe prodhuan në veçanti edhe minikompjuter, që mund të mbahen në dorë për xhirimin e fotografive dhe për transmetimin e tyre. Fotografitë e alpinistëve, që ngritën pishtarin olimpik në majën e Tokës, pas vetëm ca minutash u panë në uebsajtin e agjencisë zyrtare kineze të lajmeve.

Në këtë koment të gazetës së Singaporit thuhet gjithashtu se ndryshimet në Kinë kanë ndodhur ditë për ditë dhe gradualisht, por mishërohen plotësisht nëpërmjet një aktiviteti të madh. Në këtë drejtim, Olimpiada është platforma më e mirë e demonstrimit të këtyre rezultateve. Ngjitja e pishtarit olimpik në majën Xhomolungma demonstroi pa dyshim zhvillimin e teknologjisë së informacionit të Kinës, talentet e saj tekniko-shkencore, si dhe vendosmërinë e besimin e saj për realizimin e synimit. (Wang Lei) (Artan)