dëgjoni

Në gusht të vitit të ardhshëm, do të hapen në Pekin Lojërat Olimpike , por garat olimpike nuk do të zhvillohen vetëm në Pekin. Krahas kryeqytetit, edhe 6 qytete të tjera kineze, Qingdao, Shangai, Tiancin, Qinhuangdao, Shenyang dhe Hong-Kong, do të organizojnë garat olimpike në disiplinat e lundrimit me vela, të futbollit dhe të hipizmit. Ndër këto 6 qytete koordinuese, disa janë të njohura në botë, si Shangai dhe Hong-Kongu, ndërsa disa të tjera, si Qinhuangdao dhe Shenyang, ndoshta nuk i njihni shumë. Pse këto qytete janë bërë qytete koordinuese të Lojërave Olimpike dhe çfarë force tërheqëse kanë ato? Korrespondentët e Radios së Jashtme të Kinës bënë intervistë në këto qytete dhe në minirubrikën "Drejt Olimpiadës 2008", do të transmetohen me radhë programet përkatëse. Sot, do të shkojmë së pari në qytetin bregdetar Qinhuangdao, në Kinën veriore.

Qyteti Qinhuangdao, që ndodhet në bregun e detit Bohai, është vetëm 270 km larg Pekinit. Ai ka një histori të lashtë. Në gjuhën kineze, Qinhuangdao do të thotë "ishulli i perandorit të dinastisë Qin". Në vitin 215 para erës sonë, perandori Qinshihuang, perandori i parë në historinë kineze, bëri vizitë dhe qëndroi këtu për të kërkuar barin e jetëgjatësisë, kështu ky qytet u emërtua "Qinhuangdao". Këtu ndodhet edhe pikënisja lindore e Murit të Madh Kinez.

Tani Qinhuangdao ka një popullsi prej 2 milionë vetash dhe turizmi e industria e përpunimit janë shtyllat e tij ekonomike. Në Kinë, Qinhuangdao është një qytet me përmasë të mesme, kurse ndër 6 qytetet koordinuese të Lojërave Olimpike ai është më i vogli. Gjatë Lojërave Olimpike të Pekinit, ky qytet do të përgjigjet për organizimin e një pjese të ndeshjeve të futbolli. Si një qytet relativisht i vogël, organizimi i ndeshjeve olimpike është pa dyshim një sfidë e madhe, por banorët e qytetit e konsiderojnë këtë më shumë si një rast të mirë. Nënkryetari i Bashkisë së Qytetit Qinhuangdao, z. Huang Rong tha:

"Nëpërmjet pjesëmarrjes në organizimin e Lojërave Olimpike, do të çohen përpara punët në aspekte të ndryshme, si në zhvillimin ekonomik dhe shoqëror, ashtu edhe në ndërtimin urbanistik dhe në nivelin e qytetarëve. Megjithëse nuk kemi potencial të fuqishëm ekonomik dhe do të përgatitemi shumë për mbledhjen e fondeve për zhvillimin e ndeshjeve olimpike të futbollit, prapëseprapë, pjesëmarrja në Lojërat Olimpike do të na sjellë efektivitet kompleks, që është vështirë të llogaritet vetëm me shifra."

Pasi u përcaktua si qytet koordinues i Lojërave Olimpike, qyteti Qinhuangdao nisi shumë shpejt ndërtimin e pallateve e stadiumeve për ndeshjet sportive. Pas përpjekjeve disa vjeçare dhe me investime prej 630 milionë juanësh, në vitin 2004 u përurua dhe u fut në shfrytëzim Qendra Olimpike e Fizkulturës dhe e Sporteve, ku përfshihen një stadium, dy fusha stërvitjeje, një pallat sportiv dhe dy pallate të stërvitjeve komplekse.

Vitet e fundit, në stadiumin e Qendrës Olimpike të Qinhuangdaos, u zhvilluan një sërë veprimtarish ndërkombëtare të futbollit, në këtë mënyrë stafi i administrimit të stadiumit ka fituar përvojë të pasur në organizimin e veprimtarive ndërkombëtare. Nënkryetari i Bashkisë së Qytetit Qinhuangdao, Huang Ron na shpjegoi:

"Gjatë 5 vjetëve të fundit, kemi organizuar dhjetëra veprimtari sportive ndërkombëtare me një farë ndikimi. Në këtë bazë, kemi përmirësuar terrenet sportive, kemi përgatitur armatën e administrimit të pallateve e stadiumeve, kemi fituar përvojë dhe kemi krijuar atmosferën olimpike në mbarë qytetin."

Krahas ndërtimit të stadiumit kryesor, qyteti Qinhuangdao ka bërë përpjekje edh në punët e tjera përgatitore, si pakësimin e shkarkimit të ajrit të ndotur, përmirësimin e trajtimit të ujit të përdorur, gjelbërimin e qytetit, rregullimin e trafikut etj.

Për organizimin normal të ndeshjeve olimpike, nuk mjaftojnë vetëm pajisjet e mira, por duhen edhe shumë vullnetarë që janë të gatshëm për të dhënë. Vullnetarët olimpikë të qytetit Qinhuangdao vijnë kryesisht nga shkollat e larta të këtij qyteti. Studentët tregojnë entuziazmëm të madh për Lojërat Olimpike. Tani numri i të regjistruarve është shumë më i madh se ai që kërkohet.

"Në qytetin tonë ndodhen shumë shkolla të larta, gjë që na krijon kushte të mira që të zgjedhim vullnetarë me nivel të lartë, veçanërisht që dinë gjuhë të huaja."

Nga prezantimi i zotit Huang mund të shohim gatishmërinë e qytetit Qinhuangdao për organizimin e Lojërave Olimpike. Nënkryetari i Bashkisë së Qytetit Huang Rong shprehu besim të plotë që qyteti Qinhuangdao po pret kontrollin serioz sipas standardtit olimpik. (Wang Lei)