dëgjoni

Që nga vitet e para të zhvillimit të Lëvizjes së Olimpiadës Moderne, vullnetarët kanë qenë pjesë e pamungueshme e Lojërave Olimpike. Për çdo qytet organizator, mbledhja dhe përgatitja e vullnetarëve është një nga punët më të rëndësishme përgatitore për Lojërat Olimpike, e nga kjo nuk përjashtohen as Lojërat Olimpike të Pekinit. Edhe 6 qytetet bashkërenduese të këtyre lojërave kanë zhvilluar punët e mbledhjes së vullnetarëve plot karakteristika të veta. Korrespondentja e radios sonë e provoi këtë në Hong-Kong, qytetin bashkërendues më larg nga Pekini.

Për Lojërat Olimpike dhe ato Paralimpike duhen gjithsej 100 mijë vullnetarë për garat. Ndërsa deri më 31 mars, kur mbaroi pranimi i kërkesave për regjistrimin si vullnetarë olimpikë, numri i kërkesave të paraqitura ishte afro 1 milion e 130 mijë. Edhe në Hong-Kong, mbi 2000 km larg Pekinit, 1800 vende si vullnetarë për garat olimpike të hipizmit janë shumë të kërkuara. Sipas planifikimit, vullnetarët në Hong-Kong mblidhen nga Kompania e Hipizmit Olimpik e Hong-Kongut në 3 faza. Në fazën e parë parashikohet të mblidhen 200 veta, por mbi 8000 njerëz paraqitën kërkesë; edhe në fazën e dytë u shfaq një gjendje e përafërt. Organizatorët i thanë korrespondentes së radios sonë duke qeshur se zgjedhja e një vullnetari nga dhjetëra kërkues u tha atyre hapësirën e mjaftueshme të zgjedhjes.

Me të njëjtin entuziazëm, vullnetarët e Hong-Kongut kanë sfonde të ndryshme nga ata në Pekin dhe mënyra e përgatitjes së tyre nuk është e njëjtë si në Pekin. Vullnetarët olimpikë të mbledhur në Pekin janë kryesisht nga shkollat dhe organizatorët kanë prirje të zgjedhin studentët e shkollave të larta të merren me shërbimet vullnetare. Ndërsa në Hong-Kong, ku shërbimet vullnetare kanë pjekuri, ka gjendje shumë të ndryshme. Në kontingjentin e parë të vullnetarëve për garat olimpike të hipizmit, personat në punë zunë gjysmën e të regjistruarve. Kontrolluesi administrativ i Kompanisë së Hipizmit Olimpik të Hong-Kongut Yuan Haixing shpjegoi qëllimin e zgjedhjeve të tilla:

"Në kontingjentin e parë të vullnetarëve, shpresojmë të zgjedhim disa 'vullnetarë udhëheqës'. Nëse të gjithë vullnetarët janë studentë, administrimi i studentëve nga studentët ndoshta ka vështirësi. Prandaj vullnetarët në kontingjentin e parë janë vullnetarë thelbësorë. I stërvitëm dhe pastaj ata do të stërvitin vullnetarë të tjerë dhe mund të na ndihmojnë në bashkërendimin e punëve të tjera. P. sh. përgatitja e parë e kontingjentit të dytë të vullnetarëve olimpikë u organizua nga vetë ata të kontingjentit të parë dhe ne dhamë vetëm këshilla."

Z. Yuan Haixing u shpreh se Hong-Kongu kishte vetëm 2 vjet e gjysmë për përgatitjen e Lojërave Olimpike, prandaj çdo punë e tyre duhej të shpejtohej. Nëpërmjet mbledhjes së "vullnetarëve udhëheqës", mund të nxitej automatikisht funksionimi i mirë i përgatitjes së vullnetarëve. Z. Zeng Chongji, që punon në një kompani elektronike, është një nga vullnetarët "udhëheqës". Ai sqaroi gjendjen e përgatitjes së tyre.

"Në fillim të marsit 2007, ne vullnetarët e kontingjentit të parë u mblodhëm në kampin e përgatitjes. Patëm drejtimin profesional nga disa australianë, që janë profesionistë që kanë marrë pjesë në punët vullnetare të Lojërave Olimpike të Sidnejit. U drejtuam gjithashtu nga kampioni olimpik i hipizmit. Përgatitjet zgjatën 3 ditë e 2 net, gjatë tyre njoha shumë miq në sektorë të ndryshëm dhe përmbajtjet e përgatitjes ishin shumë profesionale. Krahas këtyre, morëm edhe përgatitje për aftësi udhëheqëse. Sepse ne jemi kontingjenti i parë dhe kemi detyrë të përgatitim kontingjente të dyta dhe të treta, pra aftësia udhëheqëse është ndihmë për ne."

Z. Zheng Chongji shprehu mendimin se përvoja e tij në punë ishte shumë e dobishme që të bëhej "vullnetar udhëheqës", sepse ai merret me punë administrative në kompani.

Edhe korrespondentja e radios sonë ndjeu nga afër aktivitetet përgatitore të vullnetarëve për hipizmin olimpik në Hong-Kong. Në përgatitjen e parë të kontingjentit të dytë të vullnetarëve, të organizuar plotësisht nga kontingjenti i parë, në sallën e përgatitjes me mbi 700 vullnetarë, aktivitetet e ndryshme u zhvilluan normalisht. Vullnetarët e sektorëve të ndryshëm mbajtën fjalime bindëse dhe me stil humori dhe midis tyre diskutuan me njëri-tjetrin në një atmosferë të gjallë.

Tjetër karakteristikë e punëve të vullnetarëve olimpikë të Hong-Kongut është që këta vullnetarë kanë jetuar në një sistem të përsosur të shërbimeve vullnetare. Z. Yuan Haixing shpjegoi:

"Në ndryshim nga krahinat e brendshme kineze, punonjësit hong-kongas njihen me punët vullnetare që në shkollë të lartë. Ata kanë pasion për punë vullnetare dhe, edhe pse janë punësuar, shpresojnë të vazhdojnë shërbimet vullnetare. Puna e vullnetarëve ka një histori të gjatë në Hong-Kong dhe gati gjysma e studentëve janë bërë vullnetarë dhe e njohin kulturën vullnetare. Ata janë të gatshëm."

Zj. He Yongyin është njëra prej këtyre "të gatshmëve" për vullnetarë të garave olimpike të hipizmit në Hong-Kong. Le të dëgjojmë tregimet e saj, si dhe zërin e saj të zemrës:

"Më quajnë He Yongyin. Punoj në universitet, ndërsa më parë kam punuar në një radio australiane dhe në një kompani reklame. Pra, kësaj here dëshiroj të merrem me shërbimet e mediave si vullnetare olimpike, sepse përvoja e kaluar e punës mund të më ndihmojë. Në universitet kam shumë raste për t`u marrë me shërbime vullnetare. Kjo është hera e parë për Kinën që do të organizojë një veprimtari kaq të madhe sportive, pra ndihem shumë krenare që të bëhem vullnetare e kësaj veprimtarie. Hong-Kongu ynë është një qytet shumë shumë i vogël, por ne mund të japim energji shumë shumë të mëdha."