dëgjoni

Në Lojërat Olimpike të Lashtësisë kishte një garë të posaçme e përbërë nga gara të ndryshme sportive dhe u quajt pesëgarësh. Në të përfshiheshin kërcimi së gjati, hedhja e diskut, hedhja e shtizës, gara e vrapimit dhe mundja.

Disa prej tyre tingëllojnë shumë të njohura edhe sot. Por ato ndryshojnë nga garat moderne. Një shembull është kërcimi së gjati. Në rast se të dy këmbët e sportistit nuk ishin paralele kur preknin tokën, rezultati i tij ishte i pavlefshëm. Përveç kësaj, kërcimi së gjati në Lojërat Olimpike të Lashtësisë zhvillohej duke u shoqëruar me muzikë fyelli. Roli kryesor i muzikës ishte për të stimuluar ndjenjat e kërcyesit dhe për të kontrolluar ritmin e vrapimit para kërcimit. Kur fillonte muzika, fillonte edhe koha e vrullit për kërcimin. Kur përfundonte muzika, përfundonte edhe koha e vrullit.

Hedhja e diskut, një sport shumë i njohur për sportdashësit, është trashëguar në një shkallë të caktuar nga Lojërat Olimpike në Greqinë e Lashtë. Pesha dhe diametri i diskut në Lojërat Olimpike Moderne janë përcaktuar sipas 15 disqeve të kohës së lashtë, të zbuluara në vendin ku u organizuan Lojërat Olimpike të Lashtësisë.

Në kohët më të hershme, sportistët hidhnin disqe prej guri. Në shekullin e 6-të para erës sonë, me prodhimin e sendeve prej metali, disqet e gurit që thyeheshin lehtë u zëvendësuan nga disqet e metalit.

Gara e tretë e pesëgarëshit ishte hedhja e shtizës. Gjatë aktiviteteve të gjuetisë në epokën e gurit dhe në periudhën e luftërave, njerëzit kishin mësuar vlerën e shtizës. Prandaj në shkollat e Greqisë së Lashtë fëmijët duhej të mësonin teknika të ndryshme të shtizëhedhjes dhe ta hidhnin shtizën me të dyja duart njëkohësisht. Por shtiza e përdorur në Lojërat Olimpike të Lashtësisë kishte disa kërkesa të posaçme. Ajo ishte 1.6 metra e gjatë, sa gjatësia e një burri të rritur të atëkohëshëm. Shumë tipare të shtizave moderne janë trashëguar nga Lojërat Olimpike të Lashtësisë.

Gara tjetër e pesëgarëshit ishte gara e vrapimit me një distancë prej 192 metrash, sa distanca e vrapimit të veças.

Gara e fundit e pesëgarëshit ishte mundja. Këto 5 gara zhvilloheshin me këtë radhë: vrapimi, kërcimi së gjati, hedhja e diskut, hedhja e shtizës dhe mundja. Sportisti që fitonte më shumë nga këto gara shpallej kampion i pesëgarëshit. Në qoftë se sportistët fitonin një sasi të barabartë të këtyre garave, zhvillohej një mundje midis tyre për të vendosur kampionin final.

Të dashur dëgjues! Në minirubrikën "Tregime Olimpike", ju folëm për pesëgarëshin në Lojërat Olimpike të Lashtësisë. Në mikrofon për ju Shyguan. (Shyguan)