Sot në minirubrikën: "Tregime Olimpike" do t'ju flas për sportin e mundjes në Lojërat Olimpike të Lashtësisë.

Sporti i dytë në Lojërat Olimpike të Lashtësisë ishte mundja. Grekëve të lashtësisë u pëlqente shumë ky sport, i cili në atë kohë ishte një lëndë e detyrueshme mësimore në shumë shkolla greke.

Në Lojërat Olimpike të Lashtësisë, ndeshjet e mundjes nuk klasifikoheshin sipas peshave. Mundësit zgjidheshin me short para ndeshjes. Gjatë ndeshjes, nëse supi, gjuri, gjoksi ose disa pjesë të tjera të trupit të mundësit preknin tokën, ai humbte një pikë. Nëse ai humbte 3 pikë, humbte edhe ndeshjen. Fituesit do të vazhdonin përzgjedhjen me short për ndeshjet e mëtejshme, deri sa në fund të mbetej vetëm një mundës, ai që nuk kishte humbur asnjë ndeshje. Ai ishte edhe fituesi përfundimtar në sportin e mundjes.

Në Lojërat Olimpike të Lashtësisë, gjatë ndeshjeve të mundjes, të gjithë mundësit zhvisheshin dhe e lyenin trupin me vaj ulliri. Për shkak se ata nuk klasifikoheshin sipas peshave, mundësi më i rëndë kishte disa përparësi për të fituar ndeshjen. Prandaj, në atë kohë, dietistët e mundësve zgjidhnin ushqime të posaçme që favorizonin shtimin e peshës së tij dhe i detyronin të hanin shumë.

Në historinë e mundjes në Lojërat Olimpike të Lashtësisë, mundësi më i njohur ishte Mironi. Ai fitoi 7 herë me radhë titullin e kampionit të mundjes në këto lojëra, duke e mbajtur këtë titull për 30 vjet. Ai u quajt mundësi i njohur që nuk humbi asnjë ndeshje. Ka shumë legjenda për këtë mundës të fuqishëm. Për shembull, në ceremoninë e hapjes të Lojërave Olimpike të Lashtësisë në Olimpia, ai bëri një garë vrapimi me një dem. Pasi e kaloi demin, mundësi e shtriu atë fillimisht në tokë, dhe më pas e ngriti lart, duke e mbajtur mbi supe dhe e përshkoi me këmbë të gjithë stadiumin. Mironi ishte jo vetëm një sportist i fuqishëm dhe i shkëlqyeshëm, por edhe një dijetar i kulturuar. Në Lojërat Olimpike të Lashtësisë, sportistët e shkëlqyeshëm si Miron u bënë modelet skulpturore të artistëve të ndryshëm.

Lojërat Olimpike të Lashtësisë nxorën në pah shumë sportistë të shkëlqyer. Por sportisti më i jashtëzakonshëm ishte mundësi i fuqishëm Miron. Mironi vendosi rekorde të panumërta absolute. Gjatë një ndeshjeje me shumë mundës të fuqishëm, Miron qëndronte mbi një platformë të lëmuar hekuri, e cila ishte lyer plot me vaj, ndërsa mundësit e tjerë qëndronin në tokë. Sipas rregullit të ndeshjes, nëse mundësit e tjerë e rrëzonin atë nga kjo platformë hekuri, ata e fitonin këtë ndeshje. Megjithëse ata e shtynin me të gjithë forcat, nuk mund ta lëviznin aspak Mironin nga kjo platformë hekuri.

Legjendat e ndryshme rreth Mironit kishin shumë ngjyra misterioze. Vdekja e tij është një gjë e paimagjinueshme dhe plot me keqardhje. Sipas legjendës, një ditë, Mironi shkoi i vetëm për gjah. Duke ndjekur një kafshë me shpejtësi tepër të madhe, ai hyri në mes dy pemëve të afërta, e nuk mund të lëvizte dot. Ditën e dytë, kur njerëzit e tjerë e gjetën, ky mundës, më i njohuri i Greqisë, ishte ngrënë nga kafshët e egra, dhe kishte mbetur vetëm skeleti i tij. (Shyguan)