Ansambli i Këngëve dhe Valleve Popullore të Shqipërisë do të zhvillojë një turne katër ditor në Greqi, ku do të japë katër koncerte në qytetet e Rethimnos, Hanion, Ierapetras (gurit të shenjtë) dhe në qendër të Kretës.Turneu do të fillojë më 9 Tetor dhe qëllimi i tij është njohja e traditave kombëtare folklorike shqiptare. Në këtë turne, që realizohet me ftesë të Shoqatës Shqiptare në Kretë, Ansambli do të përfaqësohet nga trupa e valleve dhe orkestrës, me pjesëmarrjen e solisteve Irini Qirjako dhe Sabahete Vishnja dhe artisteve të ftuara Eli Fara dhe Myfarete Laze. Ansambli i Këngëve dhe Valleve Popullore do të interpretojë këngë dhe valle nga të gjitha krahinat e Shqipërisë, duke patur edhe numra të veçantë për çdo qytet ku do të ndalë kjo trupë. Ansambli i Këngëve dhe Valleve Popullore është krijuar më 1975 me synimin për të ruajtur dhe kultivuar këngët dhe vallet popullore shqiptare.(Gazmend Agaj)