TIRANË ? Shqipëria del jashtë, Kosova bëhet gati të hyjë. FIFA vendosi dje përjashtimin e futbollit shqiptar nga të gjitha veprimtaritë ndërkombëtare, ndërsa mori vendim që të mbante në vëzhgim (monitorim) futbollin në Kosovë, në varësi të gjendjes diplomatike. 14 marsi, ashtu siç parandjehej, doli një ditë negative për topkëmbën e këtij vendi. "Sipas rekomandimit të Komitetit Ekzekutiv të FIFA-s, u vendos që të përjashtohej Federata Shqiptare e Futbollit për shkak të ndërhyrjeve të rënda politike", - shkruhej në deklaratën e dalë në faqen zyrtare të FIFA-s në internet.

Për më tepër, administratës së FIFA-s iu kërkua që të vëzhgonte futbollin në Kosovë, në varësi të gjendjes diplomatike të shtetit më të ri në botë.

Përplasjet mes FIFA-UEFA-s dhe qeverisë shqiptare kanë traditë të pasur, nisur më 2005 kur u vendos të bëhej një auditim i fondeve në FSHF. Përplasjet shkuan në sallën e gjyqit, ndërsa auditimi nuk u bë. Në fund të vitit 2007 dhe fillim të 2008-ës konflikti rinisi me akuzat e kryeministrit Berisha dhe ministrit Pango për FSHF-së si bandë mafioze dhe kombëtaren se kishte shitur ndeshjet ndaj Bjellorusisë e Rumanisë. Madje Pango kërkoi hetim të UEFA-s për këto ndeshje. Sërish në dyert e FSHF-së shkoi një ekip auditimi, si dhe Pango vonoi firmosjen e statutit të Federatës.

FIFA dhe UEFA kërcënuan me përjashtim më 21 shkurt dhe një ditë më parë Pango e firmosi statutin, por u vu re se kishte bërë disa vërejtje, të cilat u quajtën të papranueshme nga organizmat ndërkombëtarë të futbollit. Ky nuk është një precedent sepse edhe më 1996 Shqipëria u përjashtua për pak kohë nga aktivitetet duke u ripranuar pasi qeveria shqiptare u tërhoq.

Me këtë vendim, rrezikohet fushata eliminatore e Botërorit 2010 ku Shqipëria është në grup me Portugalinë, Suedinë, Danimarkën, Hungarinë e Maltën si dhe pjesëmarrja e klubeve shqiptarë në Ligën e Kampionëve, Kupën UEFA dhe atë Intertoto.

Korrieri.com