I'm scared! (Jam i tmerruar!). Ka qenë ky titulli i djeshëm, me gërma kapitale, i "Sunday Star", ndërsa e përjavshmja "People" është akoma më e drejtëpërdrejtë: "Do ta pësoj si Eduardo". Gjithçka lidhet me yllin portugez të Mançester Junajtid, Kristiano Ronaldo, i cili është trembur shumë në ndeshjen e të shtunës në FA Cup ndaj Portsmuthit. Ndaj tij, kanë qenë disa ndërhyrje të rënda dhe tani Ronaldo mendon se do të ketë fundin e Eduardo Da Silvës, sulmuesit të Arsenalit që është në spital me këmbë të thyer. Ndaj Portsmuthit, ajo që e ka habitur më shumë portugezin ka qenë sjellja e arbitrit Atkinson, që nuk ndëshkoi një ndërhyrje tepër të rëndë të Lasana Diarra e më pas nuk dha një penallti për faullin e Silven Distin. "Sjellja e arbitrit ishte e pabesueshme. Për 5 minuta pësova 3 faulla, njëri më i keq se tjetri dhe nuk pashë asnjë karton të verdhë", tha Ronaldo.

Marrë nga Balkanweb