Shpesh është quajtur si sulmuesi më i madh i të gjitha kohërave, megjithatë, duket e vështirë që njerëzit të admirojnë sërish magjitë e tij. Karriera e Ronaldos, në moshën 31 vjeçare, është vërtetë në rrezik serioz. Dëmtimi i pësuar ndaj Livornos ka qenë vërtetë i rëndë dhe Fenomeni brazilian është zhvendosur dje drejt Parisit, aty ku 8 vjet më parë kreu operacionin e parë me Profesor Zherard Sailant. Koha e rekuperimit është të paktën 9 muaj, pasi tendina e gjurit të majtë është këputur totalisht. Një dëmtim të ngjashëm Ronaldo pati pësuar edhe në vitin 2000, por atëherë iu deshën 18 muaj për t'u rikthyer në fushë. Kësaj radhe, është operuar nga Erik Roland, pasuesi i Sailant. Ronaldo është nisur nga Milano rreth orës 10 në një avion së bashku me të fejuarën e tij Maria Beatriz, dirigjentin e Milanit Leonardo dhe mjekun Masimiliano Sala. Operacioni është kryer rreth orës 18 të pasdites, në të njëjtën klinikë me 8 vjet më parë, kur ai u dëmtua në ndeshjen ndaj Lacios në Kupë.

Mbështetja

Për Ronaldon, mbështetja ka qenë unanime. Mesazhe kanë ardhur nga gjithë Italia, nga presidentë, drejtues dhe tifozë të skuadrave të ndryshme. Gjatë orëve që ka qenë në spital, ai ka marrë një telefonatë edhe nga Silvio Berluskoni, që i ka kërkuar të mos dorëzohet dhe të mendojë sërish për rikthimin. "Ka frikë për karrierën, por e ftova të besojë tek vetja. Ai ka një potencial të madh fizik, mendoj se mund të rikthehet pas disa muajsh", tha presidenti i Milanit. Por, atëherë kur nuk pritej, në skenë ka dalë edhe Morati, njeriu që e ka parë njëherë në gjendjen e të mërkurës në mbrëmje, kur sulmuesi brazilian u shemb përtokë duke qarë. "Shpresoj që të rikthehet shpejt. Ai ka një forcë shpirtërore të pabesueshme", u shpreh dje presidenti i Interit dhe njeriu që e çoi për herë të parë në Serinë A. Të dy nuk kanë folur më, por Morati zbuloi se i ka dërguar një sms. "Për mënyrën si luan, Ronaldo i sforcon shumë tendinat, por ai është edhe pak i pafat. Më vjen keq shumë për të, është e tmerrshme ta shohësh sërish duke vuajtur si atëherë kur ishte tek Interi", tha më tej Morati.

Marrë nga Balkanweb