Federata Shqiptare e Futbollit shtyn publikimin e listës me emrat e lojtarëve të kampionatit tonë, që do të grumbullohen për "zborin" e radhës në Antalia, nga 14 deri më 23 janar. Shkak është bërë neglizhenca e klubeve të Kategorisë Superiore, pjesa më e madhe e të cilave nuk ka konfirmuar pjesëmarrjen e futbollistëve. "Edhe pse ishte planifikuar që të publikohej sot (dje) lista e lojtarëve të kampionatit që trajneri Ari Han do të ketë në dispozicion në grumbullimin në Turqi, do të publikohet nesër (sot)", pohoi përfaqësuesi i zyrës për shtyp në federatë, Lysien Nurishmi. "Klubet nuk kanë konfirmuar pjesëmarrjen e futbollistëve që ishin përzgjedhur nga federata dhe kjo i ka ngadalësuar disi procedurat". Megjithatë, kjo nuk mund të cilësohet si një mënyrë për të shprehur pakënaqësinë me grumbullimin stërvitor. Në të kaluarën, skuadrat kryesore në vend e kanë kontestuar "zborin" (traditë që ka filluar në vitin 2003, kur në stolin kuqezi u punësua gjermani Hans Peter Brigel), pasi ai i privonte nga futbollistët kryesorë në momentin e përgatitjeve për pjesën e dytë të sezonit. Rasti më i fundit ka parë si protagonistë drejtuesit e Partizanit, të cilët nuk lejuan që Bakaj dhe Muzaka të largoheshin nga kampi stërvitor, për t'u vendosur nën urdhrat e ish-trajnerit Oto Bariç. "Deri në këto momente nuk ka asnjë ankesë të shkruar nga klubet, vazhdoi Nurishmi. Edhe pse mund të ketë ndonjë pakënaqësi për grumbullimin e futbollistëve, askush nuk ka deklaruar në federatë se nuk do të lejojë udhëtimin e lojtarëve në Antalia".

Gjatë dhjetë ditëve të grumbullimit, kontingjenti me 22-23 lojtarë të kampionatit, që shihen si kandidatë për një vend në Kombëtaren "A", do të akomodohet në hotel "Majestik". Ende duhen punuar detajet e planit stërvitor, por në institucionin që drejton futbollin në vend shpresojnë edhe në një miqësore me Kombëtaren e Arabisë Saudite. "Përfaqësuesja e Arabisë Saudite do të jetë në Antalia dhe do bëjmë të pamundurën që të zhvillojmë një miqësore, sqaroi Nurishmi. Asgjë nuk është përcaktuar, por synojmë që të gjejmë akordin me zyrtarët e federatës së këtij vendi". Gjithsesi, në periudhën e mesjanarit në Antalia do të ketë edhe shumë klube të huaja, të cilat zhvillojnë fazën përgatitore dhe mendohet se gjetja e kundërshtarëve për miqësore nuk është e vështirë

( "Shqip", 09. 01. 2008)