Turneu i Antalias është vënë në një rrezik serioz dje, për shkak të kundërshtimit të ashpër të klubeve të Superligës për të lejuar futbollistët të shkojnë me Kombëtaren B në Turqi. Partizani dhe Vllaznia nuk kanë qenë aspak dakord për të lejuar lojtarët e tyre të grumbullohen nën urdhërat e trajnerit Ari Han në këtë periudhë, duke qenë se skuadrat sapo kanë nisur fazën përgatitore të dimrit. Marrja e futbollistëve kryesorë të tyre për t'u vëzhguar nga tekniku i ri i kombëtares, natyrisht që do të krijonte shumë probleme për trajnerët në këtë periudhë. Presioni i klubeve ka bërë që të shtyhet edhe zbardhja e listës përfundimtare me futbollistët që do të udhëtojnë drejt Turqisë në datën 14 janar. Kundërshtimi në fakt ka ardhur për shkak se shumë prej futbollistëve të thirrur nga zëvendës presidenti Bujar Kasmi, prej kohësh nuk janë pjesë e planeve të trajnerëve të kombëtares. Nga Partizani janë thirrur Bledar Shkëmbi, Tefik Osmani dhe Paulin Dhëmbi, tre lojtarë për të cilët është e qartë se nuk kanë më asnjë lidhje me kombëtaren, kjo për arsye të ndryshme.

Kundërshtimi

Klubet e Partizanit dhe të Vllaznisë nuk kanë qenë dakord me marrjen e disa lojtarëve të tyre për "zborin" 10 ditor të Antalias që do të organizojë trajneri Ari Han me lojtarë të kombëtares B. "Këta futbollistë prej kohësh nuk janë më pjesë e kombëtares dhe nuk kanë arsye pse të thirren. Për më tepër, që kjo na prish gjithë fazën përgatitore", u shprehën dje zyrtarë të klubeve të Partizanit e Vllaznisë. Sipas tyre, përveç Bakajt te Partizani apo Sukajt te Vllaznia, të thirrurit e tjerë janë për të plotësuar numrin dhe asgjë më shumë. Gjithsesi, turneu i Antalias ka qenë i programuar që amë parë ng FSHF dhe në rast se në listën që do të publikohet sot figurojnë emra të këtyre lojtarëve, atëherë klubet do të jenë të detyruar t'i lejojnë. Sado që presioni i djeshëm bëri jo pak efekt, duke shtyrë zbardhjen e listës përfundimtare me kandidatët për kombëtare.

("Gazeta shqiptare", 09. 01. 2008)