Dallku e Curri hedhin poshtë akuzat e qeverisë për shitjen e ndeshjeve të Kombëtares

Akuzat në adresë të Kombëtares, ku pretendohet se janë shitur ndeshjet eliminatore të "Euro 2008", kanë sjellë reagimet e futbollistëve. Listës së kuqezinjve, të cilët i kanë mohuar në mënyrë kategorike këto akuza, i janë shtuar edhe Armend Dallku e Debatik Curri. Ministria e Sporteve i ka kërkuar UEFA-s që të hetojë sfidat me Bjellorusinë në "Qemal Stafa" dhe Rumaninë në Bukuresht, ndërkohë që vetëm pak ditë më parë akuzat direkte kanë ardhur nga Kryeministri i Shqipërisë, Sali Berisha. Nga Ukraina, dy kosovarët janë shprehur shumë të indinjuar për ato që janë thënë. "Edhe pse ndodhemi në mijëra kilometra distancë, si unë ashtu edhe Debatiku (Curri) jemi njohur me akuzat më të fundit që janë bërë në adresë të Kombëtares për shitje ndeshjesh", ka pohuar Armend Dallku. "Ndihemi të fyer nga këto spekulime dhe normalisht që na vjen shumë keq të dëgjojmë deklarata të tilla. Ndjehemi të prekur në mënyrë direkte dhe ndjejmë që duhet të reagojmë. Aty përdhoset emri i Kombëtares shqiptare dhe të gjithë futbollistëve që bëjnë pjesë në kontingjent".

Reagimi ka vazhduar me fjalët e Currit, që ka pohuar se ata, por edhe e gjithë skuadra, nuk mund të tallen me flamurin dhe me nderin kombëtar. Sipas tij, futbolli i njeh të treja rezultatet dhe humbjet janë pjesë e lojës. "Jemi mundur në dy ndeshjet e fundit eliminatore. Nuk kemi luajtur në nivelet e pritura dhe të pretenduara nga të gjithë tifozët shqiptarë, e për këtë jemi shumë të zhgënjyer, ka thënë 23-vjeçari, që brenda një kohe shumë të shkurtër është shndërruar në lojtar kyç të përfaqësueses. Megjithatë, futbolli është një sport i hapur, që njeh si fitoren dhe barazimin, ashtu edhe humbjen. Duhet pranuar si i tillë. Por, ideja për të shitur ndeshjet e Kombëtares nuk na ka kaluar asnjëherë, as kalimthi, në mendje. Nuk mund të tallemi me flamurin tonë dhe me nderin e kombit. Pjesë e këtyre simboleve jemi të gjithë, shqiptarë dhe kosovarë, dhe në mënyrë absolute nuk do ta pranonim një gjë të tillë kaq të rëndë".

Reagimi i dy kuqezinjve ka vazhduar edhe më tej, duke e cilësuar si shumë të rëndë faktin që fjalët që dëgjohen rëndom nëpër tavolina kafenesh më pas thuhen publikisht edhe nga personalitete të shtetit, ashtu sikundër bëri edhe Kryeministri Berisha në televizionin publik. "Është një problem i madh në mentalitet, pasi pavarësisht se sa fort skuadra përpiqet, sa herë që ajo nuk arrin rezultate, në bisedat e të gjithë tifozëve në kafene thuhet se ndeshja ishte e shitur, kanë vazhduar lojtarët e Vorsklas në Premier Ligën ukrainase. Situata përkeqësohet kur këto fjalë për shitje ose për blerje thuhen edhe nga Kryeministri i Shqipërisë, që i ka marrë për të vërteta. Kombëtarja ka dhënë gjithmonë maksimumin sa herë ka zbritur në fushë dhe nëse do të bënim pazare të tilla, do të talleshim me veten tonë, e ne do ta cilësonim si tradhti kombëtare. Tronditja pas gjithë këtyre akuzave, madje ku ministria i ka kërkuar UEFA-s hetim për ndeshjet e fundit, pasi dyshon fort në korrektesën e tyre, na lë pa fjalë".

Shqiperia.com