Roberto Baxhio, ish-futbollisti i famshëm i kombëtares italiane, është një nga emrat e shumtë që është propozuar si kandidat për kombëtaren shqiptare. Mund të duket habi, por kanë qenë menaxherë italianë ata që kanë përmendur emrin e "Bishtalecit" në listën me kandidatë të mundshëm për të marrë drejtimin e përfaqësueses. Pas lënies së futbollit, Baxhio ndoshta ka dëshirë të bëhet trajner dhe ka qenë kjo arsyeja që emri i tij është lakuar për të marrë pankinën e Shqipërisë. Megjithatë, burime nga FSHF thanë se emri i Baxhios as që do të merret fare në diskutim, për shkak të mungesës së eksperiencës së tij në fushën e trajnimit. Madje, mësohet se ka qenë vetë presidenti Duka që nuk e ka marrë në konsideratë këtë kandidaturë. Kreu i FSHF-së vazhdon të jetë në Vjenë, ku pritet të takohet me kandidatë të tjerë këto ditë. Burime zyrtare nga FSHF thanë se "Baxhio thjeshtë është përfolur si emër, por nuk është një kandidaturë për të marrë drejtimin e Shqipërisë, pasi i mungon eksperienca" në këtë fushë.

Duka

Kreu i FSHF-së vazhdon të qëndrojë në Vjenë, në pritje të bisedimeve për zgjedhjen e trajnerit të ri. Por, asgjë nuk duket se është në rrugë të mbarë, të paktën për momentin. "Unë në fakt dua ta zgjidh shpejt këtë çështje, pasi më 6 janar do të diskutojmë datat e ndeshjeve miqësore dhe dua që për këtë të jetë prezent edhe trajneri, megjithatë ende nuk kam bërë ndonjë takim për këtë punë", u shpreh në linjë telefonike nga Vjena, presidenti i FSHF-së Duka. "Ka pasur shumë emra që janë lakuar, por të them të drejtën me asnjërin nuk kam nisur bisedime zyrtare", është shprehur më tej ai. "Përshembull kam dëgjuar shumë për Sheferin dhe unë i thashë që jam në Vjenë e të vijë, por nuk ka ardhur deri tani. Unë kaq di. Sa për emra të tjerë, di vetëm që janë interesuar gjermani Volfgang Sidka, Valter Zenga dhe rumuni Dumitresku, ish trajner i AEK-ut", deklaroi më tej presidenti i FSHF-së.

(Marrë nga "Gazeta shqiptare", 29. 11. 2007)