Sipas gazetës SHQIP, presidenti i Federatës Shqiptare të Futbollit, Armand Duka, ka konfirmuar trajnerin Oto Bariç si alternativa e vetme në krye të stolit kuqezi. Në mesditën e së martës, kroati ka mbërritur në Shqipëri dhe pritet që brenda javës ai të takohet me drejtuesin më të lartë të futbollit në vend, ku do të diskutohet në parim rreth rinovimit të kontratës. Ai do të jetë prezent në ndeshjen kryesore të kësaj jave në Kategorinë Superiore që do të luhet në Kavajë, ndërmjet Besës dhe Partizanit.

E ardhmja e trajnerit të kombëtares shqiptare ka qenë kryefjala e kësaj jave: do ta rinovojë apo jo është dilema e të gjithëve. Për herë të parë, presidenti i FSHF-së është zhbalancuar në lidhje me çështjen e rinovimit të Oto Bariç, duke lëshuar deklarata që deri diku e "ngrohin" trajnerin rreth pozitave solide që gëzon në krye të skuadrës. "Misteri (Bariçi) është alternativa e vetme për kombëtaren", kanë qenë fjalët e Dukës për mediat. "Tashmë nuk është më sekret që Komiteti Ekzekutiv, në mbledhjen e fundit të zhvilluar, ka vendosur 'pro' tij. Ne si federatë do t'i ofrojmë një kontratë të re trajnerit". Dje në orën 12:30 të mesditës, 75-vjeçari ka mbërritur në Shqipëri. Ai është akomoduar në hotel "Adriatik" në Durrës, duke u detyruar të ndryshojë "axhendën" për shkak të mbipopullimit të hoteleve më të mëdha në kryeqytet. Sot "Oto Maksimal" do të jetë i pranishëm në supersfidën e kësaj jave në Superiore, ku Besa dhe Partizani do të luajnë për kreun e klasifikimit. Ndërkohë, ende nuk ka një datë të saktë se kur do të zhvillohen bisedat e para mes palëve. "Besoj se do të vendosim këto ditë rreth së ardhmes, por nuk mund të them asgjë më tepër rreth takimit me trajnerin, ka vazhduar më tej Duka. Fillimisht duhet të takohemi, për të folur rreth detajeve të kontratës që janë miratuar nga anëtarët e Komitetit Ekzekutiv. Nuk mund të them asgjë rreth spekulimeve për uljen apo për rritjen e rrogës së tij".

Kreu i federatës së sportit të top-këmbës ka folur gjithashtu edhe për zërat rreth kontakteve me trajnerë të tjerë, duke i hedhur poshtë në mënyrë kategorike. "Nuk po diskutojmë me asnjë trajner tjetër për momentin. Nuk mund ta bëjmë diçka të tillë, pasi kjo nuk do të ishte logjike. Jemi të fokusuar te Bariçi, pasi ai është trajneri ynë dhe pa përfunduar bisedën me të, nuk mund të bëjmë asnjë lëvizje tjetër", ka vazhduar Duka. Emri më i lakuar në këto momente si pasardhës i kroatit në stolin kuqezi është Katanec, aktualisht trajner i përfaqësueses maqedonase. "Alternativa Katanec? E përsëris edhe një herë që më parë duhet të mbyllim bisedimet me trajnerin tonë. Për të ardhmen mund të ketë edhe shumë emra të tjerë, të cilët i plotësojnë kushtet për të qenë në krye të Shqipërisë. Gjithsesi nuk mund të them më shumë", shtoi njëshi i FSHF-së, i cili ka shprehur besim për rinovimin e Bariçit. "Jam i bindur se me 75-vjeçarin do të shkojmë deri në fund", ka thënë Duka.

Aftësitë e teknikut kuqezi janë të padiskutueshme: puna e tij me kombëtaren tonë duket fare qartë në lojën me të mëdhatë e grupit dhe në rezultate. Perfekt nga ana taktike (lexon mjaft mirë lojën e kundërshtarëve), por mbi të gjitha ka arritur të ndërtojë një skuadër së cilës i janë larguar lojtarë që kanë shkruar historinë si Hasi, Tare, Murati por edhe Aliaj. Kroati ka kërkuar siguri nga federata që përpara ndeshjes me Slloveninë, duke u shprehur haptazi se priste një telefonatë nga Duka, për t'u ulur në tryezën e bisedimeve. Këtë e ka bërë pa e fshehur asnjëherë dëshirën për të vazhduar punën që filloi. Madje, ai nuk ka nguruar as të bëjë publike disa oferta, ku më joshësja është ajo e Dinamos së Zagrebit, që kërkon ta punësojë si zbulues talentesh. Gjithsesi, në momentin kyç të së ardhmes së tij, Bariç është limituar me fjalinë "do të flas vetëm pas bisedave me kreun e federatës".