Para më se 2000 vjetëve, ndër 36 vendet në zonat perëndimore ishte një mbretëri e vogël me emrin "Eroren", e cila gjendej në rrugën e mëndafshit. Meqenëse mbretëria Eroren ishte afër vendit të hunëve dhe ishte nën kontrollin e tyre, hunët i ndërsenin banorët e saj të bllokonin rrugën e mëndafshit dhe të vrisnin të dërguarit e dinastisë Han, që kalonin andej gjatë udhëtimit. Për këtë arsye, dinastia Han u detyrua të dërgonte trupa ushtarake për të mbrojtur rrugën, por kjo gjë shkaktoi luftë midis dy palëve. Mbreti i Erorenit u dorëzua menjëherë.

Pasi morën vesh se mbreti i Erorenit kapitulloi para dinastisë Han, hunët u zemëruan shumë dhe dërguan menjëherë trupa ushtarake për të goditur Erorenin. Mbreti i Erorenit u detyrua të dërgonte një nga bijtë e tij si peng në vendin e hunëve dhe një bir tjetër si peng në perandorinë Han.

Por banorët e Erorenit, të ndërsyer nga hunët, vazhduan të bllokonin rrugën. Prandaj, me urdhërin e perandorit Vudi, forcat e armatosura të dinastisë Han arrestuan mbretin e Erorenit. Por, pa kaluar shumë kohë, me urdhërin e perandorit Vudi, forcat e armatosura të dinastisë Han e liruan dhe e përcollën atë në vendin e tij . Që nga ajo kohë, hunët nuk i besonin më mbretërisë Eroren.

Pas vdekjes së mbretit plak të Erorenit, monarku Çan-yu i hunëve veproi me këmbët e para dhe ngriti në fronin mbretëror të Erorenit atë princ të Erorenit që ishte si peng në vendin e hunëve. Mbreti i ri i Eronrenit bashkëpunonte me hunët, mbante qëndrim armiqësor ndaj dinastisë Han dhe vazhdonte të vriste të dërguarit e dinastisë Han. Për këtë arsye, perandori Zhaodi, perandor i ri i dinastisë Han, dërgoi në vitin 77 para erës së re gjeneral Fu Gjezi për të goditur Erorenin. Mbreti i Erorenit u vra në luftë dhe vëllai i tij Yuçuçi u bë mbret i Erorenit.

Perandori Zhaodi i dinastisë Han e dekoroi mbretin Yuçuçi me vulën mbretërore, i dha atij një vajzë të pallatit perandorak për bashkëshorte dhe e ndërroi emrin e Erorenit me emrin "mbretëria Shanshan". Me kërkesën e mbretit Yuçuçi, perandoria Han dislokoi forca ushtarake në mbretërinë Shanshan, të cilat përgjigjeshin për të garantuar sigurimin e mbretit të mbretërisë Shanshan, njëkohësisht për të hapur toka të reja për mbjellje me drithra. Më vonë, qeveria e dinastisë Han vendosi këtu organin administrativ Duveifu. (Fund)