Sipas njoftimeve të Radios së Jashtme të Kinës, më 12 maj në orën 14.28 ra një tërmet i fuqishëm 7.8 ballësh në distriktin Wenchuan të provincës Sichuan, që ndikoi në sferë të gjerë dhe shkaktoi vdekjen dhe plagosjen e shumë njerëzve. Po më 12 maj në mbrëmje, kryeministri i Kinës Wen Jiabao arriti me aeroplan në qytetin Dujiangyan të provincës Sichuan, të dëmtuar nga tërmeti, dhe filloi të drejtojë punën e shpëtimit të njerëzve të prekur nga fatkeqësia e tërmetit.

Wen Jiabao u kërkoi oficerëve dhe ushtarëve që marrin pjesë në këtë punë, të kapërcejnë të gjitha vështirësitë dhe të arrijnë sa më parë, edhe më këmbë, në zonat e prekura më rëndë nga fatkeqësia.

Wen Jiabao vizitoi gjithashtu spitale, shkolla dhe objekte të tjera ku ka njerëz të prekur nga fatkeqësia e tërmetit dhe u tregoi gjendjen e fatkeqësisë dhe të punës së ndihmës.

Mësohet se pasi ra tërmeti, sektorët e ndryshëm të Kinës dërguan persona dhe materiale ndihme në zonat e prekura nga fatkeqësia. Tani, afro 20 mijë oficerë dhe ushtarë të Ushtrisë Çlirimtare Popullore dhe Policisë së Armatosur Kineze kanë arritur në zonat e prekura nga fatkeqësia. Dhjetëra mijë ushtarë të tjerë po shkojnë për në këto zona. Ministria e Çështjeve Civile dhe Ministria e Financave do t'u japin këtyre zonave 200 milionë juanë si fond urgjent. (Çang Çuo) (Artan)