dëgjoni

Që nga 31 janari, regjisori i njohur shqiptar Ylli Pepo filloi vizitën e tij të dytë në Kinë, pas 33 vjetëve.

Ai erdhi në Kinë si anëtar i një grupi realizues të një filimi dokumentar, dhe dy anëtarë të tjerë të grupit janë Xhemal Reçi dhe Astrit Omeri. Ky grup do të qëndrojë në Kinë për 10 ditë dhe do të bëjë intervista në 3 qytete kineze, Pekin, Shangai dhe Guangzhou.

Në fund të vitit 1974, me ftesën e qeverisë kineze, Ylli Pepo erdhi në Kinë për herë të parë dhe qëndroi për 3 muaj për regjistrimin e një filmi dokumentar për Kinën. Pas 32 vjetëve, ai kthehet përsëri në Kinë, ku kanë ndodhur ndryshime kolosale dhe që po përgatitet për Lojërat Olimpike 2008.

Si është Kina e sotme në syrin e Ylli Pepos? Që nga sot e deri më 9 shkurt, ju ftojmë të ndiqni serinë e njoftimeve dhe programeve të posaçme për vizitën e tij.

Më poshtë është përshtypjet e tij kur sapo mbërriti në Pekin:

"Për mua dita e sotme ishte si një ëndërr, si një ëndërr me të vërtetë. Mezi prisja të shikoja atë vend ku unë para 33 vjetëve kam xhiruar një film të gjatë, me ndihmën e Televizionit Qendror Kinez, dhe që u prit jashtëzakonisht mirë në Shqipëri në ato vite dhe që ka lënë mbresa të mëdha. Ishte vërtet një ditë e bukur dita e sotme. U ndodha përpara një të papriture të madhe. Pashë një Pekin të ndryshuar, që e kishin ndryshuar po ata njerëz të cilët shumë vjet më parë unë i kisha xhiruar, që punonin, që derdhnin djersë dhe që ishin të gatshëm për ta ndryshuar këtë vend. Dhe ata e kanë ndryshuar me të vërtetë, e kanë kthyer në një ëndërr. Jam i bindur që Lojërat Olimpike të Pekinit 2008 do të jenë një çudi për të gjithë, do të jenë një mrekulli e vërtetë për botën. "(Wang Lei)