Ju flet Radio e Jashtme e Kinës. Të dashur dëgjues, në programin e sotëm muzikor do të vazhdojmë të shijojmë disa nga 32 këngët dhe meloditë që ka transmetuar në tokë sateliti "Chang Ë Nr. 1".

Kënga që ndoqët titullohet "Prologu i Festës së Pranverës", e cila transmetohet shpesh në programet televizive në kuadrin e Vitit të Ri sipas kalendarit kinez, për të shprehur gëzimin e njerëzve në ditët e festës. Mund të themi se lëshimi me sukses i satelitit "Chang Ë Nr. 1" ishte një ditë feste për popullin e gjithë Kinës, madje për mbarë njerëzimin. Ky satelit, ashtu si bukuroshja Chang Ë në përrallën kineze, fluturon rreth hënës. Më poshtë le të dëgjojmë këngën që ka lidhje me hënën "Është ngritur gjysmëhëna".

Kjo është një këngë popullore e provincës Qinghai në veriperëndim të Kinës, e cila i këndon dashurisë së të rinjve. Rrezet e gjysmëhënës së ngritur në qiell kanë hyrë në dhomën e vajzës nga dritarja, djali po pret me padurim jashtë për të marrë një trëndafil tjetër nga vajza. Këta të rinj mund të krahasohen me Romeon dhe Xhuljetën që takoheshin në ballkon. Sa romantikë janë kinezët.

Duke folur për dashurinë, të dashuruarit më të njohur në Kinë janë Liang Shanbo dhe Zhu Yingtai. Së pari le të shijojmë bashkë melodinë "Liang Shanbo dhe Zhu Yingtai" dhe pastaj do t'ju tregoj historinë e tyre.

Ky koncert për violinë i kompozuar nga Chen Gang dhe He Zhanhao karakterizohet nga melodia e bukur dhe melankolike, besoj se këtë edhe ju e keni ndier, sepse kjo është një dashuri tragjike. Në Kinën e lashtë, në dinastinë Jin lindore, vajzat nuk lejoheshin të shkolloheshin. Vajza Zhu Yingtai nga një familje funksionari, duke e stolisur veten si djalë, shkoi në Hanzhou për të ndjekur shkollën. Këtu ajo u njoh dhe ra në dashuri me shokun e klasës Liang Shanbo nga një familje e varfër. I ati i Zhu Yingtai-t nuk pranoi ta martonte të bijën në një familje të varfër dhe e fejoi atë me djalin e një funksionari. Liang Shanbo-ja, i pikëlluar shumë, u sëmur dhe vdiq, ndërsa Zhu Yingtai u hodh në varrin e tij. Të dy të rinjtë u bënë dy flutura të bukura që fluturonin lirisht.

Tani kinezët gëzojnë lirinë e plotë të dashurisë, s'ka nevojë të psherëtijmë dhe të pikëllohemi pas muzikës. Më poshtë le të shijojmë së bashku këngën për Hong-Kongun me titull "Margaritari i Lindjes".

Hong-Kongu është shumë i lulëzuar, natën kudo shkëlqejnë dritat e llambave, nga qielli ai duket si një margaritar në Lindje. Hong-Kongu është një nga zonat më të pasura, me ekonominë më të zhvilluar dhe me nivelin më të lartë të jetesës në botë dhe është krenaria e Kinës. Kthimi i tij në gjirin e atdheut më 1997 i ka dhënë forcë të re zhvillimi. Tani Hong-Kongu është parajsa e blerjes së mallrave, vendi më i mirë për turizëm dhe qyteti i kulturës. Po të vini në Kinë, duhet të vizitoni patjetër Hong-Kongun për të parë bukurinë e tij.

Kur bëhet fjalë për Hong-Kongun, nuk mund të mos përmendet edhe Makao. Le të dëgjojmë tani "Këngën e 7 bijve"?kushtuar kthimit në gjirin e atdheut më 1999 të Makaos.

Kjo këngë e qetë është një këngë fëmijësh, e cila shpreh dëshirën e bashkatdhetarëve në Makao të larguar prej kohësh nga atdheu, për t'u kthyer në gjirin e mëmëdheut.

Dy meloditë që do të shijojmë më poshtë janë interpretuar me veglat muzikore tradicionale kineze. Melodia e parë "Malet e lumenjtë" është luajtur në veglën muzikore kineze guzheng. Në dinastinë Qin të Kinës së lashtë, instrumentisti Yu Boya i binte veglës muzikore në fushë, vetëm druvari Zhong Ziqi i kuptoi mendimet e tij të shprehura në melodinë e luajtur. Më vonë të dy u bënë miq të ngushtë. Kinezët e përdorin këtë melodi për të treguar se kanë gjetur një njeri që i kupton mirë e drejt. Të dashur dëgjues, ndoshta edhe ju po ndodheni në mes të maleve e lumenjve, apo ju ka marrë malli për ndonjë mik të zemrës?

Melodia e dytë është interpretuar në vegën muzikore kineze erhu dhe karakterizohet nga stili i theksuar kinez.

Këtë melodi të pikëlluar e ka krijuar kompozitori Hua Yanjun kur kishte humbur dritën e syve dhe jetonte duke u rënë veglave muzikore në Wuxi.

Përveç këngëve dhe melodive popullore kineze, ju do të ndiqni edhe operën kineze të transmetuar nga sateliti "Chang Ë Nr. 1".

Opera kineze ka shumë lloje. Kjo që po dëgjoni është opera kun, e cila e ka prejardhjen në provincën Jiangsu. Këtë pjesë që po dëgjoni e ka interpretuar mjeshtri i madh i operës kineze Mei Lanfang me zë vajze. Mënyra e të kënduarit të tij u emërtua më vonë e stilit Mei. Opera kineze është e bukur. Kur të dëgjoni e të shikoni aktorët të stolisur me makijazhin dhe të veshur me rrobat e larmishme të roleve që luajnë, do të ndieni një kënaqësi të madhe.

Tani në Shqipëri është pasdite e fundjavës, ndoshta po pini kafe a jeni duke shkuar në kafene. Ndërsa në Kinë është mbrëmje. Tani ju ftoj të shijoni melodinë me ritme të ngadalshme "Nata e bukur" që të qetësoheni pak e të imagjinoni natën e bukur plot me yje të gjysmërruzullit lindor.

Kënga që po shijoni është kënga e fundit e programit të sotëm muzikor. "Zemra ime kineze" ka ritme të fuqishme dhe i këndon dashurisë për atdheun. Lumi Jance, Muri i Madh Kinez, mali Huangshan, Lumi i Verdhë etj. përfaqësojnë djepet e historisë dhe kulturës së lashtë kineze. A keni dëshirë të vini këtu për vizitë? Ndiqni ju lutem programin tonë turistik dhe programet e tjera.

Ju flet Radio e Jashtme e Kinës. Të dashur dëgjues, ndoqët programin e sotëm muzikor. Në rast se ju pëlqejnë këto këngë e melodi . (Pina)