dëgjoni

Të dashur dëgjues, në këtë program muzikor do t'ju njohim me një grup melodish kineze, të interpretuara bashkërisht nga pianisti francez Riçard Klajderman e muzikantë të tjerë francezë dhe nga Orkestra e muzikës popullore e Radios e Kinës.

Melodia që po dëgjoni, titullohet: "Rrjedh përroi i vogël" dhe interpretohet bashkë nga muzikantët kinezë e francezë. Kjo është një këngë shumë e njohur popullore në provincën Ynan të Kinës Jugperëndimore. Në këngën me të njëjtin titull, me ritëm të bukur e të freskët dhe me motiv të thjeshtë e të thellë, pasqyrohen ndjenjat përmalluese të dy të rinjve për njëri-tjetrin. Melodia që po dëgjoni është e përpunuar në bazë të kësaj kënge. Nëpërmjet interpretimit me aparatet elektronike përshkruhet sfondi i qetë e i bukur, si nata e verës nën dritën e argjendtë të hënës, bambuja e gjelbër dhe liqeni i pastër me ujin e përroit të vogël. Kënga e dashurisë fillon në dialogun midis pianos, ërhusë dhe violonçelit dhe ndjenja e dashurisë rrjedh pandërprerë si uji i përroit.

Sapo dëgjuat melodinë e bukur: "Rrjedh përroi i vogël". Pianisti francez Riçard Klajderman është "mbreti i pianos" i njohur nga të gjithë kinezët. Në vitin 1986, kur kaseta e tij e parë muzikore "Melodi moderne në piano ? Fati" u importua dhe u publikua në Kinë, fati e bëri atë të lidhet ngushtë me muzikën kineze dhe me kulturën kineze. Shumë melodi për piano, të përpunuara në bazë të këngëve kineze dhe të interpretuara prej tij në fund të shekullit të kaluar, u mirëpritën dhe u pëlqyen nga dëgjuesit dhe muzikëdashësit e shtresave të ndryshme të Kinës. Në verën e vitit 2000, muzikantët francezë, me Klajdermanin si përfaqësues, dhe prodhuesit kinezë të muzikës, hartuan një projekt për përpunimin e një grupi melodish me mënyrën moderne të interpretimit dhe me teknologjinë më moderne të regjistrimit, si dhe me akustikën më të bukur me kombinimin e instrumenteve muzikore popullore tradicionale kineze, të instrumenteve muzikore perëndimore dhe të muzikës elektronike, që të pasqyrohet stili origjinal kombëtar i muzikës kineze.

Të dashur dëgjues, melodia që po dëgjoni titullohet: "Dialogu i këngëve". Në të pasqyrohet historia e një vajze kineze që luan veglën popullore kineze ërhu, e cila u takua rastësisht me mbretin e pianos Klajderman dhe filloi me gëzim dialogun me të dhe interpretoi bashkë me të një melodi. Në sfondin e aparateve elektronike, në këtë melodi me interpretimin e fyellit, pianos, pipasë dhe me këndimin e bukur të Klajdermanit, jepet një atmosferë e ngrohtë. Pas dialogut midis Klajdermanit dhe vajzës me ërhu, fillon interpretimi në formë dialogu midis pianos dhe ërhusë. Me elasticitetin e pianos dhe me lirshmërinë e ërhusë pasqyrohet miqësia midis popullit kinez dhe popullit francez. Shfaqjet e dy interpretuesve ia shtuan shumë gjallërinë kësaj melodie.

Orkestra e muzikës popullore e Radios e Kinës, që bashkëpunoi me muzikantët francezë, është një nga orkestrat më të mira të muzikës popullore në Kinë. Shumë melodi të interpretuara prej muzikantëve kinezë e francezë janë bërë vepra klasike të muzikës popullore kineze. Muzikantët kinezë e francezë shkuan në zonat e largëta malore të Kinës, ku mblodhën shumë melodi të pakicave kombëtare kineze dhe i përpunuan ato. Poshtë ju ftojmë të dëgjoni melodinë "Kënga e gjinkallës", ku përdoren shumë lloje të muzikës popullore kineze.

Në këtë melodi përdoren motivet e këngëve të kombësisë tong, një nga pakicat kombëtare kineze, dhe pasqyrohet jeta e larmishme e banorëve të kësaj kombësie në zonat malore të pjesës jugperëndimore të Kinës. Këngët e kombësisë tong janë korale dhe me motive të gjata e të bukura.

Më poshtë do të shijoni melodinë: "Ushtarët e kuajt prej qeramike të dinastisë Çin", të krijuar nga muzikantët francezë.

Ushtarët e kuajt prej qeramike të dinastisë Çin janë një mrekulli arkeologjike në Kinë. Në fund të viteve '70 të shekullit të kaluar, në Sian të provincës Shensi të Kinës u zbulua varri shoqërues 2300-vjeçar i perandorit të parë të Kinës Çinshëhuang, ku janë radhitur në mënyrë shumë të rregullt mijëra ushtarë e kuaj prej qeramike me madhësinë e njerëzve e kuajve të vërtetë. Kjo melodi pasqyron pikërisht madhështinë e tyre.(Drita-Daming)