Kohët e fundit u organizua në qytetin Urumçi, kryeqendrën e Rajonit Autonom të Sinkiang-Ujgurit të Kinës, festivali i parë ndërkombëtar koreografik folklorik i Sinkiangut të Kinës. Gjatë këtij festivali, rreth 1 300 artistë nga më se 10 ansamble kineze dhe të huaja dhanë 45 shfaqje me valle karakteristike folkloristike të kombeve të ndryshme.

Pjesa që po dëgjoni është muzika e valles së shfaqur në ceremoninë e hapjes së festivalit. Kjo mbrëmje artistike e organizuar për ceremoninë e hapjes, me një forcë tërheqëse të stilit të poezisë historike, demonstroi karakteristikat e valleve të kombësive të ndryshme të Sinkiangut dhe zhvillimin e artit koreografik popullor të kohës së sotme, duke i dhënë festivalit një nisje të mrekullueshme.

Nënkryetari i Shoqatës së koreografëve të Kinës Feng Shuangbai tha se, si vendlindje e këngëve dhe valleve, në rajonin e Sinkiangut ka bazë të fortë të kulturës koreografike tradicionale, të 13 kombësitë që kanë jetuar brez pas brezi në këtë rajon kanë lloje të ndryshme të valleve popullore, gjuhët koreografike janë me karakteristika të veçanta dhe me ngjyrë të theksuar kombësie.

Qeveria kineze i ka kushtuar një rëndësi të madhe kësaj trashëgimie kulturore jomateriale dhe shpreson që me anën e organizimit të këtij festivali koreografik dhe të forumit koreografik të bëjë një mbrojtje efikase të kësaj trashëgimie. Feng Shuangbai tha :"Vallet popullore, veçanërisht vallet burimore popullore të pakicave kombëtare, janë respektuar në një mënyrë të paparë. Kjo është një prirje e mirë dhe duhet ta çmojmë. Njëkohësisht shumë artistë u kanë kushtuar një rëndësi të madhe krijimeve të reja artistike. Krijime të reja artistike do të thotë që, krahas ruajtjes së karakteristikave origjinale burimore koreografike folklorike, të inkurajohen artistët të krijojnë në bazë të konceptit të tyre artistik vepra të reja, të ndryshme nga të tjerët, dhe që përputhen me prirjet e kohës së sotme".

Në mbrëmjen e ceremonisë së hapjes së këtij festivali, ne intervistuam kërcimtaren udhëheqëse të valles "Takimet në Daolang", vajzën ujgure Zhena Abudu Klim. Ajo është njëkohësisht mbajtëse e pishtarit të Lojërave Olimpike dhe do të marrë pjesë në stafetën e 25 qershorit të flakës olimpike. Banorët e kombësisë ujgure preferojnë të organizojnë takime në formën e këngëve dhe valleve. Vepra "Takimet në Daolang" është krijuar pikërisht për ceremoninë e hapjes së Festivalit Ndërkombëtar Koreografik Folklorik të Sinkiangut. Në përgatitjen e kësaj vepre ata kanë krijuar shumë risi, si nga ana e kostumeve, ashtu edhe nga ana e skenografisë.

Për ta luajtur sa më mirë këtë vepër, Zhena dhe bashkëpunëtorët e saj kanë bërë gjithsej 4 muaj përgatitje. Ajo tha : "Kjo është hera e parë që organizohet në Sinkiang Festivali Ndërkombëtar Koreografik Folklorik. Për ne kjo është një festë. Ne kemi ftuar nga Pekini disa regjisorë të talentuar dhe ata u emocionuan shumë pasi panë vallet tona. Sepse ne kemi valle shumë të pasura popullore. Ky festival për ne është një rast shumë i mirë për njohjen e botës me Sinkiangun dhe për njohjen e Sinkiangut me botën. "

Gjatë zhvillimit të këtij festivali, dhjetëra ansamble kineze dhe të huaja dhanë dhjetëra shfaqje në teatrot dhe në sheshet e qyteteve Urumçi dhe Gjichang. Edhe nga Sinkiangu morën pjesë 21 trupa artistike. Këto trupa të valltarëve të Sinkiangut janë nga qarqet e kombësive të ndryshme autonome të Sinkiangut, ata kanë dhënë shfaqje me vallet karakteristike burimore të kombësive të tyre ...

Pjesa që po dëgjoni është një fragment nga vepra koreografike e trupës artistike Mukam të Sinkiangut "Pranvera e Mukamit". Mukami është një vepër muzikore madhështore e krijuar nga banorët e Sinkiangut dhe quhet si "margaritar i muzikës së Lindjes".

Më 25 nëntor të vitit 2005, arti Mukam i Sinkiang-Ujgurit të Kinës u miratua zyrtarisht nga UNESKO-ja si "vepër përfaqësuese e trashëgimisë gojore jomateriale". Drejtuesi i trupës artistike Mukam të Sinkiangut Meimeitiming Meimeitili i tha korrespondentit se trupa e tij u krijua në 1989, ajo është e vetmja trupë profesioniste që merret me trashëgimin, zbulimin, sistemimin dhe studimin e artit Mukam të Ujgurit. Qeveria kineze i ka kushtuar një rëndësi të madhe mbrojtjes së artit Mukam dhe në çdo distrikt të rajonit ka vendosur pika për mbrojtjen, trashëgimin dhe studimin e këtij arti. Për të demonstruar gjithë artin Mukam në këtë festival ndërkombëtar, të 152 anëtarët e trupës filluan qysh shumë kohë përpara përgatitjet.

Drejtuesi i kësaj trupe Meimeitiming Meimeitili tha :"Kemi bërë dy vjet përgatitje për veprën 'Pranvera e Mukamit' .Organizimi i këtij festivali na dha një rast të mirë për të demonstruar sa më mirë veprën klasike ujgure "Mukam." ( Zhai) (Artan)