dëgjoni

Të dashur dëgjues, në rubrikën e sotme "Shkenca, arsimi dhe shëndetësia" do të japim reportazhin "Jeta e gëzueshme e nxënësve të shkollës C-UK të Shenzhenit në stepën e Mongolisë së Brendshme".

Sa herë që përmendet rajoni autonom i Mongolisë së Brendshme, që është zonë kufitare veriore e Kinës, njerëzit e lidhin atë me stepat e pafund, çajin e qumështit, blegtorët mikpritës dhe zakonet e kombësisë mongole. Para disa kohësh, 86 fëmijë të ardhur nga Tajvani, Hong-Kongu, Koreja e Jugut, Japonia, Filipinet dhe vende e rajone të tjera, që mësojnë në shkollën C-UK të qytetit Shenzhen të Kinës Jugore, erdhën në shkollën fillore eksperimentale numër dy pranë Kombinatit Metalurgjik të qytetit Baotou të rajonit autonom të Mongolisë së Brendshme, për të marrë pjesë në aktivitetet e shkëmbimeve arsimore. Nëpërmjet mësimit dhe jetës për dy javë në Baotou, këta nxënës provuan jetën dhe zakonet e kombësisë mongole. Ata u ndanë në disa grupe të klasës së 5-të dhe mësuesit e të dy shkollave dhanë mësim me turne. Për bashkëpunimin midis dy shkollave, foli drejtori i shkollës fillore eksperimentale të Baotout, zoti Dai Yunhai:

"Gjatë bashkëpunimit me mësuesit e Shenzhenit, kam vënë re se ata kanë risi në parimin e mësimdhënies, që janë të vlefshme edhe për ne. Është gjë e mirë që kemi filluar të përdorim këtë mënyrë të re të shkëmbimeve arsimore, duke krijuar një platformë të mirë veprimi për mësuesit dhe nxënësit tanë. Mbi këtë platformë, ne mund të zhvillojmë aktivitete të tjera të larmishme dhe të dobishme."

Krahas shkëmbimeve në klasë, edhe takimet artistike me nxënësit e kombësisë mongole dhe vizitat në shtëpitë e tyre gjithashtu janë pjesë e rëndësishme përbërëse e jetës në stepë të nxënësve të shkollës C-UK të Shenzhenit. Nxënësit nga Koreja e Jugut, Japonia dhe Filipinet kanë qenë të ftuar si mysafirë në shtëpinë e Thehui Tuyës, nxënëse e shkollës fillore eksperimentale pranë Kombinatit Metalurgjik të Baotout, dhe u miqësuan shpejt me të. Thehui Tuya është nga një familje e kombësisë mongole, e cila ruan edhe sot zakonet tradicionale të kombësisë së vet, edhe pse jeton në një qytet modern. Të gjithë pjesëtarët e kësaj familjeje flasin me njëri-tjetrin në gjuhën mongole, pinë çajin e qumështit, këndojnë këngë të tonit të gjatë dhe e adhurojnë si shenjtor Xhenxhis Khanin, figurë e famshme e kombësisë mongole.

Babai i Thehui Tuyës u rrëfeu këtyre fëmijëve të ardhur nga vende të huaja për jetën dhe veprimtarinë e Xhenxhis Khanit, duke i ndihmuar ata në njohjen më thellë të historisë së kombësisë mongole, që quhet "kombësia në kurrizin e kalit". Shumë prej këtyre fëmijëve të huaj u lindi interes i madh për gjuhën mongole dhe mësuan nga nëna e Thehui Tuyës fjalën "sebenu", që do të thotë "mirë se erdhët", dhe filluan të thonë "sebenu" sa herë që takoheshin me të tjerët. Me anë të vizitës në shtëpinë e Thehui Tuyës, këta fëmijë të huaj njohën nga afër karakterin e thjeshtë dhe mikpritës të kombësisë mongole. Nga fjalët e tyre në gjuhën hane "hen kuai le, hen kuai le", që do të thotë "kënaqësi e madhe, kënaqësi e madhe", shihet se ata e ndiejnë veten shumë të gëzuar. E ndien veten shumë të gëzuar edhe Thehui Tuya, që është miqësuar me këta mysafirë të vegjël, të ardhur nga vende të huaja.

"Më duket se ata janë njerëz shumë të çiltër. Ne i pritëm me çaj qumështi, me pëlhurë të bardhë mëndafshi që e quajmë 'hada' dhe me produkte vendëse të Mongolisë së Brendshme, pastaj u dhamë disa dhurata karakteristike mongole. Besoj se ata do të mbajnë mend gjithmonë se karakteri i kombësisë mongole është veçanërisht i hapur."

Gjatë dy javëve, këta nxënës të ardhur nga vende të tjera shfrytëzuan në maksimum kohën e lirë për të luajtur në stepën e pafund. Duke shëtitur hipur në kalë ose në deve, duke qitur me hark dhe duke dëgjuar këngë mongole, ata u ngopën së sodituri panoramat e stepës dhe së admiruari doket e kombësisë mongole. Vajza 11-vjeçare jugkoreane Baek Seng Heen foli për mbresën që i la Mongolia e Brendshme.

"Mendoj se këngët dhe vallet mongole janë shumë të bukura. Kam njohur doket e kësaj kombësie, që është mikpritëse. Këtu kam njohur disa miq. Kjo është gjëja më e paharrueshme nga vizita në Boatou."

Nëpërmjet këtyre aktiviteteve të shkëmbimeve arsimore, mësuesit dhe nxënësit e dy shkollave panë karakteristikat e ndryshme midis dy krahinave në arsim e kulturë dhe kuptuan se ata kanë nevojë të mësojnë nga njëri-tjetri. Për këtë foli zoti Guo Dong Gan, drejtori i shkollës C-UK të Shenzhenit.

"Me anë të këtyre aktiviteteve të shkëmbimeve arsimore, fëmijët panë me sytë e vet kushtet klimatike, mjedisin kulturor dhe atmosferën e mësimit në këtë krahinë. Besoj se kjo është e dobishme për rritjen e tyre." (Zheng)