dëgjoni

Së pari ju ftoj të dëgjoni këngën popullore të veriut të provincës Shanxi me titull "Kullot bagëtinë", kënduar nga këngëtarja Yuan Enfeng. Kjo këngë me melodi të lartë e krenare përshkruan një vajzë që rri pranë xhadesë, duke pritur kthimin sa më parë të të dashurit të saj. Në këngë thuhet: "Po të jesh i dashuri im, tund pak dorën, po të mos jesh i dashuri im, vazhdo rrugën tënde."

Yuan Enfeng është një këngëtare e njohur e brezit të vjetër. Ajo ka lindur në vitin 1940 në qytetin Xian të provincës Shanxi të Kinës veriperëndimore. E edukuar që në vogëli me historinë, kulturën, muzikën popullore dhe operën lokale të vendlindjes, ajo ka krijuar stilin shumëngjyrësh të interpretimit dhe këndon me ndjenja të përzemërta e me entuziazëm, duke shprehur forcën jetësore të theksuar të zonës Shanbei. Gjatë shumë vjetëve, Yuan Enfeng ka interpretuar mjaft këngë popullore të Shanbeit dhe pjesë të tjera muzikore dhe është mirëpritur ngrohtësisht nga dëgjuesit.

Më poshtë do të shijojmë së bashku këngën popullore të veriut të provincës Shanxi me titull "Lanhuahua". Kjo këngë me melodi të bukur e të rrjedhshme dhe me tekst të thjeshtë e të gjallë i këndon frymës rebele të vajzës Lanhuahua, e cila në kohën feudale të Kinës kërkoi me guxim lirinë e dashurisë. Këngëtarja e interpreton këtë këngë me entuziazëm, me shije malësore dhe në stil të thellë e elegant, duke realizuar me sukses figurën e vajzës Lanhuahua.

Tani do t'ju paraqit disa këngë popullore të interpretuara nga këngëtarja Su Ping, e quajtur "Mbretëreshë e këngëve Huaer". Këngët Huaer janë këngët malësore të përhapura gjerësisht në provincat Gansu, Qinghai dhe në Rajonin Autonom të Ninsia-Hui-së të Kinës, këto këngë i këndojnë kryesisht dashurisë dhe karakterizohen nga melodia e lartë dhe kumbuese, nga ndjenjat e përzemërta dhe atmosfera e theksuar fushore.

Kënga që po ndiqni është kënga Huaer me titull "Ka çelur lulja Shandan e vajzës së dashur", kënduar nga Su Ping. Kjo këngë me melodi të gëzueshme, të shpejtë dhe humoristike përshkruan një djalë, i cili shfrytëzon raste të ndryshme për të vizituar vajzën e zemrës së tij, duke shprehur kërkesën e madhe të të rinjve për dashurinë.

Su Ping është një këngëtare e njohur kineze e këngëve Huaer, e cila ka lindur në vitin 1942 në provincën Qinghai të Kinës perëndimore. Kur ishte 17 vjeçe ajo u bë një këngëtare e Ansamblit të Këngëve e Valleve të provincës Gansu. Su Ping ka zë të lartë e kumbues, këndon me ndjenja të thjeshta dhe frymën e kohës. Ajo ka shkuar më se një herë për vizitë e shfaqje në Japoni, Rumani, Korenë e Veriut, Tajvan, Hong-kong etj., dhe kudo që ka shkuar është mirëpritur ngrohtësisht nga spektatorët. Më poshtë do të dëgjojmë së bashku me ju këngën me titull "Sodisim fushën nga mali i lartë", kënduar nga Su Ping. Kjo është kënga Huaer më tipike dhe e përhapur më gjerësisht. Kënga përshkruan në mënyrë metaforike ndjenjën shpirtërore kontradiktore të një djali, i cili dashuron një vajzë dhe shpreson që të fitojë dashurinë e saj, por nuk ka gjetur rast për t'i afruar. Në këngë thuhet: "Ngjitem në mal të lartë për të parë fushën, në të cilën gjendet një lule mudan. Është e lehtë për ta parë, por e vështirë për ta këputur. Është e kotë kur nuk e kam në dorë."