Të dashur dëgjues, në rubrikën "Kultura tradicionale kineze" do të flasim për taktikën "Peshkimi në ujë të turbullt", që është taktika e 20-të nga libri "Tridhjetë e gjashtë skemat strategjike dhe taktike", një libër klasik kinez për artin ushtarak.

Shprehja "Peshkimi në ujë të turbullt" është një idiomë e gjuhës kineze me kuptimin alegorik të "nxjerrjes së fitimeve në një situatë plot me çrregullim dhe paqëndrueshmëri". Taktika ushtarake e emërtuar me këtë shprehje do të thotë që të korrësh fitoren duke shfrytëzuar turbullirat në kampin e kundërshtarit. Kjo taktikë u përdor me sukses qysh në kohën e lashtë nga trupat qeveritare të dinastisë Tang.

Vitet e para të shekullit të 8-të të erës sonë ishin një periudhë e lulëzuar për dinastinë Tang në historinë kineze. Asokohe, kryeqyteti i saj Çangan, Xiani i sotëm, ishte qytet me ekonomi dhe kulturë shumë të zhvilluar. Mirëpo kitanët, një pakicë kombëtare në pjesën verilindore të Kinës, u rebeluan kundër regjimit qendror të dinastisë Tang. Për të përballuar rebelët kitanë, perandori e dërgoi gjeneralin Zhang Shougui si komandant për mbrojtjen e qytetit Youzhou, Pekini i sotëm, që ishte atëherë si "mburojë" në luftën kundër kitanëve.

Rebelët kitanë, të komanduar nga gjenerali i tyre Ktugan, sulmuan disa herë, duke u orvatur për të pushtuar Youzhoun, por pësuan disfatë. Për të njohur gjendjen e trupave qeveritare, Ktugani dërgoi në Youzhou përfaqësuesin e tij, i cili tha se gjoja ata do t'i nënshtroheshin regjimit qendror. Komandanti Zhang e priti me mirësjellje këtë të dërguar dhe, të nesërmen, dërgoi përfaqësuesin e vet për të përshëndetur ushtarët kitanë, por në fakt për të njohur gjendjen e radhëve të rebelëve.

I dërguari i qeverisë u prit ngrohtësisht në kazermën e trupave rebele. Në banketin për nder të tij, ai diktoi menjëherë mosmarrëveshjen e oficerëve madhorë të rebelëve lidhur me qëndrimin ndaj regjimit qendror dhe vuri re sidomos qëndrimin e gjeneralit Li Guozhe, që thoshte me aluzione se banorët e thjeshtë kitanë nuk e donin luftën dhe se as ai vetë nuk donte të kundërshtonte regjimin qendror. I dërguari i qeverisë vendosi që të shfrytëzonte këtë mosmarrëveshje, prandaj inkurajoi Li Guozhe-në të krijonte merita në mbrojtjen e dinastisë Tang dhe dha fjalën se regjimi qendror do ta vinte në post të rëndësishëm, mjafton që të kishte merita. I frymëzuar nga fjala e të dërguarit, Li Guozh u shpreh se do t'i nënshtrohej qeverisë qendrore. Pasi u kthye në Youzhou, i dërguari i qeverisë ia raportoi gjeneralit Zhang Shougui gjendjen e trupave kitane.

Më pas, në krye të trupave kitane nën varësinë e tij, Li Guozhe sulmoi befasisht kazermën e shtabit të tyre të përgjithshëm. Kryekomandanti i tyre, Ktugani, që nuk kishte aspak përgatitje, u vra nga Li Guozhe-ja me dorën e vet. Kështu, kazerma e trupave kitane ra në rrëmujë të madhe. Gjenerali Zhang Shougui i trupave qeveritare të dislokuara në Youzhou, që ishte përgatitur mirë, duke komanduar trupat qeveritare, u vërsul në kazermën e trupave kitane. Ndërkohë, rrëmuja në kazermën e kitanëve ishte acaruar në kulm, sepse atje po bëhej vëllavrasje. Duke përfituar nga rasti i volitshëm, gjenerali Zhang Shougui "peshkoi në ujë të turbullt". (Zheng)