dëgjoni

Të dashur dëgjues, unë jam Pina, ju përshëndes përsëri nga Pekini. Në programin e sotëm të këngëve popullore do t'ju paraqit një grup këngësh popullore të interpretuara nga këngëtarët kinezë të brezit të vjetër. Së pari ju ftoj të shijoni këngën popullore me titull "Kënga malësore e kullotjes së kuajve", kënduar nga këngëtarja popullore kineze e ndjerë Huang Hong.

"Në janar kullot kuajt në shpat mali, në shkurt rriten mirë barërat, kullot kuajt në thellësinë e maleve. Kuajt nuk shëndoshen pa ngrënë barëra të egra, ndërsa barërat nuk rriten pa vesë."

Kënga që ndoqët titullohet "Kënga malësore e kullotjes së kuajve", kënduar nga Huang Hong. Kjo këngë popullore e provincës Yunnan pasqyron jetën e bariut të vogël. Kënga është e gëzueshme dhe e shpejtë, ka strukturë të thjeshtë melodike e forcë të theksuar jetësore.

Këngëtarja Huang Hong lindi në vitin 1928 në qytetin Kunming të provincës Yunnan të Kinës jugperëndimore. Që kur ishte e vogël i pëlqenin shumë këngët e vallet popullore të provincës Yunnan. Në vitin 1949 pas shpalljes së Kinës së Re, ajo u bë një këngëtare soliste në Ansamblin e këngëve dhe valleve të Yunnanit. Në vitin 1953 në Festivalin e parë kombëtar të këngëve e valleve popullore Huang Hong, me zë të ëmbël dhe të freskët dhe stil fushor të interpretimit, këndoi këngët popullore të Yunnanit "Kënga për të ngarë kalin", "Gurgullon përroi" etj., duke shkaktuar jehonë të madhe në qarqet muzikore dhe duke u vlerësuar lart nga spektatorët. Huang Hong jo vetëm ishte e aftë për të kënduar këngët popullore të Yunnanit, por edhe ka marrë pjesë aktivisht në mbledhjen e sistemimin e këtyre këngëve, shumë këngë popullore të mbledhura prej saj janë të përhapura gjerësisht në gjirin e popullit. Më poshtë do të shijojmë së bashku këngën popullore të Yunnanit me titull "Gurgullon përroi", kënduar nga Huang Hong.

Kjo është një këngë e njohur dashurie, e cila me melodi të bukur e të freskët përshkruan një gjendje shpirtërore poetike e piktoreske. Në këngë thuhet: "Hëna lëshon rreze të ndritura, më merr malli për të dashurin tim që ndodhet në mal. I dashuri si hënë ecën në qiell, përroi gurgullon rrëzë malit."

Të dashur dëgjues, ndoqët këngën popullore "Gurgullon përroi". Tani do t'ju paraqit këngët popullore kineze të interpretuara nga këngëtarja veterane Ju Xiufang.

Sopranoja Ju Xiufang ka lindur në vitin 1934 në provincën Jiangsu të Kinës jugore dhe është rritur në qytetin ujor Suzhou, i cili i ka dhënë zë të ëmbël. Në vitin 1950, Ju Xiufang u pranua në Konservatorin e Shangait, duke mësuar nga profesoresha Zhou Xiaoyan. Krahas studimit të mjeshtërisë së këndimit evropian, ajo studioi edhe artin vokal popullor kinez, duke e kombinuar mënyrën e këndimit evropian me atë kinez.

Kënga që ndoqët është një këngë popullore e Suzhout me titull "Lodra Jiulianhuan e vogël", kënduar nga Ju Xiufang. Kjo këngë përshkruan një vajzë të re që luan në shtëpi me lodrën Jiulianhuan. Jiulinahuan-i është një lodër tradicionale kineze, ajo përbëhet nga 9 rrathë të lidhur me njëri-tjetrin në një shkop të shkurtër që është shumë e vështirë për t'i zgjidhur.

Gjatë karrierës artistike mbi 50 vjeçare, Ju Xiufang ka mbledhur, sistemuar, përpunuar dhe kënduar gati 100 pjesë të muzikës vokale popullore. Ajo ka zë të ëmbël e të bukur, këndon me fjalë të qarta dhe në mënyrë elegante, interpretimi i saj ka karakteristika të theksuara kombëtare dhe forcë jetësore. Në fund të programit të sotëm do të shijojmë së bashku këngën popullore të veriut të provincës Shanxi me titull "Wuge kullot dhen". Kjo këngë përshkruan një vajzë që dashuron bariun Wuge, e merr malli shumë për të dhe ëndërron një jetë të lumtur në të ardhmen. Le ta dëgjojmë. (pina)