dëgjoni

Jin Xing është një kërcimtare me një përvojë të jashtëzakonshme jete. Jin Xing ishte një djalë dhe në moshën 28?vjeçare bëri operacion për ndryshimin e seksit dhe u bë femër. Ajo krijoi edhe ansamblin e parë privat të valleve në Kinë.

Jin Xing lindi në vitin 1969 në verilindje të Kinës dhe ishte i vetmi djalë i familjes. Qysh në moshë të re, atij i pëlqenin shumë këngët e vallet dhe të gjitha gjërat që tërheqin vëmendjen e vajzave. Kur ishte në moshën 9-vjeçare, Jin Xing u pranua në ansamblin e këngëve dhe të valleve të zonës ushtarake të Shenyangut dhe u bë një kërcimtar. Në vitin 1984, ai nisi studimet në fakultetin e valleve të Institutit Artistik të Ushtrisë Çlirimtare Popullore të Kinës . Kur ishte 19 vjeç, si kërcimtari i parë i valleve moderne i Kinës, Jin Xing shkoi në SHBA për të studiuar vallëzim modern perëndimor. Pas kthimit në atdhe, Jin Xing mori një vendim të jashtëzakonshëm dhe bëri operacionin e ndryshimit të seksit. Jin Xing u shpreh se bërja femër ka qenë ëndrra e vet e gjithmonshme, pas operacionit, ajo e gjeti veten.

Shumë njerëzve Jin Xing u duket një njeri shumë i çuditshëm, por ajo nuk e merr fare parasysh se ç'mendojnë të tjerët për të. Ajo tha:

"Në këtë shoqëri, është një gjë shumë e natyrshme që të tjerët të kenë mendime të ndryshme për ty, kjo është liria e tyre. Më në fund, njerëzit u kanë kushtuar më shumë vëmendje valleve të mia dhe jo problemit të seksit tim."

Jin Xing është krijuesja e valleve moderne të Kinës. Në vitin 1998, ajo krijoi ansamblin e valleve moderne "Jin Xing", ky është i vetmi ansambël privat i valleve moderne në Kinë deri sot. Ky ansambël ka qenë në krahinat e ndryshme kineze dhe në vende të ndryshme evropiane për shfaqje, duke ngjallur jehonë të madhe. Në vitin 2004, Jin Xing krijoi vallen "Tango e Shangait" që shfaq ndjenjat e ndërlikuara të njerëzve në këtë metropol ndërkombëtar. Gjatë shfaqjes në Evropë, kritikët evropianë e vlerësuan lart këtë vepër. Një kritik vuri në dukje: "Kur ne nuk jemi të qartë për drejtimin e zhvillimit të ardhshëm të valleve moderne, një kërcimtare orientale na e qartësoi drejtimin."

Jin Xing u shpreh se ajo nuk e mohon faktin që shumë njerëz i shikojnë vallet e saj për shkak të kureshtjes për seksin e saj, por ajo ka besim që t'i prekë ata me valle. Përvoja e pasur e jetës e ka bërë më të larmishme përmbajtjen e valleve të Jin Xingut. Duke folur rreth kuptimit për vallen moderne, ajo tha:

"Një kërcimtari të shquar të valleve moderne i nevojitet një eksperiencë e pasur e jetës. Mosha 28 deri 38 vjeçare është periudha e artë e kërcimtarëve të valleve moderne, sepse kërcimtarët në këtë moshë kanë eksperiencë më të pasur se kërcimtarët e rinj."

Kur pa për herë të parë dramën e valleve "Vajza flokëbardhë", Jin Xingut i pëlqeu vallja. Ajo e konsideron vallen si pjesë e jetës. Jin Xing u shpreh se vallja mund të ndryshojë karakterin e njerëzve dhe kur është në skenë, ajo ka vetëbesim më të madh:

"Jam shumë e lirë në skenë dhe e ndiej veten si mbretëreshë."

Në vitin 2006, Jin Xing i shpenzoi të gjitha kursimet e saj për të organizuar veprimtarinë e stinës së shfaqjeve "Valle në Shangai". Deri tani kjo veprimtari është zhvilluar dy herë. Artistët e kërcimit modern të ardhur nga Suedia, Zvicra, Danimarka, Izraeli etj. kanë dhënë shfaqje të shkëlqyeshme në këtë festival. Jin Xing ka hyrë në borxh për shkak të kësaj veprimtarie, por ajo nuk e ka humbur entuziazmin për të. Ajo krijoi posaçërisht veprën e re "Takimi në kopsht" për "Valle në Shangai". Kjo vepër është ndërtuar në bazë të pjesës së operës Kunqu të Kinës "Mudanting" dhe është një provë e lidhjes së kulturës tradicionale kineze me vallëzimin modern. Jin Xing shpreson se kjo valle do të zgjojë kërkimin nga femrat të dashurisë së bukur dhe të thjeshtë.

Jin Xing është shumë e kënaqur me jetën si femër. Tani ajo ka një familje të lumtur, bashkëshorti i saj është gjerman, ata kanë bijësuar 3 fëmijë. Krahas interpretimit të valleve, Jin Xing e harxhon shumicën e kohës në kujdesin për fëmijët. Ajo është një nënë e mirë. (Fani)