Të dashur dëgjues, në rubrikën "Kultura tradicionale kineze" do të flasim për taktikën "Ia heq kazanit drutë nga poshtë", që është taktika e 19-të nga libri "Tridhjetë e gjashtë skemat strategjike dhe taktike".

"Ia heq kazanit drutë nga poshtë" është një fjalë e urtë dhe idiomë e gjuhës kineze, me të cilën është emërtuar një taktikë ushtarake që do të thotë zgjidhje e problemit që nga themeli. Strategët ushtarakë janë të mendimit se kur uji në kazan vlon, njeriu i heq drutë e ndezura nga poshtë, me qëllim që uji të ftohet dhe, në këtë çast, askush nuk prek direkt me dorë ujin e nxehtë dhe zjarrin. Po kështu, përballë një kundërshtari të fortë, trimi me mend përpiqet t'i shmanget tehut, të kërkojë pikat e dobëta të kundërshtarit dhe të presë rastin e volitshëm për të ulur rrënjësisht aftësinë luftarake të kundërshtarit.

Këtë taktikë e vuri në jetë me sukses administratori krahinor Shye Çangru gjatë kohës së dinastisë Song, në shekullin e 10-të të erës sonë. Një ditë, një numër ushtarësh në kazermën brenda krahinës së administruar prej tij u rebeluan, nisën të vrisnin zyrtarët lokalë dhe të digjnin rezidencat e zyrtarëve. Të gjithë zyrtarët e tjerë u frikësuan dhe nuk guxonin të dilnin për të përballuar atë gjendje. Vetëm Shye Çangru doli me gjoksin përpara dhe shkoi në kazermën e rebelëve, pa u shoqëruar nga askush. Duke treguar rreptësi në zërin dhe fytyrën e tij, ai tha përpara ushtarëve të rebeluar: "Të gjithë ju keni prindër dhe fëmijë. Po të vazhdoni rebelimin, jo vetëm ju vetë nuk do të keni përfundim të mirë, por do t'u sillni telashe edhe të afërmve tuaj. Sa fatkeqësi e madhe do të ishte kjo! Po të lini armët që tani, unë nuk do t'i fajësoj ushtarët e thjeshtë." Pasi dëgjuan këto fjalë, shumica e ushtarëve pjesëmarrës në rebelim u çelën në fytyrë, sepse shumë prej tyre morën pjesë në rebelim jo me dëshirën e vet, po me detyrim. Pasi vuri re këtë ndryshim, Shye Çangru vazhdoi: "Tani, organizatorët kryesorë të rebelimit le të dalin në të majtë, ndërsa të gjithë të mashtruarit në të djathtë." Kështu, disa qindra ushtarë pjesëmarrës në rebelim kaluan në të djathtë, siç urdhëroi Shye Çangru, kurse një grusht i vogël organizatorësh, pasi panë se situata ishte e pafavorshme për ta, dolën rrëmbimthi nga porta, u shpërndanë, ikën me të katra dhe u fshehën nëpër fshatra. Shye Çangru, në krye të ushtarëve që u rebeluan të mashtruar më parë dhe që u ndreqën më në fund, shkoi fshat më fshat për të mobilizuar fshatarët që të demaskonin organizatorët e rebelimit. Pas pak kohe, ata njerëz u kapën të gjithë.

Metoda që përdori Shye Çangru për zgjidhjen e krizës është shpjegimi më i mirë i taktikës "Ia heq kazanit drutë nga poshtë". Duke i bërë me vete ushtarët që morën pjesë në rebelim, ai uli moralin dhe shthuri bazën organizative të krerëve të rebelëve. Kyçi i taktikës "Ia heq kazanit drutë nga poshtë" është që të kapemi fort pas zgjidhjes së kontradiktës kryesore dhe të shfrytëzojmë pikat që kanë të bëjnë me gjendjen e përgjithshme. Të gjitha masat që merren në kohën e kundërvënies midis palëve në luftë, siç janë shkatërrimi i prapavijës së armikut, rrëmbimi i municioneve të armikut, prerja e rrugëdaljes së tij e të tjera, i përkasin kësaj taktike. (Zheng)