Të dashur dëgjues, në rubrikën e sotme "Shkenca, arsimi dhe shëndetësia" do të japim reportazhin "Ekipi mjekësor rus që jep ndihmë të shpejtë në Sichuan".

Ekipi mjekësor rus, i përbërë nga 67 punonjës, është i pari ekip mjekësor ndërkombëtar që arriti në Kinë për të dhënë ndihmë mjekësore në zonat e prekura nga tërmeti i fuqishëm që ra në distriktin Wenchuan të provincës Sichuan. Me të arritur në Pengzhou, një nga zonat e prekura më rëndë nga tërmeti, mjekët rusë ngritën menjëherë një "spital fushor" të urgjencës dhe iu përveshën punës intensive për të mjekuar dhe shpëtuar të plagosurit nga tërmeti.

Sa përfundoi ngritjen e spitalit fushor, ekipi mjekësor rus pranoi grupin e parë të të plagosurve. Një nga të plagosurit ishte edhe gjyshja mbi 80-vjeçare Yang Yishy, e cila u rrëzua më 12 maj në çastin kur ra tërmeti, iu thyen kockat e kurrizit dhe pati tronditje të lehtë në tru. Meqenëse spitalet në zonën e saj u dëmtuan rëndë nga tërmeti dhe nuk kishin më kushte mjekimi, punonjësit e ndihmës në raste fatkeqësish natyrore e sollën atë për mjekim në spitalin fushor rus të urgjencës.

Mjekët rusë e operuan këtë të plagosur të moshuar 1 orë pas arritjes së saj. Komandanti i përgjithshëm i spitalit fushor rus, Aleksandër Ivanus, tha se ekipi mjekësor rus mund të kryejë me rendiment kaq të lartë aktivitetet e ndihmës së shpejtë kryesisht në saje të pajisjeve të përparuara që zotërojnë spitalet e tyre të lëvizshme fushore.

"Të gjitha pajisjet e këtij spitali mund të çmontohen pas përdorimit dhe të montohen shpejt përsëri. Këto pajisje, që janë të lehta për t'u mbartur, mund të transportohen me automjet ose helikopter. Prandaj quhet edhe si 'spitali i lëvizshëm ajror'. Ky spital fushor ofron 16 lloje shërbimesh, siç janë ndihma urgjente, mjekimi normal, shërbimi në xhenio etj."

Ivanusi thotë se, çdo ditë, spitali i tyre fushor mund mjekojë 200 të plagosur rëndë dhe të operojë 5-10 veta.

Të gjithë anëtarët e ekipit mjekësor rus kanë përvojë të pasur në ndihmën e shpejtë. Ata bënë shërbime mjekësore pasi ndodhi fatkeqësia e rëndë e cunamit në Oqeanin Indian.

Ivanusi thotë se puna e tanishme e ndihmës mjekësore është shumë e vështirë, por ata kanë vënë re se po zhvillohet intensivisht puna për mjekimin e të plagosurve, për rregullimin e jetës së banorëve të prekur nga fatkeqësia e tërmetit dhe për parandalimin e përhapjes së epidemisë në këto zona.

"Ky tërmet, që ra në zona malore, pati fuqi shumë të madhe shkatërruese. Rrugët u dëmtuan shumë rëndë. Asnjë vend nuk mund të ketë forcë kaq të madhe të transportit ajror për të shpërngulur banorët e prekur nga fatkeqësia, prandaj puna e ndihmës është shumë e vështirë. Por unë u mahnita se si përballë një fatkeqësie kaq të rëndë natyrore, qeveria kineze mundi të organizojë në rregull punën e ndihmës."

Krahas punës së mjekimit të të plagosurve, anëtarët e ekipit mjekësor rus kanë marrë përsipër edhe punën e ndihmës psikologjike për banorët e prekur nga fatkeqësia e tërmetit. Korrespondenti ynë vuri re se mjekja ruse Olia Makorova po i jepte ndihmë psikologjike një vajze 3-vjeçare. Prindërit e kësaj vajze të vogël u plagosën rëndë nga tërmeti dhe ajo u tremb shumë. Makarova thotë se ajo shpreson se, pas mjekimit shkencor, kjo vajzë do të dalë nga gjendja e zymtë psikologjike.

"Zakonisht, pas një tërmeti, të gjithë njerëzit bien në një botë shpirtërore plot me frikë. Ata vuajnë nga humbja e të afërmve, kanë frikë se mos shtëpia do të shembet edhe një herë dhe tremben nga pasgoditjet. Ne kemi detyrim që t'i shoqërojmë sa më shumë, duke bërë muhabet me ta, me qëllim që ata t'i shkarkojnë këto ndjenja psikologjike. Sa për fëmijët, ne mund t'i shoqërojmë duke pikturuar bashkë me ta, me qëllim që ata të pikturojnë gjërat që u kallin frikë dhe gjërat që i gëzojnë. Kështu që ata mund të shfaqin ndjenjat e tyre."

Makarova nuk e di gjuhën kineze, megjithatë ajo përpiqet të komunikojë me fëmijët me ndihmën e gjuhës së gjesteve.

Më në fund, kjo vajzë e vogël vuri buzën në gaz. Makarova thotë se ajo shpreson që, pas një kohe jo të gjatë, të gjithë njerëzit e prekur nga ky tërmet do të buzëqeshin. (Zheng)