Të dashur dëgjues, në rubrikën "Kultura tradicionale kineze" do të flasim për taktikën "Kapja e kreut për të asgjësuar banditët", që është taktika e 18-të nga libri "Tridhjetë e gjashtë skemat strategjike dhe taktike", një libër klasik kinez për artin ushtarak.

Shprehja "Kapja e kreut për të asgjësuar banditët" ka ardhur nga vargjet e poetit të madh kinez Du Fu të dinastisë Tang, të shekullit të 8-të të erës sonë. Taktika ushtarake e emërtuar me këtë shprehje do të thotë se shpartallimi i forcave kryesore të armikut, kapja e kreut ose shkatërrimi i shtabit të tij është një metodë efikase për fitoren mbi armikun. Një shembull i përdorimit të suksesshëm të kësaj taktike ka qenë luftimi për asgjësimin e rebelëve në kohën e dinastisë Tang.

Mesi i shekullit të 8-të ishte një periudhë e lulëzuar për dinastinë Tang. Mirëpo perandori i saj u dha pas jetës luksoze, duke i lënë pas dore çështjet poltike dhe ushtarake. Si pasojë, u acaruan kontradiktat shoqërore, gjë që çoi në rebelimin e forcave separatiste kundër regjimit qendror. Në vitin 755, zyrtarët krahinorë An Lushan dhe Shi Siming u rebeluan dhe shpejt pushtuan kryeqytetin Çang-an. Perandori u arratis dhe An Lushan u shpall "perandor".

Në fillim, trupat rebele korrën fitore të njëpasnjëshme në beteja, prandaj An Lushanit iu rrit mendja. Me urdhrin e tij, gjenerali i klikës rebele Yin Ziqi, duke komanduar 100 mijë trupa rebele, nisi mësymjen për të pushtuar Suiyang, qytet me rëndësi strategjike. Gjanerali Zhang Xun i forcave qeveritare, që mbronte qytetin, kishte vetëm disa mijë ushtarë. Armiku sulmoi më shumë se 20 herë, por nuk pushtonte dot qytetin Suiyang, sepse çdo herë u spraps nga forcat qeveritare që luftuan duke u mbështetur në fortesën e pathyeshme. Megjithatë, qyteti ishte i rrethuar shtresa-shtresa nga rebelët.

Meqenëse numri i trupave rebele ishte disa herë më shumë se numri i forcave qeveritare, Gjenerali Zhang Xun vendosi të zbatonte taktikën "Kapja e kreut për të asgjësuar banmditët". Ai kishte ndër mend që, me kryerjen e një aksioni, të vriste Yin Ziqinë, kreu i trupave rebele. Mirëpo as ai dhe as ushtarët e tij nuk kishin parë asnjëherë surratin e Yin Ziqiut, prandaj dallimi i këtij njeriu në mes të detit të njerëzve ishte bërë një vështirësi e madhe. Në këtë kohë, me porosinë e gjeneralit Zhang Xun, ushtarët mprehën një numër shtizash druri dhe, duke i përdorur si shigjeta, qitën kundrejt armikut. Shumë veta prej trupave rebele u goditën nga këto shtiza, por nuk pësuan asgjë, prandaj u gëzuan pa masë, duke kujtuar se forcave qeveritare u kishin mbaruar shigjetat e vërteta. Disa prej tyre shkuan fët e fët te kreu i tyre për t'i raportuar këtë lajm. Në këtë çast, Gjenerali Zhang Xun kuptoi menjëherë se kush ishte Yin Ziqi dhe urdhëroi ushtarët të qitnin me shigjeta të vërteta kundrejt atij njeriu. Një shigjetë goditi mu në syrin e majtë të Yin Ziqiut, prandaj ai ra nga kali. Duke parë këtë, trupat rebele u gjendën menjëherë në rrëmujë. Forcat qeveritare, të komanduara nga Zhang Xun, vranë mjaft rebelë dhe zunë rob shumë të tjerë. Në këtë mënyrë, duke përdorur me sukses taktikën "Kapja e kreut për të asgjësuar banditët", Zhang Xun krijoi një shembull të fitores së pakicës mbi shumicën. (Zheng)